Tʋma Labʋ 5

Anaanɩyaasɩ nɛ ɛ-halʋ Safɩɩra pɔ-tɔm

¹ Abalʋ nɔɔyʋ nɛ ɛ-halʋ paawɛɛ, payaɣ-ɩ se Anaanɩyaasɩ nɛ ɛ-halʋ se Safɩɩra.

Paba ñaayɔɔdaa nɛ pɛpɛdɩ pɛ-tɛtʋ natʋyʋ ɖɔɖɔ. ² Ɛlɛ, panɩnɩ ɖama nɛ patayɩ ti-liidiye taa nɛ abalʋ kpaɣ hɔɔlʋʋ nɛ ewoni ɛcɛlɩ Yesu *tiyiyaa se ɖɩtɩŋa lɛ. ³ Peeye Pɩyɛ pɔzɩ-ɩ se: “Anaanɩyaasɩ! Pɩlabɩ ɛzɩma nɛ ŋyele nɛ *Kañadʋ Satanɩ peɣzi-ŋ nɛ halɩ ŋcɛtɩnɩ Ɛsɔ Kalɩzaɣ taa nɛ ŋsɩɩ ña-tɩ tɛtʋ ndʋ ŋpɛdaa yɔ ti-liidiye hɔɔlʋʋ lɛɛkʋ? ⁴ Pʋcɔ ŋpɛdɩ-tʋ lɛ, tɩɩkɛ ña-ñɩm, pɩtɛkɛ ñatɩnɩ ti-liidiye ɖɔɖɔ yaa we? Ɛbɛ laba nɛ ŋla lɩmaɣza kɩdɛkɛdɛɛ anɛ mbʋ? Tɩlɩ se pɩtɛkɛ ɛyaa ɖeke ŋcɛtaa. Ɛlɛ, ŋcɛtɩ Ɛsɔ ɖɔɖɔ.”

⁵ Anaanɩyaasɩ nɩ mbʋ lɛ, ɛtɔlɩ nɛ ɛsɩ. Peeye sɔɔndʋ kpa mba panɩ tɔm ndʋ yɔ patɩŋa siŋŋ. ⁶ Ɛlɛ evebiya wolo pakpaɣ sɩɖʋ ɛnʋ nɛ paɖʋ-ɩ pɩsaʋ taa nɛ powoni-i pepi.

⁷ Pɩlabɩ ɛzɩ ñɩɣtʋ naadozo yɔ lɛ, Anaanɩyaasɩ ɛnʋ ɛ-halʋ talɩ. Ɛlɛ, ɛtaanɩɩ mbʋ pɩlaba yɔ. ⁸ Peeye Pɩyɛ pɔzɩ-ɩ se: “Heyi-m nɛ mana se liidiye nɖɩ ɩpɛdɩ mɩ-tɛtʋ yɔ, ɖɩtɩŋa yɔ yaa we?” Ɛlɛ ecosi se: “Ɛɛɛ, ɖɩtɩŋa lɛ.” ⁹ Pɩyɛ ɖaɣnɩ-ɩ pɔzʋʋ se: “Pɩlabɩ ɛzɩma nɛ ña nɛ ña-walʋ ɩla nɔɔ kʋɖʋmaɣ nɛ ɩtakɩ Kɩpaɣlʋ Kalɩzaɣ mbʋ? Cɔnɩ ŋna! Mba pepim ña-walʋ yɔ, pɛtɛm talʋʋ nɔnɔɔ taa, pakpakɩɣ-ŋ ɖɔɖɔ nɛ powoni pepi.”

¹⁰ Kpaagbaa mbʋ lɛ, halʋ ɛnʋ ɛtɔlɩ Pɩyɛ naŋgbanzɩ tɛɛ nɛ ɛsɩ. Evebiya sʋwa lɛ, pamaɣnɩ ɛtɛm sɩbʋ nɛ pakpaɣ-ɩ powoni pepi ɛ-walʋ cɔlɔ. ¹¹ Pʋ-yɔɔ sɔɔndʋ kpa Krɩstʋ ɛgbɛyɛ taa ñɩma tɩŋa nɛ mba patɩŋa payɩ panɩ tɔm ndʋ yɔ siŋŋ.

Ɛsɔ hama lakasɩ sakɩyɛ tɔm

¹² Ɛsɔ tɩŋaɣnɩ Yesu *tiyiyaa yɔɔ nɛ ɛlakɩ hama lakasɩ sakɩyɛ nɛ ɛwɩlɩɣ kawɩlɩsɩ ɛyaa hɛkʋ taa. Mba pɛwɛnɩ lidaʋ yɔ, patɩŋa payɩ panɩɣaɣnɩ ɖama nɛ pekpeɣliɣ Ɛsɔ ɖɩɣa taa ɖenɖe payaɣ se Salomɔɔ Hɔɔlʋʋ yɔ. ¹³ Ɛlɛ, nɔɔyʋ yem takatɩɣ se ɛsɔzɩ pɔ-yɔɔ. Ŋgʋ, ɛyaa ñayɩɣyaɣ-wɛ siŋŋ. ¹⁴ Ɛyaa sakɩyɛ: halaa nɛ abalaa mba pɛwɛɣaɣnɩ lidaʋ Kɩpaɣlʋ yɔɔ yɔ, pɔsɔzaɣnɩ pɔ-yɔɔ nɛ pɛtɛzɩɣ ɖɔʋ. ¹⁵ Ɖɔɖɔ lɛ, ɛyaa kpakaɣ kʋdɔndɩnaa nɛ palɩɣnɩ pɛhɛzɩɣ-wɛ ñalɩŋ yɔɔ habɛɛ nɔsɩ se Pɩyɛ ɛkɔm ɛɖɛɣ lɛ, paa ɛ-kɩlɛmʋʋ maɣmaɣ yɔ, kiihuuzi pa-taa nabɛyɛ yɔɔ. ¹⁶ Ɛyaa sakɩyɛ lɩɣaɣnɩ ɖɔɖɔ hɔɔlɩŋ weyi ɩñɔtɩnɩ Yeruusalɛm yɔ ɩ-taa nɛ powokini kʋdɔndɩnaa nɛ mba alewaa pɩsaɣ-wɛ kpɛndɛlɩsɩ yɔ nɛ patɩŋa payɩ pɔ-yɔɔ cɛkɩ.

Pɛwɛʋ Yesu *tiyiyaa wayɩ kaŋ kaŋ yɔ

¹⁷ Pɩlakaɣ mbʋ lɛ, *Saduki ɛgbɛyɛ taa ñɩma tɩŋa payɩ wɛ cɔjɔnaa ñʋʋ tʋ cɔlɔ. Panɩ mbʋ lɛ, pala ɛzɩsɛmɩyɛ nɛ paɖʋ se pakpaɣ Yesu *tiyiyaa. ¹⁸ Peeye pakpa-wɛ powoni paɖʋ-wɛ salaka sɔsɔɔ taa. ¹⁹ Ɖoo yuwa lɛ, Kɩpaɣlʋ Ɛsɔ *tiyiyu nɔɔyʋ wolo ɛtʋlɩ salaka kuduyuu nɔnɔsɩ nɛ ɛlɩzɩ-wɛ nɛ eheyi-wɛ se: ²⁰ “Iwolo Ɛsɔ ɖɩɣa taa nɛ ɩkɛdɩ ɛyaa samaɣ wezuu caɣʋ kɩfam tɔm tɩŋa.” ²¹ Eheyi-wɛ mbʋ lɛ, petisi nɛ pakʋyɩ tanaŋ wɩsɩ nɛ powolo Ɛsɔ ɖɩɣa taa nɛ papazɩ ɛyaa wɩlʋʋ.

Ŋgʋ, cɔjɔnaa ñʋʋ tʋ nɛ ɛ-cɔlɔ ñɩma paakpeɣli ɖama nɛ payaa tɔm hʋyaa *sɔsaa nɛ ɛjaɖɛ taa *sɔsaa tɩŋa kediɣzaɣ. Peeye pakʋsɩ sɔɔjanaa se powolo palɩzɩ *tiyiyaa mba nɛ pɔkɔna. ²² Paba wobi patʋlɩ salaka nɔnɔsɩ lɛ, paanaɣ-wɛ. Peeye papɩsaa peheyi-wɛ se: ²³ “Ɖɩtalaa lɛ, ɖɩmaɣnɩ paɖɩɣ salaka nɔnɔsɩ kpam nɛ ɖaŋɩyaa ñasɩŋ sɩ-yɔɔ nɛ paɖaŋ. Ɖɩtʋlɩ-sɩ nɛ ɖɩsʋʋ lɛ, ɖɩɩnaɣ nɔɔyʋ.”

²⁴ Ɛsɔ ɖɩɣa nɔnɔɔ yɔɔ ɖaŋɩyaa ñʋʋ tʋ nɛ *cɔjɔnaa *sɔsaa panɩ tɔm ndʋ mbʋ lɛ, paanaɣ se pɔyɔɔdɩ se we nɛ pɛwɛɛ pamaɣzɩɣ mbʋ pʋkɔŋ labʋ yɔ pʋ-yɔɔ. ²⁵ Peeye nɔɔyʋ tɩkɔm yem nɛ eheyi-wɛ se: “Ɩnaɣ! Mba ɩɖʋ-wɛ salaka yɔ, pɛwɛ Ɛsɔ ɖɩɣa taa nɛ pawɩlɩɣ ɛyaa.” ²⁶ Ɛlɛ heyi-wɛ mbʋ lɛ, ɖaŋɩyaa ñʋʋ tʋ nɛ ɛ-wayɩ ñɩma powolo pakpa-wɛ nɛ powona. Ɛlɛ, pototukuni pa-taa nɔɔyʋ yɔɔ, mbʋ pʋyɔɔ yɔ, peseɣaɣ se ɛyaa samaɣ kayaɣ-wɛ pɛɛ. ²⁷ Patanɩ-wɛ tɔm hʋyaa *sɔsaa cɔlɔ lɛ, cɔjɔnaa ñʋʋ tʋ pazɩ-wɛ tɔm pɔzʋʋ ²⁸ se: “Ɖikizini-mɩ kpem se ɩtaatasɩ wɩlʋʋ nɛ abalʋ ɛnʋ ɛ-nɔɔ lɛ, ɛbɛ ɩlaba yɔ? Iyeba nɛ ɩtɛzɩɣ mɩ-tɔm wɩlʋʋ Yeruusalɛm tɛtʋ tɩŋa payɩ nɛ ɩcaɣ se ɩkpaɣ ɛ-sɩm nɛ ɩsʋʋ-ɖʋ!”

²⁹ Peeye Pɩyɛ nɛ ɛ-taabalaa *tiyiyaa lɛlaa pocosaa se: “Pʋwɛɛ se ɖɩña Ɛsɔ nɛ pɩkɩlɩ ɛyaa. ³⁰ Ɖɔ-cɔzɔnaa Ɛsɔ fezi Yesu weyi ɩkam *kaamaŋkaɣ yɔɔ nɛ ɛsɩ yɔ. ³¹ Efezi-i lɛ, ɛkpazɩ-ɩ nɛ ɛcaɣzɩ lone kɩbanɖɛ taa ɛ-cɔlɔ nɛ ɛpɩsɩ-ɩ Wiyaʋ Sɔsɔ weyi ɛkɛ Ñʋʋ Yaɖʋ yɔ se ɛwɩlɩ *Izrɛɛlɩ ñɩma nʋmɔʋ nɛ pɛlɛɣzɩ wɛtʋ nɛ Ɛsɔ kpeɣ-wɛ pa-kɩwɛɛkɩm. ³² Ɖɩkɛ tɔm ndʋ tɩ-aseɣɖe tɩnaa. Pɩtasɩnɩ ɖe-ɖeke, ɛlɛ, Kalɩzaɣ ŋga Ɛsɔ ha mba pañaŋ-ɩ yɔ, kɛkɛ tɩ-aseɣɖe tʋ ɖɔɖɔ.”

³³ Tɔm hʋyaa nɩ mbʋ lɛ, pamʋ miŋ nɛ pacaɣ se pakʋ-wɛ. ³⁴ Ɛlɛ, Farɩsɩ ɛgbɛyɛ taa tʋ nɔɔyʋ kɛwɛ pɛ-hɛkʋ taa, payaɣ-ɩ se Gamaalɩyɛɛlɩ. Ɛkɛ paɣtʋ wɩlɩyʋ, ɛyaa tɩŋa ñaŋ-ɩ. Ɛnʋ kʋyɩnɩ ɛsɩŋ pɛ-hɛkʋ taa nɛ ɛyɔɔdɩ se palɩzɩ-wɛ nɛ awayɩ nɛ pʋcɔ. ³⁵ Palɩzɩ-wɛ lɛ, eheyi ɛyaa mba paakpeɣli peeye yɔ se: “*Izrɛɛlɩ ñɩma mɩ! Ɩkpa mɩ-tɩ nɛ mbʋ ɩcaɣ se ɩla ɛyaa panɛ yɔ. ³⁶ Pɩtalabɩdɩ pʋyʋ yɔ, Teedaasɩ wɩlaɣ ɛ-tɩ. Abalʋ ɛnʋ, ɛkpazaɣ ɛ-tɩ nɛ ɛyaa tɩŋɩɣ ɛ-wayɩ, paatalɩ ɛzɩ nasɩnaza yɔ. Ɛlɛ, pakʋ-ɩ nɛ piyele ɛ-ɛyaa mɩzɩ ɖama patɩŋa payɩ nɛ pɩsɩɩ tɩnaɣ yem mbʋ. ³⁷ Ɛlɛ wayɩ lɛ, Galilee tʋ weyi payaɣ se Yudaasɩ yɔ, ɛhɔ ɛyaa samaɣ nakɛyɛ kɩkalʋʋ alɩwaatʋ taa nɛ katɩŋɩɣ ɛ-wayɩ. Pakʋ ɛlɛ ɖɔɖɔ nɛ piyele ɛyaa mba pamɩzɩ ɖama patɩŋa.

³⁸ Pʋ-yɔɔ lɛ, meheyiɣ-mɩ lɛɛlɛɛyɔ se: iyele ɛyaa panɛ ɖiɣ ɖiɣ nɛ pɔ-tɔm. Mbʋ palakɩ yɔ, ye ɛyaa cɔlɔ pɩlɩnaa yɔ, pʋkɔŋ sɩʋ tɩnaɣ. ³⁹ Ɛlɛ, ye Ɛsɔ cɔlɔ pɩlɩnaa yɔ, ɩɩpɩzɩɣ ɩɖɩɣ-wɛ nʋmɔʋ. Ɩkpa mɩ-tɩ ɖeu nɛ pɩtaakɔɔ puyozi mɩ nɛ Ɛsɔ!”

Ɛyɔɔdɩ mbʋ lɛ, tɔm hʋyaa tisi ɛ-tɔm. ⁴⁰ Peeye paya *tiyiyaa mba nɛ polu-wɛ agbazɛɛ nɛ paka pa-ñʋŋ taa se pataatasɩ Yesu hɩɖɛ yaʋ. Pʋwayɩ lɛ, peyebi-wɛ se pɛɖɛɛ. ⁴¹ Ɛlɛ, tiyiyaa mba pakʋyɩ pɔ-cɔlɔ nɛ palɩnɩ laŋhʋlʋmɩyɛ. Mbʋ pʋyɔɔ yɔ, Ɛsɔ nawa se pamʋnaa se pɔtɔɔ kʋñɔŋ Yesu yɔɔ. ⁴² Pʋwayɩ lɛ, pʋñɔɔzɩ pɩkɩlɩ. Mbʋ pʋyɔɔ yɔ, tiyiyaa mba pawɩlaɣ nɛ posusuu Laŋhɛzɩyɛ Tɔm se Yesu lɛ *Weyi Ɛsɔ Lɩzaa Yɔ. Ɛsɔ ɖɩɣa nɛ ɖɩsɩ pa-taa palakaɣ mbʋ kɩyakɩŋ tɩŋa.