Krɩstʋ *tiyiyaa tɔm
4
1 Pʋwɛɛ se ɛyaa ɛtɩlɩ se Krɩstʋ *tiyiyaa ɖa, ɖɩkɛ ɛ-tʋmlaɖaa. Ɛsɔ ɖʋzɩ e-toovenim mbʋ pɩɩwɛ mɛsaɣ tɛɛ yɔ ɖe-nesi taa se ɖɩwɩlɩ ɛyaa. 2 Mbʋ pʋpɔzʋʋ weyi paɖʋzɩ e-nesi taa pʋyʋ yɔ lɛ se: ɛla mbʋ pʋmʋnaa yɔ. 3 Ma lɛ, ye ɩmaɣzɩɣ se malabɩ mbʋ pʋmʋnaa yɔ yaa mbʋ pɩtamʋna yɔ yɔ, pɩtana-m nɛ pʋyʋ. Paa lɛlaa ɛtɔm se malabɩ mbʋ pʋmʋnaa yɔ yaa mbʋ pɩtamʋna yɔ yɔ, pɩtana-m nɛ pʋyʋ. Halɩ ma-maɣmaɣ maatɔŋ ma-ñɩndʋ se pʋyʋ. 4 Mantatɩlɩ ɛzaɣtʋ ndʋ tɩwɛ mɔ-yɔɔ yɔ. Ɛlɛ, pɩɩwɩlɩɣ se mantala ɛzaɣtʋ natʋyʋ. Kɩpaɣlʋ hʋʋnɩ mɔn-tɔm. 5 Pʋ-yɔɔ lɛ, ɩtaahʋnɩ ɖama nɛ pʋcɔ alɩwaatʋ ndʋ Ɛsɔ ɖʋwa se Kɩpaɣlʋ kɔŋ yɔ, tɩtalɩ. Ɛnʋ lɩzɩɣnɩ mbʋ pʋwɛ cɩkpɛndʋʋ taa yɔ nɛ ɛwɩlɩ. Ɛnʋ kuluuni ɖɔɖɔ mbʋ ɛyaa maɣzɩɣ pa-taa yɔ pʋ-yɔɔ. Peeye Ɛsɔ saŋ paa weyi mbʋ ɛlaba yɔ pʋ-yɔɔ.
6 Taabalaa, mɩ-yɔɔ mankpaɣ tɔm ndʋ mɔyɔɔdaa yɔ nɛ mɛnkɛdɩnɩ ma nɛ Apoloosi. Ɖɔ-yɔɔ pɩtɩŋɩɣna nɛ ɩtɩlɩ se pʋmʋnaa se ɩtaala nɛ pɩɖɛɛ mbʋ pama Ɛsɔtɔm Takayaɣ taa yɔ pʋ-yɔɔ. Pɩfɛyɩ se ɩtɩnɩ nabɛyɛ yɔɔ nɛ ɩkpazɩ mɩ-tɩ nɛ iniɣzi lɛlaa. 7 Mbʋ pʋyɔɔ yɔ, aheyi-ŋ se ŋkɩlɩ lɛlaa? Pɩtɛkɛ Ɛsɔ hanɩ-ŋ mbʋ pɩtɩŋa payɩ ŋwɛna yɔ yaa we? Ye toovenim se ɛnʋ ɛhanɩ-ŋ-pʋ lɛ, pɩlabɩ ɛzɩma ŋkʋndʋʋnɩ-pʋ ɛzɩ pataha-ŋ-pʋ kɩhaʋ yɔ?
8 Ei! Naze mɩtɛm mi-ɖeɖe hiɣu! Ɩtɛm pɩsʋʋ ñɩm tɩnaa! Naze mɩpɩsɩ awiya nɛ piyebi-ɖʋ! Toovenim lɛ, ɖe-liu kɛwɛɛ kpem se ɩtɔɔ kewiyaɣ nɛ ɖɩkɔɔ ɖa nɛ mɩ ɖɩtɔɔ-kɛ. 9 Mbʋ pʋyɔɔ yɔ, pɩlakɩ-m ɛzɩ ɖa Krɩstʋ *tiyiyaa lɛ, lone nɖɩ pʋtɔyɩnɩ-ɖɩ yɔ, ɖɩ-taa Ɛsɔ sɩ-ɖʋ yɔ. Ɖɩwɛ ɛzɩ mba pakʋ pɔ-tɔm nɛ pʋpɔzʋʋ se pakʋ-wɛ yɔ. Pelem-ɖʋ ɛyaa nɛ Ɛsɔ *tiyiyaa patɩŋa payɩ pɛ-ɛsɩndaa. 10 Ei! Ɖɛkɛ kɩmɛlɛmɩŋ Krɩstʋ yɔɔ nɛ mɩ mɩkɛ lɔŋsɩnɖaa mɩ nɛ ɩ mɩ-kpɛndʋʋ taa! Ɖɛkɛ ajamaa nɛ mɩkɛ ɖoŋ tɩnaa! Patakpaɣ-ɖa payaa pʋyʋ nɛ piyele pasaŋ-mɩ! 11 Toovenim lɛ, halɩ nɛ sɔnɔ, ñɔɔsɩ wɛɛ sɩwɩɣ-ɖʋ nɛ lɔkɔtʋ ñɔɖɔkɩ-ɖʋ. Ɖɩfɛyɩnɩ wondu se ɖisuu. Pamakɩ-ɖʋ nɛ ɖɩwɛɛ ɖɩcɔʋ paa le. 12 Ɖɩkʋʋ ɖa-tɩ nɛ tʋmɩyɛ se ɖihiɣ ɖɩtɔɔ. Ŋgʋ, alɩwaatʋ ndʋ ɛyaa tʋʋ-ɖʋ yɔ, ɖɩwazɩɣ pɔ-yɔɔ. Ɖɩɖɔkʋʋ ɖa-tɩ ɖɔɖɔ alɩwaatʋ ndʋ pɛwɛɣ ɖa-wayɩ kaŋ kaŋ yɔ. 13 Ye ɛyaa ɛyɔɔdʋʋ-ɖʋ tɔm ɛzaɣtʋ yɔ, ɖicosuu-wɛ camɩyɛ. Halɩ nɛ sɔnɔ, ɛyaa kpakɩɣ-ɖʋ ɛzɩ kedeŋa yɔɔ azuluma nɛ ñɩtʋ ndʋ pahazɩɣ yɔ.
14 Maamaɣ-mɩ tɔm tʋnɛ se manɖʋ-mɩ fɛyɛ. Ɛlɛ, mamaɣ-mɩ-tʋ se mansɩɣzɩ-mɩ lɔŋ ɛzɩ men-piya nzɩ mɔnsɔɔlaa siŋŋ yɔ. 15 Mbʋ pʋyɔɔ yɔ, paa ɩɩwɛnɩ wɩlɩyaa sakɩyɛ nɛ pawɩlɩɣ-mɩ Krɩstʋ tɔm yɔ, ɩɩpɩzɩɣ ɩwɛnɩ caanaa sakɩyɛ. Mbʋ pʋyɔɔ yɔ, mɔnkɔmnɩ monsusi-mɩ Krɩstʋ Yesu Laŋhɛzɩyɛ Tɔm nɛ pɩtɩŋnɩ pʋ-yɔɔ nɛ manpɩsɩ ɛzɩ mɩ-caa yɔ. 16 Pʋ-yɔɔ mentendiɣ-mɩ se ɩtɩŋ ma-nʋmɔʋ. 17 Mbʋ yebina nɛ mentiyini-mɩ man-pɩɣa*fa* kʋsɔɔlaɣ Timootee weyi ɛkɛ ɛyʋ toovenim tʋ Kɩpaɣlʋ ɛsɩndaa yɔ. Ɛnʋ tɔzʋʋnɩ-mɩ ɛzɩma mbʋ mɔnɖɔŋ Krɩstʋ nʋmɔʋ taa me-wezuu caɣʋ taa yɔ, nɛ ɛzɩma mbʋ mawɩlɩɣ paa le Yesu agbaa tɩŋa payɩ taa yɔ. \fm a \fr (4.17) \fk Man-pɩɣa: \f pɩtɛkɛ Pɔɔlɩ lʋlʋnɩ Timootee, ɛlɛ, ɛnʋ yebina nɛ ɛwɛnɩ lidaʋ yɔɔ ɛya-ɩ mbʋ. Ɩcɔnɩ 1 Tim 1.1-2.
18 Mɩ-taa lɛlaa kpazaɣ pa-tɩ, mbʋ pʋyɔɔ yɔ, pɩlakaɣ-wɛ se maatasɩɣ kɔm mɩ-tɛ. 19 Ɛlɛ, ye Kɩpaɣlʋ etisaa yɔ, mɔnkɔŋ mɩ-tɛ alɩwaatʋ tʋnɛ tɩ-taa nɛ mana se tɩkpazɩyaa mba pɔyɔɔdʋʋ yem yaa pɛwɛnɩ ɖoŋ nɩɩyɩ. 20 Mbʋ pʋyɔɔ yɔ, pɩtɛkɛ ɛyaa yɔɔdaɣ panaɣnɩ ɛzɩma mbʋ Ɛsɔ tɔkɩ e-Kewiyaɣ yɔ. Ɛlɛ, pa-lakasɩ panaɣna. 21 Ɛbɛ mi-liu wɛɛ: mɔnkɔɔ mɩ-tɛ nɛ ɛgbazɩyɛ yaa mɔnkɔmnɩ sɔɔlɩm nɛ ma nɛ mɩ pʋwɛɛ leleŋ?