Pɔɔlɩ hʋʋ ɛ-tɔm wiyaʋ Agriipaa ɛsɩndaa yɔ
26
1 Fɛstuusi tɛm yɔɔdʋʋ mbʋ lɛ, Agriipaa heyi Pɔɔlɩ se: “Lɛɛlɛɛyɔ, paha-ŋ nʋmɔʋ, yɔɔdɩ ñɔ-tɔm lɛ.” Peeye ɛlɛ kpazɩ nesi nɛ ɛpazɩ yɔɔdʋʋ se: 2 “Wiyaʋ Agriipaa! Sɔnɔ pɩlabɩ-m leleŋ pɩŋŋ se mɔyɔɔdʋʋ kʋyʋʋ mbʋ pɩtɩŋa payɩ Yuda ñɩma kʋyʋʋ mɔ-yɔɔ yɔ pʋ-tɔm ñɛ-ɛsɩndaa. 3 Mbʋ pʋyɔɔ yɔ, ŋsɩm Yuda ñɩma sɔnzɩ tɩŋa siŋŋ nɛ mbʋ pʋ-tɔm pɔyɔɔdʋʋ yɔ. Pʋ-yɔɔ lɛ, monkuluu-ŋ hulaɣ se ŋɖɔkɩ ñɔ-hɔyɛ nɛ ŋwelesi mɔn-tɔm.
4 Yuda ñɩma tɩŋa sɩm mbʋ mɛnkɛ ɖooo me-evebutu taa yɔ. Pasɩm ɖɔɖɔ ɛzɩma mbʋ maacaɣ wezuu Yeruusalɛm mɛ-ɛjaɖɛ taa ñɩma hɛkʋ taa yɔ. 5 Pasɩm-m ɖooo lɔŋ, ye petisiɣ yɔ, papɩzɩɣ palɩzɩ aseɣɖe se maakɛ Farɩsɩ ñɩma ɛgbɛyɛ taa tʋ. Maaɖɔm ɖɩ-taa sɔnzɩ yɔɔ. Nzɩ kɩlɩnɩ kaɖɛ ɖɛ-Ɛsɔ sam taa. 6 Lɛɛlɛɛyɔ, pahʋʋnɩ-m. Mbʋ pʋyɔɔ yɔ, mantaɣ liu mbʋ Ɛsɔ heyi ɖɔ-cɔzɔnaa se ɛlakɩ yɔ. 7 Ɖɛ-ɛjaɖɛ taa cejewee hiu nɛ naalɛ taa ñɩma taɣ liu se panaɣ mbʋ Ɛsɔ heyi ɖɔ-cɔzɔnaa se ɛlakɩ yɔ. Pʋ-yɔɔ pɛwɛɛ poluŋuu Ɛsɔ tɛɛ wɩsɩ nɛ ɖoo. Wiyaʋ! Liu taʋ mbʋ, pʋ-yɔɔ Yuda ñɩma kʋyʋʋ mɔ-yɔɔ. 8 Pɩlabɩ ɛzɩma ɩmaɣzɩɣ se Ɛsɔ ɛɛpɩzɩɣ efezi sɩɖaa yɔ?
9 Ma lɛ, maamaɣzaa se manɖɩkɩ nʋmɔŋ tɩŋa payɩ nɛ nɔɔyʋ ɛtaatasɩ yaʋ Nazarɛɛtɩ tʋ Yesu hɩɖɛ. 10 Mbʋ malabɩ Yeruusalɛm nɛ *cɔjɔnaa *sɔsaa ha-m nʋmɔʋ nɛ ma-maɣmaɣ mankpa Yesu ñɩma sakɩyɛ nɛ manɖʋ-wɛ salaka. Pɔtɔm se pakʋʋ-wɛ lɛ, mentisi. 11 Manpam hɔm pa-nɩŋgbaaŋ Yuda ñɩma Ɛsɔ ɖɩsɛyɛ tɩŋa payɩ taa. Malakaɣ-wɛ mbʋ se pɔyɔɔdɩ ɛzaɣtʋ tɔm pe-lidaʋ wɛnaʋ yɔɔ. Man-pana kakpanɩ-wɛ pɩtɩɩfɛyɩ nɛ mɛwɛɛ pa-wayɩ kaŋ kaŋ mbʋ nɛ halɩ pɩkpɛndɩnɩ ajɛɛ lɛɛna tɛtʋ taa.”
Pɔɔlɩ kɛdʋʋ ɛ-wɛtʋ lɛɣzʋʋ tɔm yɔ
(Tʋma 9.1-19; 22.6-16)
12 Pɔɔlɩ tasɩ yɔɔdʋʋ se: “Pʋ-yɔɔ *cɔjɔnaa *sɔsaa kɛcɛlɩ-m takayaɣ nɛ paha-m nʋmɔʋ nakʋyʋ wiye se mowolo Damaasɩ. 13 Wiyaʋ! Mɛwɛ nʋmɔʋ ŋgʋ kɩ-taa nɛ pʋkɔɔ ɛzɩ wɩsɩ siɣu yɔ lɛ, mana ñalɩmɩyɛ naɖɩyɛ lɩnɩ ɛsɔdaa yem nɛ ɖɩñalɩ ma nɛ man-taabalaa ɖɔ-yɔɔ ñammm. Ñalɩmɩyɛ nɖɩ, ɖɩɩkɩlɩ wɩsɩ ñalɩmɩyɛ ɖoŋ. 14 Peeye ɖatɩŋa payɩ ɖɩtɔlɩ tataa nɛ manɩɣ pʋyɔɔdʋʋnɩ-m nɛ ɖɛ-tɛ Ebree taa se: ‘Sɔɔlɩ! Sɔɔlɩ! Pɩlabɩ ɛzɩma nɛ ŋwɛɛ ma-wayɩ kaŋ kaŋ nɛ ŋɖʋʋ ña-tɩ kʋñɔŋ nɛ ña-nɩŋgbaaŋ ɖoŋ mbʋ?’ 15 Peeye mɔnpɔzaa se: ‘Kɩpaɣlʋ! Ña anɩ?’ Ɛlɛ cosi-m se: ‘Ma Yesu weyi ŋwɛ ɛ-wayɩ kaŋ kaŋ yɔ. 16 Ɛlɛ, kʋyɩ ŋsɩŋ ña-nasɩ taa. Mbʋ pʋyɔɔ yɔ, malɩzɩ man-tɩ mawɩlɩ-ŋ se ŋpɩsɩ man-tʋmlaɖʋ nɛ ŋcɔɔ ŋheyi lɛlaa ɛzɩma mbʋ ŋna-m sɔnɔ yɔ nɛ ŋkɛdɩ-wɛ mbʋ mbʋ mantasɩɣ-ŋ wɩlʋʋ yɔ. 17 Ñɛ-tɛ Yuda ñɩma nɛ mba pɛtɛkɛ Yuda ñɩma yɔ pa-taa malɩzɩ-ŋ nɛ mentiyi-ŋ mba pɛtɛkɛ Yuda ñɩma yɔ pɔ-cɔlɔ. 18 Mentiyiɣ-ŋ se ŋwolo ŋkuli pɛ-ɛza nɛ ŋlɩzɩ-wɛ cɩkpɛndʋʋ taa nɛ ŋwoni-wɛ ñalɩmɩyɛ taa. Lɩzɩ-wɛ ɖɔɖɔ *Kañadʋ Satanɩ nesi taa nɛ ŋwoni-wɛ Ɛsɔ cɔlɔ. Ye pɛwɛnɩ lidaʋ mɔ-yɔɔ lɛ, Ɛsɔ kpeɣ-wɛ pa-kɩwɛɛkɩm nɛ ɛha-wɛ ñɩm mbʋ ɛsɩwa se ɛhaɣ ɛ-ñɩma yɔ.’ ”
Pɔɔlɩ kɛdʋʋ ɛ-tʋmɩyɛ labʋ tɔm yɔ
19 “Pʋ-yɔɔ lɛ, wiyaʋ Agriipaa! Mentekizi mbʋ Kɩpaɣlʋ wɩlɩ-m nɛ ɛsɔdaa yɔ. 20 Ɛlɛ, Damaasɩ ñɩma manpazɩnɩ Ɛsɔtɔm susuu. Pʋwayɩ lɛ, monsusi-tʋ ɖɔɖɔ Yeruusalɛm ñɩma nɛ Yudee egeetiye taa ñɩma tɩŋa nɛ ajɛɛ lɛɛna taa ñɩma. Meheyi-wɛ se pɛlɛɣzɩ wɛtʋ nɛ papɩsɩnɩ Ɛsɔ yɔɔ nɛ pala mbʋ pɩwɩlɩɣ se toovenim pɛlɛɣzɩ wɛtʋ yɔ. 21 Tɔm tʋnɛ tɩ-yɔɔ Yuda ñɩma kpa-m Ɛsɔ ɖɩɣa taa se pakʋʋ-m. 22 Ɛlɛ, Ɛsɔ huuzi mɔ-yɔɔ nɛ pʋkɔɔ pɩtalɩnɩ sɔnɔ nɛ mɛwɛɛ malɩzɩɣ sɔsaa nɛ piya patɩŋa payɩ tɔm ndʋ lɔɔyɩsɩ tɩnaa nɛ *Mooyiizi pɔyɔɔdaa se tɩkɔŋ labʋ kpem yɔ tɩ-aseɣɖe. Maayɔɔdʋʋ natʋyʋ nɛ pɩtasɩnɩ-tʋ. 23 Ndʋ lɛ se: ‘*Weyi Ɛsɔ Lɩzaa Yɔ, ɛkɔŋ siziŋ nɩʋ nɛ ɛsɩ. Ɛnʋ calɩɣnɩ fem nɛ ɛlɩnɩ sɩɖaa taa nɛ ɛkɛdɩ Yuda ñɩma nɛ mba pɛtɛkɛ Yuda ñɩma yɔ ñalɩmɩyɛ tɔm.’ ”
Pɔɔlɩ heyuu Agriipaa se ɛlɛ ɛwɛnɩ lidaʋ Yesu yɔɔ yɔ
24 Pɔɔlɩ hʋwaɣ mbʋ lɛ, wiyaʋ sɔsɔ Fɛstuusi holini-i se: “Pɔɔlɩ ŋsʋ kpaaŋ! Ŋkɩlɩ kpɛlɩkʋʋ sɔsɔm nɛ pʋsʋsɩ-ŋ kpaaŋ!” 25 Peeye ɛlɛ cosi-i se: “Ɖajaa! Mantasʋʋ kpaaŋ nakʋyʋ, ɛlɛ, tɔm ndʋ mɔyɔɔdʋʋ yɔ, tɩkɛ tɔm kɩbandʋ nɛ toovenim tɔm siŋŋ. 26 Wiyaʋ Agriipaa kɛtɛm nɩʋ mbʋ pɩtɩŋa pɩlaba yɔ. Pʋ-yɔɔ lɛ, manpɩzɩɣ mɔyɔɔdɩ ɛ-ɛsɩndaa yem faaa. Manawa se ɛnɩ tɔm ndʋ tɩtɩŋa payɩ. Mbʋ pʋyɔɔ yɔ, tɩtala mɛsaɣ tɛɛ kʋlɔmʋʋ nakʋyʋ taa. 27 Wiyaʋ Agriipaa! Ŋtisiɣ tɔm ndʋ lɔɔyɩsɩ tɩnaa yɔɔdaa yɔ yaa we? Manawa se ŋtisaa!” 28 Peeye Agriipaa pɩsɩnɩ-ɩ se: “Ŋcaɣ se manpɩsɩ Krɩstʋ tʋ lɛɛlɛɛyɔ lɛɛlɛɛyɔ yaa we?” 29 Pɔɔlɩ cosi-i se: “Paa lɛɛlɛɛyɔ lɛɛlɛɛyɔ yaa ɛsɩmtaa yɔ, mentendiɣ Ɛsɔ se ña nɛ mba ɩwɛ cɩnɛ nɛ iwelesiɣ mɔn-tɔm sɔnɔ yɔ, mɩtŋa payɩ ɩpɩsɩ ɖɔɖɔ ɛzɩ ma yɔ nɛ pɩsɛɣ yoŋgbasɩ sɩnɛ si-ɖeke!”
30 Peeye wiyaʋ Agriipaa nɛ ɛ-halʋ Bereniisi nɛ wiyaʋ sɔsɔ Fɛstuusi nɛ mba paawɛ peeye yɔ, pakʋyaa 31 pɛkɛzɩ pa-tɩ kɩjaʋ nɛ pɔyɔɔdʋʋ pa-taa pe-ɖeke se: “Abalʋ ɛnɛ, ɛtala kɩwɛɛkɩm mbʋ pʋpɔzʋʋ se pakʋ-ɩ yaa paɖʋ-ɩ salaka yɔ.” 32 Peeye Agriipaa heyi Fɛstuusi se: “Ye abalʋ ɛnɛ ɛtaapɔzɩ se patanɩ-ɩ Room wiyaʋ sɔsɔ cɔlɔ yɔ, paayebi-i!”