Acɛyɛ tɔm Kɔrɛntɩ Yesu ɛgbɛyɛ taa
5
1 Pɔyɔɔdʋʋ paa le se mɩ-taa nabɛyɛ lakɩ hayitu. Halɩ paanaɣ wɛtʋ ndʋ mba paañaŋ Krɩstʋ yɔ pɛ-hɛkʋ taa. Pɔyɔɔdʋʋ se mɩ-taa lɛlʋ wɛɛ ɛsʋʋnɩ ɛ-caa halʋ. 2 Pɩtasɩ ɖɔɖɔ lɛ, ɩwɛɛ ɩkpazɩɣ mɩ-tɩ. Ŋgʋ, pɩɩwɛɛ se mɩ-ɛza ɛñɩŋ nɛ ɩɖɔɔnɩ weyi ɛlabɩ lakasɩ nzɩ yɔ mɩ-ɛgbɛyɛ taa. 3 Ma lɛ, mɛnfɛyɩ mɩ-cɔlɔ, ɛlɛ, mɛwɛ mɩ-cɔlɔ ma-lɩmaɣza taa. Pʋ-yɔɔ mɛntɛm weyi ɛlabɩ ɛzaɣtʋ ndʋ yɔ ɛ-tɔm kʋʋ ɛzɩ maawɛɛ mɩ-cɔlɔ peeye yɔ. 4 Alɩwaatʋ ndʋ ikpeɣliɣ tɔm ndʋ tɩ-yɔɔ nɛ mɛwɛ mɩ-cɔlɔ ma-lɩmaɣza taa yɔ, Kɩpaɣlʋ Yesu ɖoŋ wɛɣ ɖɔ-cɔlɔ. 5 Peeye ɖɩɖʋzʋʋ pʋdʋ Satanɩ nesi taa nɛ ɛlɛ nuuti e-tomnaɣ nɛ Ɛsɔ ya ɛ-Kalɩzaɣ ñʋʋ kɩyakʋ ŋgʋ Kɩpaɣlʋ hʋʋnɩ ɛyaa tɔm yɔ.
6 Pɩfɛyɩ ɖeu se ɩkpazɩ mɩ-tɩ. Ɩtatɩlɩ se potuu eduuye se: “Sɔsɔɔna pazɩ yekina nɛ somtu huu yaa we?” 7 Pʋwɛɛ se ɩlɩzɩ kɩwɛɛkɩm mbʋ pʋwɛ mɩ-hɛkʋ taa yɔ, mbʋ pʋyɔɔ yɔ, pʋwɛ ɛzɩ sɔsɔɔna yɔ. Peeye ɩwɛɣ cɩɖɩcɩɖɩ ɛzɩ somtu ndʋ tɩ-taa fɛyɩ sɔsɔɔna yɔ. Toovenim lɛ, ɩtɛm wɛʋ mbʋ. Mbʋ pʋyɔɔ yɔ, Krɩstʋ sɩbɩ ɖɔ-yɔɔ. Ɛwɛ ɛzɩ heɣa ŋga Yuda ñɩma kʋʋ se pɔtɔɔnɩ po-Yomiye Taa Lɩʋ *Kazandʋ. 8 Pʋ-yɔɔ lɛ, ɖɩtɔɔ ɖa-kazandʋ ndʋ. Ɛlɛ, pʋwɛɛ se ɖɩtɔɔ-tʋ nɛ sɔsɔɔna fɛyɩ tindine. Pʋ-tɔbʋʋ se ɖɩwɛɛ cɩɖɩcɩɖɩ nɛ ɖɩkɛ toovenim tɩnaa. Ɖiyele kɩwɛɛkɩm nɛ hayitu mba ɖɩlakaɣ yɔ, mbʋ pʋyɔɔ yɔ, pɛwɛ ɛzɩ sɔsɔɔna yɔ.
9 Takayaɣ ŋga maama-mɩ yɔ, maaheyi-mɩ ka-taa se mɩ nɛ hayitu laɖaa ɩtaaɖɔ. 10 Mɔyɔɔdʋʋ mbʋ yɔ, pɩtatɩɩkɛʋ mba pɛfɛyɩ mɩ-ɛgbɛyɛ taa yɔ, pɔ-tɔm mɔyɔɔdʋʋ. Mbʋ pʋyɔɔ yɔ, ye nɔɔyʋ ɛɛcaɣ se ɛ nɛ hayitu laɖaa yaa kujoŋjoŋ tɩnaa yaa mɩlaa yaa sɩɩnaa layaa mba pɛwɛ kedeŋa yɔɔ cɩnɛ yɔ pɛwɛɛ yɔ, pʋwɛɛ se ɛkʋyɩ kedeŋa yɔɔ cɩnɛ kpem. 11 Mba pɛwɛ mɩ-ɛgbɛyɛ taa yɔ, mba mɔyɔɔdʋʋ. Ye nɔɔyʋ ɛtɔm se ɛkɛ Krɩstʋ ɛgbɛyɛ taa tʋ nɛ ɛlakɩ hayitu yaa kujoŋjoŋ yaa ɛlaɣ sɩɩnaa yaa ɛtʋʋ ɛyaa yaa ɛkpaŋɩɣ sʋlʋm yaa ɛmɩlɩɣ yɔ, mɩ nɛ pɩtɛ ɛyʋ ɩtaaɖɔ, paa tɔɔnaɣ yɔ, ɩtaakpɛndɩ. 12 Pɩtɛkɛ ma pʋmʋnaa se mahʋnɩ mba pɛtɛkɛ Yesu ɛgbɛyɛ taa ñɩma yɔ. Ɛlɛ, mba pɛkɛ ɖɩ-taa ñɩma yɔ pʋwɛɛ se ɖɩhʋna. 13 Ɛsɔ kɔŋna hʋnaʋ mba pɛtɛkɛ ɖɩ-taa ñɩma yɔ. Pʋ-yɔɔ lɛ, ɩla ɛzɩ pamaʋ Ɛsɔtɔm Takayaɣ taa se: “Ɩɖɔɔnɩ ɛzaɣʋ mɩ-hɛkʋ taa yɔ.”