Etiyɛɛnɩ yɔɔdʋʋ yɔ
7
1 Pɔyɔɔdɩ mbʋ lɛ, cɔjɔnaa ñʋʋ tʋ pɔzɩ Etiyɛɛnɩ se: “Toovenim mbʋ pɩlaba?” 2 Ɛlɛ cosi-i se: “Man-caanaa nɛ man-taabalaa mɩ! Ɩɖʋ nɩŋgbaaŋ nɛ ɩnɩɩ. Ɛsɔ koboyaɣ tʋ kalɩzɩ ɛ-tɩ nɛ ɛwɩlɩ ɖɔ-cɔzɔ Abraham alɩwaatʋ ndʋ ɛɛwɛ Mezoopotamii yɔ nɛ pʋcɔ ɛlɛ kʋyɩ ewolo Haraɣ. 3 Eeheyi-i se: ‘Kʋyɩ ñɛ-ɛjaɖɛ taa nɛ ŋyele ña-ñɩma nɛ ŋwolo ɛjaɖɛ nɖɩ mawɩlɩɣ-ŋ yɔ ɖɩ-taa.’ 4 Peeye Abraham kʋyɩ Calidee ɛjaɖɛ taa nɛ ewolo ɛcaɣ Haraɣ. Ɛ-caa sɩm wayɩ Ɛsɔ kʋsɩ-ɩ Haraɣ peeye nɛ ɛkɔnɩ-ɩ ɖɛ-tɛ Izrɛɛlɩ cɩnɛ. 5 Ɛtaaha-ɩ paa tɛtʋ hɔɔlaɣ maɣmaɣ se esobi. Ɛlɛ, ɛɖʋwa se ɛhaɣ-ɩ ɛjaɖɛ ɖɩnɛ ɖɩtɩŋa payɩ nɛ ɛ-sɩm wayɩ lɛ, ɛ-sayɩnaa tɩɣyɩ-ɖɩ. Ŋgʋ, alɩwaatʋ ndʋ tɩ-taa lɛ, Abraham taawɛnɩ pɩɣa.
6 Tɔm ndʋ Ɛsɔ keheyi-i yɔ, ndʋ lɛ se: ‘Ña-sayɩnaa kɔŋ caɣʋ ɛjaɖɛ naɖɩyɛ taa, papɩsɩɣ-wɛ yomaa nɛ panazɩ-wɛ pɩnzɩ nasɩnaza. 7 Ɛlɛ, mɔnkɔŋ hɔm mba papɩsɩɣ ña-sayɩnaa mba yomaa yɔ pa-nɩŋgbaaŋ. Pʋwayɩ lɛ, ña-sayɩnaa mba, pakʋyʋʋ ɛjaɖɛ nɖɩ ɖɩ-taa nɛ papɩsɩ cɩnɛ nɛ poluŋ mɛn-tɛɛ.’ 8 Ɛsɔ kaha *Abraham *nɔɔ, *pɛlʋʋ sɔnzɩ wɩlɩɣnɩ se ɛha-ɩ-kɛ. Mbʋ labɩna nɛ ɛlʋlɩ ɛ-pɩyalʋ Izaakɩ lɛ, ɛpɛlɩ-ɩ kɩyakʋ lutozo ñɩŋgʋ wiye, Izaakɩ ñɛpɛlɩ ɛlɛ pɩyalʋ Yakɔɔbʋ mbʋ ɖɔɖɔ nɛ Yakɔɔbʋ ñɛpɛlɩ ɛ-pɩyalaa hiu nɛ naalɛ mba pɛkɛ *Izrɛɛlɩ ñɩma cɔzɔnaa yɔ.
9 Cɔzɔnaa mba palabɩnɩ ɛzɩsɛmɩyɛ pa-taa lɛlʋ weyi payaɣ se *Yozɛɛfʋ yɔ ɛ-yɔɔ nɛ pɛpɛdɩ-ɩ nɛ nabɛyɛ nɛ paba woni-i *Ejiptɩ nɛ papɩsɩ-ɩ yom. Ɛlɛ, Ɛsɔ taalɔ-ɩ kaʋ. 10 Ɛlɩzaɣ-ɩ ɛ-kʋñɔmɩŋ tɩŋa taa. Patanɩ-ɩ wiyaʋ sɔsɔ Faraɔɔ ɛsɩndaa lɛ, Ɛsɔ kʋɖʋm ɛnʋ eyele nɛ ɛlɛ laŋɩyɛ hɛnɩ ɛ-lɔŋsɩnɖɛ. Peeye ɛlɛ cɛlɩ-ɩ kewiyaɣ se ɛcɔnɩ Ejiptɩ ɛjaɖɛ yɔɔ nɛ pɩkpɛndɩnɩ ɛ-ɖɩɣa tɩŋa.
11 Alɩwaatʋ ndʋ tɩ-taa ñɔɔsɩ nasɩyɩ lɩ *Ejiptɩ nɛ *Kanaanɩ pa-ajɛɛ hɔɔlɩŋ tɩŋa. Sɩlɩwa lɛ, ɖɔ-cɔzɔnaa wɛɛ kʋñɔŋ sɔsɔʋ nakʋyʋ taa nɛ paanaɣ pʋyʋ se pɔtɔɔ. 12 Pɩkɛdaa lɛ, pa-caa Yakɔɔbʋ nɩɩ se tɔɔnaɣ wɛ Ejiptɩ. Pʋ-yɔɔ ɛkʋsɩ-wɛ nɛ etiyi-wɛ. 13 Etiyi-wɛ nabʋlɛ ɖeɖe lɛ, *Yozɛɛfʋ yele se ɛ-ɖalaa ɛsɩm-ɩ. Peeye wiyaʋ sɔsɔ Faraɔɔ ɛnʋ, ɛtɩlɩ Yozɛɛfʋ ñɩma. 14 Mbʋ hanɩ Yozɛɛfʋ waɖɛ nɛ etiyi se powolo pɔkɔnɩ ɛ-caa Yakɔɔbʋ nɛ ɛ-hɔʋ taa ñɩma tɩŋa. Paakpɛndɩ ɛyaa nɩɩnʋwa nɛ nɩɩlɛ nɛ kagbaanzɩ. 15 Pʋ-yɔɔ Yakɔɔbʋ wobi Ejiptɩ ɛcaɣ nɛ pʋkɔɔ pɩsɩnɩ ɛ-sɩm. Peeye ɖɔɖɔ ɖɔ-cɔzɔnaa sɩba. 16 Pasɩba lɛ, pepim-wɛ. Pʋwayɩ pakʋyaɣ peeye lɛ, pokuli pɔ-mɔɔ nɛ powoni Siicem nɛ pepi pɩlaʋ ŋgʋ Abraham kayabɩ Aamɔɔrɩ pɩyalaa cɔlɔ yɔ kɩ-taa.
17 Tɔm ndʋ Ɛsɔ kaɖʋwa nɛ eheyi Abraham yɔ, tɩ-alɩwaatʋ wɩzaa lɛ, ɖa-ñɩma mba paawɛ *Ejiptɩ yɔ, pɛtɛzɩɣ ɖɔʋ kʋɖɔʋ. 18 Tɩ-taa ɖɔɖɔ awiya sakɩyɛ kɔtɔɔ kewiyaɣ nɛ pɩɖɛɛ. Pʋwayɩ lɛ, wiyaʋ sɔsɔ lɛɛlʋ ñakpa kpelaɣ yɔɔ Ejiptɩ. Ɛlɛ, ɛtaatɩlɩ Yozɛɛfʋ. 19 Ɛnʋ kɛcɛtɩnɩ ɖɛ-tɛ ñɩma nɛ ɛnazɩ ɖɔ-cɔzɔnaa nɛ halɩ ɛcɛyɩ-wɛ se pɔlɔ pe-piya cikpesi nɛ sɩsɩ.
20 Alɩwaatʋ ndʋ tɩ-taa ɖɔɖɔ palʋlɩ pɩɣa ŋga payaɣ se *Mooyiizi yɔ, kaaɖe Ɛsɔ ɛsɩndaa pɩŋŋ. Ka-ñɩma kɔɖɔkɩ-kɛ fenasɩ naadozo nɛ pʋcɔ pɔlɔ-kɛ. 21 Pɔlɔ-kɛ lɛ, wiyaʋ sɔsɔ pɛlɛ hii-kɛ nɛ ɛɖɔkɩ-kɛ ɛzɩ ɛ-maɣmaɣ ɛ-pɩyalʋ yɔ. 22 Mbʋ hanɩ Mooyiizi waɖɛ nɛ ɛkpɛlɩkɩ mbʋ *Ejiptɩ ñɩma sɩma yɔ pɩtɩŋa payɩ nɛ ɛyɔɔdʋʋ tɔm nɛ ɛlakɩ tʋma nɛ abalɩtʋ.
23 Ɛkɔm ɛwɛnɩ pɩnzɩ nɩɩnaza lɛ, ɛɖʋ ɛ-taa se ewoki ɛna ɛ-tɛ Izrɛɛlɩ ñɩma. 24 Ewokaɣ lɛ, ɛna *Ejiptɩ tʋ nɔɔyʋ makaɣ Izrɛɛlɩ tʋ nɔɔyʋ. Peeye ɛtɩnɩ weyi pamakaɣ-ɩ yɔ ɛ-yɔɔ nɛ ɛma Ejiptɩ tʋ nɛ ɛlɛ sɩ. 25 *Mooyiizi kɛwɛ yem se ɛ-tɛ Izrɛɛlɩ ñɩma ɖiɣzinaa se ɛ-yɔɔ pɩtɩŋɩɣna nɛ Ɛsɔ lɩzɩ-wɛ yomiye taa. Naze lɛ, paba tanɩɩ pɩ-taa mbʋ.
26 Kifema lɛ, *Mooyiizi tasɩ katʋʋ *Izrɛɛlɩ ñɩma naalɛ nabɛyɛ, poyowaɣ. Peeye ewobi se eloluu-wɛ, ɛlɛ ɛpɔzɩ-wɛ se: ‘Man-taabalaa! Ɩkɛ ɛyaa kʋɖʋmaa lɛ, ɛbɛ laba nɛ ɩmakɩ ɖama mbʋ?’ 27 Ɛlɛ weyi ɛnazaɣ lɛlʋ yɔ, ɛpɩsɩ etuzi Mooyiizi nɛ ɛpɔzɩ-ɩ se: ‘Asɩ-ŋ wiyaʋ se ŋhʋʋ ɖɔ-tɔm? 28 Ŋcaɣ se ŋkʋ-m ɛzɩ ɖeɖe ŋkʋʋ *Ejiptɩ tʋ yɔ yaa we?’ 29 Ɛyɔɔdɩ mbʋ lɛ, Mooyiizi se nɛ ewolo ɛcaɣ Maadiyaɣ ɛjaɖɛ taa. Peeye ɛkɔm ɛwɛnɩ abalɩbiya naalɛ.
30 Ɛcaɣ peeye pɩnzɩ nɩɩnaza lɛ, nakʋyʋ wiye ewolo lakʋ taa Sinayii pʋʋ cɔlɔ nɛ Ɛsɔ *tiyiyu nɔɔyʋ lɩzɩ ɛ-tɩ nɛ hɔɖaɣ miŋ taa nɛ ɛwɩlɩ-ɩ. 31 Ɛna mbʋ lɛ, pɩlabɩ-ɩ piti. Ɛlɛ etuzi ɛ-tɩ pʋ-cɔlɔ se ɛcɔna. Peeye ɛnɩɣ Kɩpaɣlʋ yɔɔdʋʋnɩ-ɩ se: 32 ‘Ma lɛ ñɔ-cɔzɔnaa Ɛsɔ. Ma lɛ *Abraham nɛ Izaakɩ nɛ Yakɔɔbʋ pɛ-Ɛsɔ.’ *Mooyiizi nɩ mbʋ lɛ, sɔɔndʋ kpa-ɩ pɩŋŋ nɛ eseliɣ, halɩ ɛtacazɩ cɔnaʋ. 33 Ɛlɛ Kɩpaɣlʋ heyi-i se: ‘Ɖenɖe ŋsɩŋ mbʋ yɔ, pɩkɛ tɛtʋ kaɖɛ ñɩndʋ. Hɔzɩ ña-naataŋgbala. 34 Mana mɛ-ɛyaa mba pɛwɛ *Ejiptɩ yɔ pa-kʋñɔŋ nɛ manɩɩ pa-atɩma nɛ mentii se moholi-wɛ. Pʋ-yɔɔ lɛ, kɔɔ mentiyi-ŋ Ejiptɩ peeye.’
35 Mbʋ Ɛsɔ tiyi *Mooyiizi. Ŋgʋ, Izrɛɛlɩ ñɩma kekizi-i nɛ pɔpɔzɩ-ɩ se: ‘Asɩ-ŋ wiyaʋ se ŋhʋʋ ɖɔ-tɔm?’ Ɛlɛ, Ɛsɔ tiyi-i se ewolo ɛkɛ pe-wiyaʋ nɛ ɛlɩzɩ-wɛ yomiye taa. Ɛsɔ *tiyiyu weyi ɛɛlɩzɩ ɛ-tɩ nɛ hɔɖaɣ miŋ taa nɛ ɛwɩlɩ-ɩ yɔ, e-ɖoŋ yɔɔ ɛtɩŋnaa. 36 Mooyiizi ɛnʋ ɛlabɩnɩ Ɛsɔ hama lakasɩ nɛ ɛwɩlɩ kawɩlɩsɩ *Ejiptɩ ɛjaɖɛ taa nɛ ɛlɩzɩ Izrɛɛlɩ ñɩma yomiye taa. Ɛɛlabɩ-sɩ *Teŋgu Kɩsɛmʋʋ nɛ lakʋ pa-taa pɩnzɩ nɩɩnaza nzɩ pɔɖɔma yɔ. 37 Ɛnʋ ɖɔɖɔ heyini Izrɛɛlɩ ñɩma se: ‘Ɛsɔ kɔŋ-mɩ tiyinaʋ *lɔɔyaɣ tʋ nɔɔyʋ ɛzɩ ma yɔ, ɛkɛɣ mɩ-ñɩma taa nɔɔyʋ.’ 38 Ɛnʋ kɛwɛnɩ Izrɛɛlɩ ñɩma mba paakpeɣli lakʋ taa yɔ pɔ-cɔlɔ: ɛ nɛ ɖɔ-cɔzɔnaa nɛ Ɛsɔ tiyiyu weyi ɛyɔɔdaɣnɩ-ɩ nɛ Sinayii pʋʋ yɔɔ yɔ paawɛna. Ɛnʋ mʋnɩ wezuu tɔm nɛ ɛcɛlɩ-ɖʋ.
39 Ɛlɛ, ɖɔ-cɔzɔnaa taacaɣ se pañam-ɩ. Pekizaɣ ɛ-tɔm nɛ pañɩnɩɣ se papɩsɩ *Ejiptɩ ɛjaɖɛ taa. 40 Pʋ-yɔɔ peheyi *Aarɔɔnɩ se: ‘Ma-ɖʋ sɩʋ kpelisi nɛ sɩɖɛɛ-ɖʋ nɔɔ. Mbʋ pʋyɔɔ yɔ, ɖɩtana mbʋ pɩtɛmnɩ ɖo-Mooyiizi weyi ɛlɩzɩ-ɖʋ Ejiptɩ ɛjaɖɛ taa yɔ.’ 41 Peeye pama neɣye nɛ palaa ɖɩ-yɔɔ nɛ pa-taa hʋlʋmɩnɩ mbʋ pa-maɣmaɣ pamanɩ pe-nesi yɔ. 42 Ɛlɛ, Ɛsɔ ha-wɛ siɣye. Eyebi-wɛ nɛ poluŋ wɩsɩ nɛ fenaɣ nɛ tɩɩnzɩ pɛ-tɛɛ ɛzɩ *lɔɔyɩsɩ tɩnaa maʋ pa-takayɩsɩ taa yɔ. Pamawa se:
‘*Izrɛɛlɩ ñɩma mɩ! Ma ɩla kpɩna nɛ kɩlaŋ lɛɛŋ mbʋ lakʋ taa pɩnzɩ nɩɩnaza yaa we?
43 Pɩtɛkɛ ma. Ɛlɛ, ɩsɩɣlɩ ɛgɔlɩmɩyɛ Moolɔkɩ kɩɖanɖʋʋ nɛ ɛgɔlɩmɩyɛ Refaɣ sɩʋ kpeleɣ.
Sɩʋ kpelisi nzɩ ɩɩlaba nɛ iluŋuu sɩ-tɛɛ!
Pʋ-yɔɔ mɛnkɛzɩɣ-mɩ tɛtʋ nɛ ɖooo *Babilooni ɛjaɖɛ wayɩ!’ ”
44 Etiyɛɛnɩ tasɩ yɔɔdʋʋ ɖɔɖɔ se: “Ɖɔ-cɔzɔnaa kesiɣ kɩɖanɖʋʋ lakʋ taa nɛ kɩwɩlɩɣ se pa nɛ Ɛsɔ pɛwɛna. Pesiɣ-kʋ ɛzɩ ɛlɛ keheyuu *Mooyiizi yɔ: eeheyi-i se esiɣ-kʋ ɛzɩ ŋgʋ ɛwɩlɩ-ɩ yɔ.ILLUSTRATION 22
45 Ɖɔ-cɔzɔnaa mba, paayebi kɩɖanɖʋʋ ŋgʋ nɛ pa-wayɩ ñɩma. Paakpɛndɩnɩ-kʋ alɩwaatʋ ndʋ Yozuwee ketaɣ-wɛ nɛ pɛlɛɣ ɛjaɖɛ nɖɩ ɖɩwɛ pɛ-ɛsɩndaa nɛ Ɛsɔ ɖɔɔnɩ ɖɩ-taa ñɩma yɔ. Kʋwɛ mbʋ nɛ pɩtalɩ wiyaʋ sɔsɔ *Daaviidi alɩwaatʋ. 46 Yakɔɔbʋ Ɛsɔ kalabɩ-ɩ lootiye nɛ etendi-i se ɛlɛ ɛha-ɩ waɖɛ nɛ ɛma-ɩ ɖɩɣa. 47 Ɛlɛ, ɛ-pɩyalʋ Salomɔɔ manɩ Ɛsɔ ɖɩɣa.
48 Ŋgʋ, Ɛsɔ Caabiyuu ɛɛsʋʋ kuduyiŋ weyi ɛyaa manɩ pa-maɣmaɣ pe-nesi yɔ ɩ-tɛɛ. Pʋwɛ ɛzɩ tɔm ndʋ *lɔɔyaɣ tʋ kɔyɔɔdaa yɔ. Ndʋ lɛ se:
49 ‘Kɩpaɣlʋ yɔɔdaa se ɛsɔtɔnʋʋ lɛ men-kewiyaɣ kpelaɣ nɛ
tɛtʋ lɛ kpeɖe nɖɩ mantɩnɩɣ ma-naŋgbanzɩ ɖɩ-yɔɔ yɔ.
Ɖɩɣa ŋga ɖɔɖɔ ɩmaɣ-m yɔ?
Le manpɩzɩɣ mancaɣ nɛ mɛhɛzɩ?
50 Pɩtɛkɛ ma-maɣmaɣ malabɩnɩ pɩtɩŋa payɩ yaa we?’ ”
51 Etiyɛɛnɩ tɛm yɔɔdʋʋ mbʋ lɛ, ɛtɔ se: “Laŋkpɩzɩyɛ tɩnaa mba mɩ mɩ-laŋa nɛ mɩ-nɩŋgbaaŋ pɛwɛ ɖoŋ yɔ! Ɩwɛɛ ikiziɣ Ɛsɔ Kalɩzaɣ tɔm ɛzɩ mɩ-cɔzɔnaa yɔ! 52 Lɔɔyaɣ tʋ weyi ɛ-wayɩ mɩ-cɔzɔnaa keyebi wɛʋ kaŋ kaŋ? Halɩ pakʋ mba patɩŋa payɩ paayɔɔdaa se pɔkɔŋ lʋlʋʋ Weyi Ɛtʋʋzaa yɔ. Lɛɛlɛɛyɔ, ɛnʋ ɩɖʋzɩ koyindinaa nesi taa nɛ pakʋ-ɩ. 53 Mba mɩ Ɛsɔ tɩŋnɩ e-*tiyiyaa yɔɔ nɛ ɛcɛlɩ-mɩ ɛ-paɣtʋ yɔ, ɩtɔɖɔ tɩ-yɔɔ!”
Etiyɛɛnɩ sɩm tɔm
54 Mba patɩŋa paawɛ tɔm ɖɩhʋyɛ peeye yɔ, panɩ Etiyɛɛnɩ tɔm ndʋ mbʋ lɛ, pa-pana kpa pɩŋŋ nɛ pɔtɔkɩ po-ndoma yem. 55 Ɛlɛ, Ɛsɔ Kalɩzaɣ kɛwɛ Etiyɛɛnɩ yɔɔ. Pɔtɔkaɣ po-ndoma mbʋ lɛ, ɛcɔnɩ ɛsɔdaa nɛ ɛna Ɛsɔ e-koboyaɣ taa, Yesu ñasɩŋ ɛ-cɔlɔ lone kɩbanɖɛ taa. 56 Peeye eheyi-wɛ se: “Iwelesi nɛ ɩnɩɩ: ɛsɔtɔnʋʋ tʋlaa nɛ manaɣ *Ɛyʋ Pɩyalʋ sɩŋ Ɛsɔ cɔlɔ lone kɩbanɖɛ taa.”
57 Ɛyɔɔdɩ mbʋ lɛ, papazɩ kou nɛ paɖɩɣ pa-nɩŋgbaaŋ! Peeye pakʋyɩ patɩŋa pekpibi-i 58 nɛ pɔhɔm-ɩ nɛ palɩnɩ tɛtʋ wayɩ nɛ payakɩ-ɩ pɛɛ se ɛsɩ. Aseɣɖe tɩnaa kɔhɔzɩ po-tokonaa nɛ pasɩɩ evebu weyi payaɣ se Sɔɔlɩ yɔ ɛ-cɔlɔ se ɛcɔnɩ tɩ-yɔɔ. 59 Payakaɣ-ɩ pɛɛ mbʋ lɛ, etendi Kɩpaɣlʋ se: “Kɩpaɣlʋ Yesu! Mʋ man-kalɩzaɣ!” 60 Peeye eluŋ ɛ-nɩmbɔla yɔɔ nɛ ɛma kubuka ɖoŋ se: “Kɩpaɣlʋ! Taakpaɣ pa-kɩwɛɛkɩm nɛ ŋlabɩnɩ tʋmɩyɛ!”
Ɛtɛm yɔɔdʋʋ mbʋ lɛ, ɛhɛɛ.