2
Mooyiizi lʋlʋʋ nɛ ɛ-pɩcatʋ pɔ-tɔm
1 Abalʋ nɔɔyʋ kɛwɛɛ ḿbʋ nɛ ɛkpaɣ halʋ. Ɛ nɛ ɛ-halʋ pɛkɛ Leevii liɖe taa ñɩma. 2 Pɩkɔma lɛ, halʋ ɛnʋ ɛhaɣ hoɣa nɛ ɛlʋlɩ abalɩbɩɣa nakɛyɛ. Ɛlʋlɩ-kɛ lɛ, ɛna se keɖewa. Peeye, ɛmɛsɩ pɩɣa ŋga fenasɩ naadozo. 3 Ɛlɛ, ɛtapɩzɩɣ se, ɛwɛ-kɛ mɛsʋʋ ḿbʋ́ lɛ, ɛkpaɣ ɖɔkʋ nakʋyʋ nɛ ɛtaa-kʋ aŋwɔ nɛ tɩʋ nakʋyʋ cɩyɩm se, lɩm ɛtaasʋʋ. Ɛtɛma lɛ, ɛkpaɣ pɩɣa nɛ ɛhɩzɩ-kɛ kɩ-taa nɛ ewoni ɖɔkʋ ŋ́gʋ́ nɛ ɛsɩɩ-kʋ pɔɔ nɔɔ yɔɔ, kañɩŋgbayaɣ hɛkʋʋ taa. 4 Pɩlabɩ ḿbʋ́ lɛ, pɩɣa ŋga kɔ-kɔɔ sɩŋ poliŋ taa se ɛna mbʋ kɛtɛŋna yɔ. 5 Pɩkɛda lɛ, Ejipiti wiyaʋ pɛlɛ kʋyɩ etii Niili pɔɔ taa se ɛsɔ lɩm. Etikaɣ lɛ, ɛ-taabalaa halaa ñɩma sɩɩ-ɩ nɛ pɛwɛɛ petiki nɛ pakpaɣ kiteŋ yɔɔ. Pɩkɛdaa lɛ, wiyaʋ pɛlɛ losi ɖɔkʋ kañɩŋgbayaɣ hɛkʋʋ taa nɛ etiyi ɛ-tʋmlaɖʋ halɩñɩnʋ se, ewolo ɛkpaɣ-kʋ nɛ ewoni-i. 6 Ekulaa lɛ, ɛmaɣna abalɩbɩɣa nakɛyɛ kɛwɛɛ kewiliɣ. Peeye, ɛna ka-pʋdɔdɩyɛ nɛ ɛtɔ se, paa pɩɩla ɛzɩma pɩkɛ Ebire tʋ nɔɔyʋ pɩɣa! 7 Ɖɩnɛɛ, pɩɣa kɔɔ pɔzɩ wiyaʋ pɛlɛ se, ɛnʋ ewolo Ebire ñɩma tɛ nɛ ɛñɩnɩ-ɩ halʋ nɔɔyʋ nɛ ɛ́lɛ́ cɔnɩ-ɩ kɔ-yɔɔ yaa we? 8 Peeye, wiyaʋ pɛlɛ cosi-i se, ɛɛɛ!
Pʋ-yɔɔ kɔɔ woba ɛkɔna pɩɣa ŋga ko-ɖoo kʋlʋlʋ. 9 Ɛ́lɛ́ kɔma lɛ, wiyaʋ pɛlɛ heyi-i se, ɛkpaɣ pɩɣa ŋga nɛ ɛcɔnɩ ɛ́nʋ́ʋ́-ɩ́ kɔ-yɔɔ. Se, ɛnʋ kaɣ-ɩ hɛyʋʋ pʋ-yɔɔ. Peeye, ɖoyo kpaɣ pɩɣa nɛ ɛcɔnɩ kɔ-yɔɔ.
10 Pɩɣa kɔm kapaɣlɩ lɛ, ko-ɖoo kpaɣ-kɛ nɛ ewoni-kɛ ɛcɛlɩ Ejipiti wiyaʋ pɛlɛ nɛ kacaɣ ɛ́lɛ́ cɔlɔ ɛzɩ ɛ-tɩtɩŋa ɛ-pɩɣa yɔ. Ḿbʋ́ pʋyɔɔ yɔ, ɛtɔŋaɣ se, lɩm taa ɛnʋ lɩzɩ-ɩ. Pʋ-yɔɔ ɛha-ɩ hɩɖɛ se, Mooyiizia.
Pɩwɛʋ se, Mooyiizi ese nɛ ewolo Maadiyaanɩ ɛjaɖɛ taa yɔ -
11 Mooyiizi labɩ ɛyʋ sʋtʋyʋ lɛ, nakʋyʋ wiye ewolo se ɛna ɛ-tɛ ñɩma cɔlɔ. Ɛɛna kʋñɔŋ ŋgʋ paɖʋwaɣ-wɛ yɔ. Ɛtɩɩtala lɛ, ɛna Ejipitʋ nɔɔyʋ ɖɔɔnɩ mabʋ e-koobiya Ebire ñɩma taa nɔɔyʋ. 12 Peeye, Mooyiizi cɔnɩ ɛ-cɔlɔ kpɛɛɛ. Ɛcɔnaa nɛ ɛtɩna nɔɔyʋ lɛ, ɛkpa Ejipiti tʋ nɛ ɛkʋyɩ-ɩ nɛ ɛkpaɣ ɛ́lɛ́ tomnaɣ nɛ ɛmɛsɩ-kɛ kañɩŋa taa. 13 Tɛʋ fema nɛ ɛpɩsɩ lɛ, ɛmaɣna Ebire ñɩma naalɛ pɛwɛɛ pamakɩ ɖama pa-taa peɖeke. Peeye eloli-wɛ nɛ ɛpɔzɩ weyi ɛca tɔm yɔ se, pɩlabɩ ɛzɩma nɛ ɛmakɩ ɛ-taabalʋ? 14 Ɛ́lɛ́ kitini-i se, asɩ-ɩ ḿbá wiyaʋ nɛ ḿbá tɔmhʋyʋ? Ɛpɔzɩ-ɩ se, ɛñɩnɩɣ ɛkʋ ɛnʋ ɛzɩ ɛkʋ Ejipiti tʋ yɔ yaa we? Mooyiizi nawa see ɛyaa sɩma tɔm ndʋ lɛ, sɔɔndʋ kpa-ɩ. 15 Pɩlabɩ ḿbʋ lɛ, Farawɔɔ maɣmaɣ kɔɔ ɛnɩ tɔm ńdʋ nɛ ɛñɩnɩɣ se ɛkʋ-ɩ. Peeye, Mooyiizi sewa nɛ ewolo ɛmɛlɩ Maadɩyaanɩb ɛjaɖɛ taa. Ɛtalɩ peeye lɛ, ewolo ɛcaɣ lɔkɔ nakʋyʋ cɔlɔ c.
16 Cɔjɔ nɔɔyʋ kɛwɛ Maadɩyaanɩ ɛjaɖɛ nɖɩ ɖɩ-taa, payaɣ-ɩ se Yetiroo. Ɛkɛwɛnɩ pɛlaa lʋbɛ. Ḿbʋ́ʋ́ pɛlaa ḿba powoba se polu lɩm nɛ papɩyɩ pulona taa se, pa-caa wondu ɛñɔɔ. 17 Pɩkɛdaa lɛ, wondu ketiyaa napɛyɛ wolo se pɔɖɔɔnɩ-wɛ. Mooyiizi na ḿbʋ́ lɛ, ɛlʋ pɛlaa ḿba pɔ-yɔɔ nɛ ɛha pɔ-wondu lɩm nɛ tɩñɔɔ. 18 Pɛlaa ḿba pɔkɔm papɩsɩ ɖɩɣa lɛ, pa-caa pɔzɩ-wɛ se, pɩlabɩ ɛzɩma nɛ papɩsɩ lɔŋ ḿbʋ́? 19 Ḿbʋ́ʋ́ pocosi-i se, Ejipiti tʋ nɔɔyʋ lɩ zɩnɩ-wɛ wondu ketiyaa nesi tɛɛ, halɩ elu lɩm nɛ ɛpɩyɩ ḿba wondu nɛ tɩñɔɔ. 20 Pʋ-yɔɔ pa-caa pɔzɩ-wɛ se, abalʋ ɛnʋ ɛwɛ le yɔ? Se, patiwoni-i ɖɩɣa suwe? Se, powolo paya-ɩ nɛ ewolo ɛ nɛ wɛ pɔtɔɔ.
21 Ḿbʋ́ʋ́ Mooyiizi tisaa nɛ ɛcaɣ abalʋ ɛnʋ ɛ-tɛ. Pɩlablɩ ḿbʋ́ lɛ, Yetiroo kpaɣ ɛ-pɛlɛ Seforaa nɛ ɛha-ɩ se, ɛkɛ ɛ-halʋ. 22 Pacaɣ lɛ, Ciporaa haɣ hoɣa nɛ ɛlʋlɩ abalɩpɩɣa. Pɑlʋlɩ-kɛ lɛ, Mooyiizi tɔ se, ɛnʋ yaɣ-kɛ se, Gɛrɩsɔɔm. Toovenim lɛ, ɛtɔŋaɣ se, ɛnʋ kɛ caɣyʋ ɛjaɖɛ nɖɩ ɖɩ-taa ɛnʋ kɛ ɛgɔm yɔ.
Ɛsɔ lɩzʋ Mooyiizi se ɛya Izirɛɛlɩ ñɩma ñʋʋ yɔ
23 Pʋwayɩ pɩkɔm pileɖipɩŋŋ lɛ, Ejipiti ɛjaɖɛ wiyaʋ sɩ. Yomiye tʋmɩyɛ nɩwaɣ Izirɛɛlɩ ñɩma lɛ, papazɩ wiluu nɛ pamaki kubusi nɛ Ɛsɔ cɔlɔ kiŋ se, ɛ́lɛ́ ɛlɩzɩ-wɛ pɩ-taa. 24 Pɩlabɩ ḿbʋ́ lɛ, Ɛsɔ nɩɩ pe-wiluu nɛ ɛtɔzɩ nɔɔ haʋ ḿbʋ pʋwɛ ɛ nɛ Abɩraham nɛ Izaakɩ nɛ Yaakɔɔbʋ pɛ-hɛkʋ taa yɔ pʋ-yɔɔ. 25 Ḿbʋ́ʋ́, Ɛsɔ cɔnɩ Izirɛɛlɩ ñɩma pʋdɔdɩyɛ nɛ ɛya pa-ñʋʋ.