22
Abɩraham tisuu se ɛlaɣ Izaakɩ yɔ
1 Pʋwayɩ lɛ, Ɛsɔ takɩ Abɩraham se ɛna ɛ-wayɩ. Nakʋyʋ wiye ɛya Abɩraham nɛ ɛ́lɛ cosi se, ɛnʋʋ yɔ, se, ɛnʋ welisiɣni-i. 2 Ɛsɔ kitini-i se, ɛ́kpaɣ ɛ-pɩyalʋ ɛgbamɩyɛ Izaakɩ weyi ɛsɔɔlɩ siŋŋ yɔ, nɛ éwolo Mooriiyaa hɔɔlʋʋ taa, nɛ ɛnʋ wɩ́lɩ-ɩ pʋʋ nakʋyʋ nɛ ɛ́kpa kʋ-yɔɔ nɛ ɛlaa-ɩ nɛ ɛhɔ nɛ ɛha ɛnʋ.
3 Kifem tanaŋ cu lɛ, Abɩraham kʋyɩ ɛfaɣ ɖasɩ nzɩ paahɔbɩnɩ kɩlaʋ yɔ, nɛ ɛñɔɔzɩ ɛ-kpaŋaɣ, nɛ ɛ́yaa ɛ-tʋmlaɖaa naalɛ, nɛ ɛ-pɩyalʋ Izaakɩ, nɛ ɛ nɛ wɛ pakpaɣ nʋmɔʋ se, powoki ɖenɖe Ɛsɔ wɩlɩ-ɩ yɔ. 4 Pɩkɔma pife tozo wiye lɛ, elosuu ɖenɖe ewoki yɔ poliŋ taa. 5 Peeye eheyi ɛ-tʋmlaɖaa se, pa nɛ kpaŋaɣ pacaɣ ɖenɖe patalaa yɔ, nɛ piyele ɛnʋ nɛ ɛ-pɩyalʋ powolo hayo peeye yɔ, nɛ poluŋ Ɛsɔ tɛɛ, nɛ papɩsɩ pɔ-cɔlɔ.
6 Eheyi-wɛ ḿbʋ lɛ, ɛkpaɣ kɩlaʋ ɖasɩ, nɛ ɛsʋʋ ɛ-pɩyalʋ Izaakɩ, nɛ piyele ɛ-maɣmaɣ ɛɖɔkɩ miŋ nɛ sɩɣa, nɛ pa-naalɛ pɛɖɛɣ. 7 Pɩkɛdaa lɛ, Izaakɩ yaa Abɩraham se, caa! Nɛ ɛ́lɛ yaa-ɩ se, ɛ-pɩyalʋ, nɛ eheyi-i se, ɛyɔɔdɩ se ɛnʋ welisiɣ. Peeye Izaakɩ pɔzɩ-ɩ se, miŋ yɔ, ɖasɩ yɔ, le heɣa ŋga palaɣ nɛ pɔhɔ miŋ yɔ, kaka ñɛwɛɛ? 8 Abɩraham cosi ɛ-pɩyalʋ se, Ɛsɔ maɣmaɣ haɣnɩ heɣa ŋga palaɣ nɛ pɔhɔ miŋ yɔ. Nɛ pa-naalɛ pɛwɛɛ pɛɖɛɣ. 9 Pɔkɔma patalɩ ɖenɖe Ɛsɔ kawɩlɩ-ɩ yɔ lɛ, Abɩraham ma kɩlaŋ ɖɩlayɛ, nɛ ɛkpaɣ ɖasɩ ɛtɩnɩ ɖɩ-yɔɔ. Pʋwayɩ lɛ, ɛhɔkɩ ɛ-pɩyalʋ Izaakɩ nɛ ɛkpaɣ-ɩ nɛ ɛtɩnɩ kɩlaŋ ɖɩlayɛ ɖasɩ yɔɔ. 10 Peeye Abɩraham posi nesi se, ɛkpakɩɣ sɩɣa nɛ ɛcɛ ɛ-pɩyalʋ liu tɛɛ. 11 Ɛlɛ, KƖPAƔLƲ tiyiyu yaa-ɩ nɛ ɛsɔdaa se, Abɩraham! Abɩraham! Nɛ ɛsɛɛ se, ɛnʋʋ yɔ! 12 Tiyiyu ɛnʋ eheyi-i se, ɛ́taatukuni pɩɣa ŋ́ga kɔ-yɔɔ, ɛ́taalabɩ-kɛ pʋyʋ. Se, lɛɛlɛɛyɔ, ɛnʋ nawa se ɛñaŋ Ɛsɔ siŋŋ, mbʋ pʋyɔɔ yɔ, etisaa se, ɛhaɣ-ɩ ɛ-pɩyalʋ ɛgbamɩyɛ.
13 Abɩraham kpazɩ ɛ-ɛza lɛ, ɛnaɣ ɛyaʋ nakʋyʋ hɔɖaɣ nakɛyɛ tɛɛ, pɩmɛyɩ kɩ-hɩŋ taa. Peeye Abɩraham woba ɛlɩzɩ-kʋ nɛ ɛlaa nɛ ɛhɔ ɛ-pɩyalʋ lone taa. 14 Abɩraham yaa lone ńɖɩ se, KƖPAƔLƲ háɣna. Pʋ-yɔɔ pɔtɔŋ halɩ nɛ sɔnɔ se, KƖPAƔLƲ haɣ ɛ-pʋʋ yɔɔ a.
15 Ɛlɛ, KƖPAƔLƲ tiyiyu tasɩ Abɩraham yaʋ nɛ ɖooo ɛsɔdaa, 16 nɛ eheyi-i se, KƖPAƔLƲ kaɖaa se, ɖenɖe ɛlabɩ mbʋ, etekizi se ɛɛhaɣ-ɩ ɛ-pɩyalʋ ɛgbamɩyɛ yɔ, ɛnʋ weyi ɛkɛ Ɛsɔ yɔ, eɖuuni ɛ-maɣmaɣ se, 17 ɛwazɩɣ ɛ-yɔɔ nɛ eyele nɛ e-liɖe taa ñɩma huúu ɛzɩ ɛsɔdaa tɩnzɩ nɛ teŋgu nɔɔ kañɩŋa yɔ. Pɔkɔŋ lɛɣʋ po-koyindinaa tɛtʋ. 18 Pɔ-yɔɔ ɛnʋ tɩŋɩɣna nɛ ɛwazɩ ajɛɛ kpeekpe taa ɛyaa yɔɔ. Mbʋ pʋyɔɔ yɔ, ɛnɩ ɛnʋ tɔm.
19 Pɩtɛma lɛ, Abɩraham pɩsɩ ɛ-tʋmlaɖaa cɔlɔ, nɛ ɛ nɛ wɛ pakpaɣ Bɛɛrɩseva nʋmɔʋ. Peeye ɛ́ɛwɛɛ.
Reebeeka lʋlʋʋ tɔm
20 Pɩtɩŋa pʋwayɩ lɛ, Abɩraham nɩɩ se, Milikaa ɖɔɖɔ lʋlɩ e-neu Naahɔɔrɩ abalɩbiya. Ńzɩɩ yɔ: 21-22 Sɔsɔ ñɩnʋ Uusi, nɛ e-neu Buuzi, nɛ Aɖam caa Kemuwɛɛlɩ nɛ Kɛsɛɛdɩ, nɛ Hazoo, nɛ Pilidaasɩ, nɛ Yidilaafɩ nɛ Betuwɛɛlɩ. 23 Mbaa lɛ abalɩbiya lutozo (8) mba Milikaa lʋlɩ Abɩraham neu Naahɔɔrɩ yɔ. Betuwɛɛlɩ ñɔkɔma ɛpaɣlɩ lɛ, ɛlʋlɩ Reebeeka. 24 Naahɔɔrɩ kakpaɣ halʋ lɛlʋ, Milikaa wayɩ. Payaɣ ɛ́lɛ se Rewuumaa. Ɛlʋlɩ ɖɔɖɔ piya. Ńzɩɩ yɔ: Tebaa, nɛ Gaham, nɛ Tahaasɩ, nɛ Maaka.