Snyurtar ber makenar, batmakenar, tabweryar ma karwar
2:1-10
1 Nempa Titus ko,
ka muftutu soranyar mor anftutw botunar.
2 Msurat makenar ma ka rtayan ral nir makeus,
ka nir adat nangafel nema tomwatar ralang sir.
Ma sir a nbal e,
ka nir andaun ngamone,
ka dedesar ma ralele Yesus,
ka rkamis tomwatar,
ma boloka sir rkoman suse nempa ka bonir ral ma rabare.
3 Ma msurat bat makenar a nbal feti ka rmorip e,
rlarat dedesar Ratu.
Ma kete rasompun tomwatar,
kete ramsobak tuak,
nempa ka raftutu kabain ngamonar.
4 Sir rose farane nema bise ma rfatutu bat usberyar ma rkamis sawnir angkir.
5 Ka raftutu sir a nbal nema nir andaun ngamone,
ma nir momorip ranglerap.
Sir bise ma rayatur nir dasdalam ma nangafel,
ma ka rdengar sawnir.
Sir rose farane nema tomwatar ma to ralele Ratu ne to rafbwere Ratu Ni ngribatnir.
6 Ka msurat merwan usberyar a nbal ma ka rtayan ral nir makeus na safe kabain.
7 Ma Titus ko,
ka dedesar ma mose nim adat ngamonar nema mweluk contoh ber sir.
Ma ka muftutu tomwatar mor dalam kateman ma ko a nbal e,
ka mworip a mlwarat safe ma ko muftutu ne.
8 Ma ka muftutu lan anftutw botunar ber sir nema tomwatar to bise ma rfasale ko.
Farlan mose farane tomwatar ma rbangal ko a ne keta rmeat fali to bise ma rfalak kabain yatkar a na kit.
9 Titus,
msurat tomwatar ma rmpan kawar a nbal ma ka rdengar nir bosar ma kete rbangal sir ma ka rafsenange dalmir.
10 Sir a nbal e,
kete ramnang nir bosar a ne nir kabanir.
Ma ka nir adat nangamon nema nir bosar ralele sir.
Farlan nir adat nangafel farane keta tomwatar rmpeang Ratu ma nfair kit a ne Ni anftutwar.
Ratu nfatutu Ni dalamy ngamone la nfair tomwatar monuk
2:11-15
11 Titus,
ka muftutu kabanir monuk ye fali Ratu nfatutu Ni dalamy ngamone ma nfair tomwatar monuk nof nir salar lo.
12 Ratu Ni dalamy ngamone ne nose ma tfenai mpa bise ma tate ninr adat yatkar ma to tlarat makeus saryamprenar.
Ma nose nbal ma kit bise ma tayan tal ninr makeus,
ma tmorip e tamlonry,
ma tlarat Ni mpempeang noak ma lolone tamin saryamprene lere ye.
13 Kit tose kabanir ye la tdaf lere ma keta nose ma dalminrar rsenang.
Iane lere ma Yesus ninr Ray Silai nma nbali saryamprene nor snyain ma idak resi.
I ye Ratu ma Ni silai nlie nlengan ma nfair kit tof ninr salar.
14 I nal tenany ma nmat la nlitan kit tof ninr salar monuk.
I nose farane ma naflerap kit neluk Ni tomwatar,
nema tmpeang lan ma tose kabain ngamonar.*
15 Titus,
ka muftutu kabanir monuk ye ber tomwatar ma ralele Yesus.
Ka mfwalak ber sir ma rose rlarat,
ma msurat sir ma to rose rlarat a ne ma ka rose rlarat a nbal.
Fali yakw kfwair ko ma mweluk mangnrure ber sir,
ma kete mwinrang ma tomwatar to releng ko.