Paulus natanuk la nafdiat i
22:1-16
1 Paulus a nfalak feti, “Amngur ma Wangur mir kateman! Kete mfyasale yakw fuky ma mdyengar ma kfwalak ye.” 2 Noak ma tomwat ngayadin a ne rdengar ma Paulus natanuk nor Ibrani liriny, ramlin desar. Mpa nfalak, 3 “Yakw ye tomwat Yahudi yakw, ma ramtoranbabe Yakw na Tarsus na yampren Kilikia, nempa raslyai yakw na Yerusalem ye. Tuangguru Gamaliel naftutu yakw ma nangafel desar, ma kufai Musa ni tetetkar ma nal ber nusninrar a ne. Iane nwayat ma klwarat desar Ratu feleles farlan kmi monuk lere ye.* 4 Ma yakw ktwean tomwatar ma rlarat ninr Mangnrur Silai Ni Dalamtene terik ma rmat. Ma komat bate merwane ma knwau sir a na sel.* 5 Mangsomp Silai ma mangtetak agame bise ma raflonri feti safe ma kfwalak ye botuan. Fali sir a ne ma ral surat ber yakw ma kal ber waingw Yahudyar na kote Damsyik. Surat a ne la komat tomwatar ma ralele Yesus, ma kor sir far Yerusalem ma rukun sir.
6 Na ningw mpampane ma ketla kwait Damsyik fafa ler fardu langit, metrat e, snyain idak nof langit nbebar yakw. 7 Mpe kfwuf, ne kdwengar liliri ma nfalak, ‘Saulus, Saulus, safema mtwean Yakw?’ 8 Ne kfwalak, ‘Mangnrur Silai, ise Ko?’ I nbali feti, ‘Yakw ye Yesus tomwat Nasaret ma mtwean Yakw ne.’ 9 Tomwatar ma ror yakw rsalan ngaidak a ne, nempa to rdengar liliri ma natanuk nor yakw. 10 Mpa kwenrat a kbwal feti, Mangnrur Silai, ka kose safe? Ne nfalak, ‘Mumdir ma mtwi kote Damsyik, na iano keta rafbotin ber ko a na safe-safe monuk ma Ratu ntetak ber ko.’ 11 Yakw to kukeban fali ngaodir a ne idak resi. Mpa tbwarngur ma ror yakw ne rkolat yakw far Damsyik.
12 Na iano tomwatar sa ngarany Ananias. I nlarat dedesar Musa ni tetetkar ma tomwat Yahudyar monuk ma ramin iano ralang i. 13 Ananias nma ma nakmat yakw ma namdir a nlosir yakw betno nfalak, ‘Waingw Saulus, mbwelar matmar!’ Nof a ne kukeban desar ma bise ma kfwon i. 14 Mpe nfalak ber yakw, ‘Ratu ma empninrar nusninrar rsatngur ber I a ne nfil ko lo ma mufai Ni mpempeang; ma mswalan a mbwal Ni Mangkarya Malonri nema bise ma mdwengar safe ma I nfalak ber ko. 15 Fali ka ko mweluk Ni mangtungan ma mufwibar ber tomwatar monuk na safe ma mdwengar ma mswalan. 16 Mpa lere ye kete mdwaf lo. Mpwote ko ma mtwak tomwatar ma radiris ko, ma mswampayang ber Mangnrur Silai nema nlure nim salar.’”
Ratu nfil Paulus ma nafwibar Ibar Ngamone ber tomwatar ma to Yahudi sir
22:17-21
17 Paulus nfalak a nbal, “Noak ma kbwali yakw far Yerusalem ma ktwi Ratu Ni Das Silai ma kswampayang, metrat e, kutrufe feti, 18 Yesus ninr Mangnrur Silai nfalak, ‘Musnyalik ma mbwie Yerusalem, fali tomwatar na ye keta to ralele safe ma mswalan ma mufwibar na Yakw.’ 19 Ne nfalak, ‘Mangnrur Silai, sir rafai lo feti yakw ktwi das sampangar ma komat tomwatar ma ralele Ko. Ma kbwabal sir ma knwau sir a na sel.’ 20 Noak ma rfen Nim mangtungan Stefanus, yakw kumin iane ma kyoding ma rfen i. Ma kujake nbal tomwatar ma rfen i a ne nir rabit melaswar.* 21 Nempa Mangnrur Silai nfalak a nbal, ‘Mtwi lo, fali keta kswiduk ko far nus dodo, ber tomwatar ma to Yahudi sir.’”
Ror Paulus far markas
22:22-29
22 Lama tomwatar rdengar farane, rares ma rafwayak, “Tfen tomwate ye, to ubany ma nmorip.” 23 Ne rafwayak dedesar ma rayebas nir rabit melaswar ma ryefar ompak masun far das. 24 Mpa komandan a ne nfarete ma ror Paulus far markas; ma renrat i ma raus a rbabal i, nema rafai feti safe nwayat ma tomwat ngayadin rafwayak farane. 25 Nempa noak ma rkete Paulus ma rose ma raus a rbabal i, i nfalak ber suldadwar nir ulun sa na iane feti, “Farlan tlarat mangfaret Roma ni yayatrwar, tomwat Roma ma to rtetak ni ngrie fuky e, bise ma raus a rbabal i e?” 26 Ndengar farane, i nti nafbotin ber ni komandan, “Maken, tomwate ne tomwat Roma i! Mpa tose farpe i?” 27 Mpa komandan a ne nti nakmat Paulus ma nenrat, “Botuan feti tomwat Roma ko e?” Paulus a nfalak, “Au, tomwat Roma yakw.” 28 Ne komandan a ne nfalak a nbal, “Ka kbwayar doit yadin ber mangfaret Roma, betno kweluk tomwat Roma.” Ne Paulus a nfalak, “Nempa yakw e, tate fali noak ma ramtoranbabe yakw e, ral yakw ma kweluk tomwat Roma.” 29 Noak ma rdengar feti Paulus ye tomwat Roma i, suldadwar ma ketla rbabal i a ne rsue sir. Ma komandan a ne namtaut a nbal fali nluan ma rkete Paulus ror rewe lo.
Ror Paulus far Mangtetak Agame
22:30
30 Ni bobole ne komandan a ne nluan ma mangsompar ulnir ma mangtetak agamar monuk rafburat sir ma rsidang. Nema i nafai botuan feti safe nwayat ma tomwat Yahudyar rfasale Paulus. Mpa nluan ma ralin ni rewe betno ror i far sonirlury.