Tomwat Yahudyar rmangadu Paulus ber gubernur Feliks
24:1-9
1 Lerar lim a relak e,
Mangsomp Silai Ananias ma maken Yahudyar ketnir numur mangatnyangkwar sa ngarany Tertulus rti rakmat gubernur Feliks na Kaisarea ma rmangadu Paulus.
2 Noak ma Paulus nait e,
Tertulus nose ma nsoi i ma nfalak,
“Amangw gubernur Feliks ngamone ko!
Ntabw ma mweluk gubernur,
ninr nuse ye namin maline dedesar.
Ma mor nim anfai silai ne mose mbwal kabain ngamonar yadin na ninr nuse nlengan nof luryain.
3 Kam mtak terima kasih na kabanir monuk ma mose na mpenempen a ne,
ma mlangun mor senange.
4 Ma keta to kutanuk melawas lo,
mpa ktwak ma mdwengar safe ma mfalak ye.
5 Kam msalan lo feti tomwate ye biase ma nose mimiri.
Na mpenempen motak e,
i nwayat ma tomwat Yahudyar rakafreye sir.
Ma i neluk mangkei nbal ber tomwatar ma rlarat tomwat sa nof Nasaret.
6 Ma i nose ma nafaknise Ratu Ni Das Silai nbal,
mpa momat i ma mose ma msidang i a mlarat mamy tetetak agamar.
7 Nempa komandan Lisias nma ma nribut ma nal i nof kam,
8 betno nluan tomwatar ma rmangadu i a ne rma ma rbali ko.
Farlan mpweang ma mufai ni salar e,
koko ko a mwenrat i motak nema bise mufai feti safe-safe ma kam mfalak a ne botuan.”
9 Ma tomwat Yahudyar ma ramin a ne rlarat ma rfasale Paulus,
ma rafdiat safe ma Tertulus nfalak.
Paulus nafdiat i a na gubernur Feliks sounlury
24:10-23
10 Mpene gubernur nsein Paulus ma natanuk.
Mpe Paulus a nfalak,
“Yakw kufai feti Amangw neluk mangtetak na nuse ye ngarkar rose ngarkar lo.
Iane nwayat ma kbwaran ma kufbwotin ningw ngrie ye ber ko.
11 Amangw,
koko ko a mwenrat motak feti farpe,
fali ni botuan e,
lere buti resin du ma rsapat a ne yakw kumin Yerusalem ma ktwi kswampayang na Ratu Ni Das Silai ma betno ror yakw kmwa ye.
12 Ma to lain sa ma tomwat Yahudyar rkeban ma kwafre kor tomwatar.
Ma to lain sa nbal ma kose mimiri na Ratu Ni Das Silai ma das sampangar,
ma na mpenempen motak na kote ne.
13 Ma to nir sasaf la rfatutu feti safe ma rfalak na yakw ne botuan.
14 Nempa yakw kyoding ber Amangw feti klwarat Yesus Ni anftutwar ma tomwatar rfalak feti anftutw lepuskwar a ne.
Ma kswampayang ber Ratu ma luryain e,
empmyamar nusmyamar rsatngur ber I a ne.
Nempa klwarat monuk Musa ni tetetkar ma safe-safe ma rarengi na nabyar nir kitpar.
15 Yakw kulele Ratu farlan sir a nbal feti keta nafmorip a nbali mangmwatar monuk,
to lan tomwat ngamonar nempa tomwat yatkar a nbal.
16 Iane nwayat ma kureke ma kose ngamone dedesar nema dalangw a nlerap na Ratu sounlury ma ber tomwatar.
17 Lama ktwi a ktwate kote Yerusalem ngarkar rose ngarkar e,
kbwali yakw ma konr dotyar la ktwulung waingw Yahudyar,
ma klwoik snyompar ber Ratu.*
18 Noak ma kuflerap monuk tenangw ma klwoik snyompe ber Ratu,
tomwat Yahudyar ketnir rof Asia rsalan yakw na Ratu Ni Das Silai.
Nempa noak a ne to mimiri,
ma tomwatar ketnir motak ma ror yakw.
19 Iane lan tomwat Yahudyar ketnir ma rof propinsi Asia ne.
Mpa ni botuan e,
sir a ne ma ka ramin ye.
Nema farlan rkeban ningw salar sa e,
rafbotin ber ko.
20 Ma farlan tate e,
tomwatar ma ramin ye ka rfalak feti ningw sal safe noak ma mangtetak agamar rsidang yakw.
21 Nre kete ningw ngribatnir sa ma kfwalak ber sir feti mangmwatar keta rmorip a rbali,
mpe lere ye rmangadu yakw ber ko.”*
22 Feliks ne nafai Mangnrur Silai Ni dalamtene lo,
mpe nau ngrie ne ma nfalak,
“Tdaf komandan Lisias nma betno ktwetak nim ngrie ye.”
23 Betno nluan suldadwar nir ulun a ne ma najake Paulus nempa to nfengarat i a na sel,
ma ninrang ni keselibur ma rakmat i ma ronry safe-safe motak ma nperlu a ne.
Paulus naflonri ngrie ne ber Feliks ma Drusila
24:24-27
24 Lerar fir a ne relak,
Feliks nma nor sawany Drusila.
Drusila ye tomwat Yahudyar sa i.
Feliks nluan tomwatar ma rtar Paulus nema ndengar i ma natanuk feti felan farpe ma nalele Yesus ninr Ray Silai.
25 Ne Paulus natanuk feti na ninr momorip e,
ka tamlonry,
ma kete tlarat ninr makeus.
Ne natanuk a nbal feti keta Ratu nsidang kit monuk.
Lama Feliks ndengar farane namtaut resi,
mpa nfalak ber Paulus,
“Dengan lo ma mbwali ko a fuky.
Let ngamonar sa la klwuan ma rtar ko a nbal.”
26 Ni lerar ne Feliks nalele feti keta Paulus nal dotyar sa ber i.
Iane nwayat ma dedesar e,
i nluan tomwatar ma ror Paulus ma natanuk nor i.
27 Ngarkar du a relak e,
Perkius Festus nose gubernur ma nlikur Feliks.
Ma Feliks nose ma nafsenange tomwat Yahudyar dalmir,
mpa i to nalin Paulus nof sel.