6
1 Ye mbʋ, mba ɖa ɖa nɛ Ɛsɔ ɖɩlakɩ tʋmɩyɛ yɔ, ɖɩsazɩɣ-mɩ se ɩtaawɛɛkɩ lootiye nɖɩ ɛlabɩ-mɩ yɔ yem. 2 Mbʋ pʋyɔɔ yɔ, Ɛsɔ yɔɔdaa se:
“Pɩtalɩ ɖeu labʋ lɛ, manɩnɩ-ŋ.
Pɩtalɩ ñʋʋ yabʋ lɛ, mansɩnɩ-ŋ.”
Ɩnɩɩ camɩyɛ se: lɛɛlɛɛyɔ lɛ Ɛsɔ ɖeu labʋ alɩwaatʋ. Lɛɛlɛɛyɔ ɛyakɩ ɛyaa ñʋʋ. 3 Ɖɩcaɣ se nɔɔyʋ ɛtaapɩzɩ ɛkpɛzɩnɩ-ɖʋ tʋmɩyɛ nɖɩ ɖɩlakɩ yɔ ɖɩ-yɔɔ. Pʋ-yɔɔ ɖɩñakɩ pana se nɔɔyʋ ɛtaatɔlɩ Ɛsɔ nʋmɔʋ taa. 4 Ɛlɛ, ɖɩtɩŋnɩ ɛzɩma mbʋ ɖɩɖɔkʋʋ ɖa-tɩ siŋŋ kʋñɔmɩŋ nɛ kɛtɛɖaɣ nɛ nɩɣzʋʋ pa-taa yɔ pʋ-yɔɔ nɛ ɖɩwɩlɩ se ɖɩkɛ Ɛsɔ tʋmlaɖaa. 5 Pamabɩ-ɖʋ nɛ paɖʋ-ɖʋ salaka nɛ palɩzɩ ɖɔ-yɔɔ ñaɖʋʋ. Ɖɩlabɩ tʋma sɩm yɔɔ sɩm yɔɔ: nabʋyʋ taa, ɖitoɖoo, ɖɩtɔtɔɔ pʋyʋ ɖɔɖɔ. 6 Ɖɔɖɔ lɛ, ɖɩtɩŋɩɣnɩ ɖa-cɩɖɩcɩɖɩ wɛtʋ nɛ ɖɔ-lɔŋsɩnɖɛ nɛ ɖa-tɩ ɖɔkʋʋ nɛ ɖa-camɩyɛ lakasɩ nɛ Ɛsɔ Kalɩzaɣ nɛ ɖɔ-sɔɔlɩm siŋŋ 7 nɛ toovenim tɔm susuu nɛ Ɛsɔ ɖoŋ pɔ-yɔɔ nɛ ɖɩwɩlɩ se ɖɩkɛ Ɛsɔ tʋmlaɖaa. Ɖɩkpakɩɣ mbʋ pʋtʋʋzaa yɔ ɖɩɖɔkɩ nɛ ɖɩlakɩnɩ you ɛzɩ you wondu ndʋ pɔɖɔkʋʋ nɩmɩyɛ nɛ nɩwaŋ pa-taa yɔ. 8 Nabɛyɛ ɖʋʋ-ɖʋ hɩɖɛ nɛ lɛlaa ñaɖʋʋ-ɖʋ fɛyɛ. Nabɛyɛ saŋ-ɖʋ nɛ lɛlaa ñatʋʋ-ɖʋ. Pakpakɩɣ-ɖʋ ɛzɩ cɛtɩyaa yɔ, ŋgʋ toovenim ɖɩyɔɔdʋʋ. 9 Palakɩ ɛzɩ paasɩŋ-ɖʋ yɔ, ŋgʋ pasɩm-ɖʋ camɩyɛ. Pakpakɩɣ-ɖʋ ɛzɩ sɩɖaa yɔ, ŋgʋ ɖɩwɛ wezuu ɛzɩ ɩnaɣʋ yɔ. Pɔhɔŋ ɖa-nɩŋgbaaŋ, ɛlɛ, paakʋʋ-ɖʋ. 10 Papɩsɩɣ ɖɔ-hɔ, ɛlɛ, ɖɩwɛ laŋhʋlʋmɩyɛ taa paa ɖooye. Ɖɩwɛ ɛzɩ kʋñɔndɩnaa yɔ, ɛlɛ, ɖiyeki nɛ ɛyaa sakɩyɛ hikiɣ pa-tɩ Ɛsɔ nʋmɔʋ taa. Ɖɩwɛ ɛzɩ mɛnfɛyɩpʋyʋwaa yɔ, ŋgʋ ɖɩwɛnɩ pɩtɩŋa payɩ.
11 Taabalaa Kɔrɛntɩ ñɩma mɩ, ɖiheyi-mɩ mbʋ pʋwɛ ɖa-taa yɔ kpayɩ. Ɖɩsɔɔlɩ-mɩ siŋŋ. 12 Ɖitekizi se ɖɩɩsɔɔlʋʋ-mɩ, ɛlɛ, mikizini se ɩɩsɔɔlʋʋ-ɖʋ. 13 Pʋ-yɔɔ mɔyɔɔdʋʋnɩ-mɩ ɛzɩ men-piya yɔ: ɩsɔɔlɩ-ɖʋ ɛzɩ ɖɩsɔɔlʋʋ-mɩ yɔ.
Pɔɔlɩ paɣʋ Kɔrɛntɩ ñɩma yɔ
14 Mɩ nɛ mba paañaŋ Krɩstʋ yɔ, ɩtaakpɛndɩ. Mbʋ pʋyɔɔ yɔ, ɛzɩma mbʋ pʋtʋʋzaa yɔ nɛ mbʋ pɩtatʋʋzɩ yɔ pɩpɩzɩɣ pɩkpɛndɩ? Ɛzɩma ñalɩmɩyɛ nɛ cɩkpɛndʋʋ papɩzɩɣ pɛkpɛndɩ? 15 Ɛzɩma Krɩstʋ nɛ Eleeu papɩzɩɣ panɩnɩ ɖama? Yaa ɛbɛ Krɩstʋ tʋ nɛ weyi ɛtɛkɛ Krɩstʋ tʋ yɔ papɩzɩɣ pakaa? 16 Ɛbɛ Ɛsɔ ɖɩɣa nɛ kumola pakawa? Ŋgʋ, ɖɩkɛ Ɛsɔ wezuu tʋ ɖɩɣa. Pʋwɛ ɛzɩ Ɛsɔ yɔɔdʋʋ se:
“Mɛwɛɣ pɔ-cɔlɔ nɛ ma nɛ wɛ ɖɩɖɔ.
Mɛnkɛɣ pɛ-Ɛsɔ nɛ pɛkɛ mɛ-ɛyaa” yɔ.
17 Pamawa ɖɔɖɔ se:
“Kɩpaɣlʋ tɔŋ se ɩlɩɩ azaɣa mba pa-taa nɛ iyebi-wɛ.
Ɩtaatukuni azuluma pʋyʋ
nɛ piyele mamʋ-mɩ.
18 Mɔnkɔŋ kɛʋ mɩ-Caa nɛ
mɩkɛ man-pɩyalaa nɛ mɛn-pɛlaa.
Kɩpaɣlʋ Ɖoŋ Tɩŋa Tʋ yɔɔdɩnɩ mbʋ.”