Stefanus natanuk na tomwat Yahudyar nusnir
7:1-53
1 Mpene Mangsomp Silai nenrat Stefanus,
“Mpe safe ma rfalak a ne botuan e?”
2 Ne Stefanus a nfalak,
“Soranyar mir kateman,
mdyengar ma kfwalak!
Noak ma nusninrar Abraham namin Mesopotamia ma to nti Haran a fuky e,
Ratu mangkuase silai nma nakmat I lo,*
3 ma nfalak feti,
‘Mnwau kalin nim nuse ma nim dasdalam,
ma mtwi nuse ma keta kfwatutu ber ko.’
4 Mpe Abraham a nbie nof Nus Kasdim,
ma nti Haran.
Lama amany a nmat,
Ratu nluan i ma nbie nof a ne ma nma yamprene ma tamin ye.*
5 Noak a ne Ratu to nal ompak lolnir sa nbal nof yamprene ye ber Abraham.
Boloka to anaky a fuky,
Ratu nyoding feti keta nal ompak a ne ber i nor ni dasdalam.*
6 Ne Ratu nfalak ber i,
keta nim dasdalam reluk mangmwar na nus walyet.
Ma keta tomwatar na nuse ne rtean ma rakawar sir doan ngarak raty fat.*
7 Nempa keta kukun nusar ma rakawar sir a ne,
ma keta rbie rof a ne ma rsatngur ber Yakw na ye.*
8 Ne Ratu nal yoyoding ber Abraham feti ka kanak merwanar e,
rsunat sir.a
Lama ramtoranbabe Ishak,
Abraham anaky,
ni lerar wal e nsunat i.
Ne Ishak nsunat anaky Yakub,
ma Yakub nsunat angkir buti resin du a ne nbal.
Mpe sir ye nusninrar.*
9 Nempa sir a ne dalmir maninik wainy Yusuf,
mpa rfenri i far Mesir.
Nempa Ratu nor i,*
10 ma nlitan i nof ni susar monuk.
Ma nal anfai silai ber i ma nafai safe-safe monuk,
nwayat ma rai Mesir dalamy ngamone ber i.
Mpa nfil i ma nkuase monuk ni istana.*
11 Mpene lafar silai nsor monuk yampren Mesir ma Kanaan,
nwayat ma rkoman suse silai.
Ma to tnyam ber empninrar nusninrar lo.*
12 Ne Yakub ndengar feti gandum namin Mesir,
mpa nluan angkir ma lere ye reluk nusninrar,
ma betno luryain ma rti a no.
13 Noak ma rti fen lain du e,
Yusuf nafbotin i ber wanir,
nof a ne rai Mesir nafai Yusuf amany ma wanir.*
14 Ne Yusuf nluan ma rti ral amany Yakub nor ni dasdalam.
Sir monuk e buty itw resin lim.*
15 Ne nusninrar Yakub nor ni dasdalam monuk rti Mesir ma rmorip a na iano terik ma rmat monuk.*
16 Ne ral nir duryar a ne ma rafonak na kubur ma Abraham nselir nor doit perak ketnir nof Hemor angkir na Sikhem.*
17 Nait ni tewat ma Ratu nafdiat Ni yoyoding ber Abraham,
kit ninr tomwatar rtafal ma yadin sir na Mesir.*
18 Mpene rayar sa ma to nafai Yusuf nfarete na Mesir.
19 Rai ne nose ninr tomwatar ma to rmpan sasaf ma ntean dedesar nusninrar,
ma nluan ma ryebas nir kanak memear nema rmat.*
20 Noak a ne ramtoranbabe Musa,
ma i ye kangkir sa ma nangafel resi.
Enany amany rpiare i a na nir das terik bulnar tel.*
21 Ne ryebas i,
nempa rai Mesir anaky bate nal i,
ma npiare i fen anaky.*
22 Ma raftutu Musa na Mesir ni anftutwar monuk,
nwayat ma nafai ma natanuk,
ma ni kuase ma nose kabanir.
23 Noak ma Musa ni ngarak buty fat,
nmpeang ma nti naninuk wainy Israelar.*
24 Ne nsalan farye,
tomwat Mesir nraus a nbabal ni tomwatar sa,
mpa nti ntulung i ma nbalas ma nfen tomwat Mesir a ne.
25 Nafliak feti nose farane,
ni tomwatar rkaul ral feti Ratu nfil i ma nalin sir,
nempa to rkaul ral.
26 Ni bobole ne nsalan a nbal Israelar du a rasong.
Ne nareke ma nafngamone sir ma nfalak,
‘Wangur!
Midu ye awayar a kmi ma safema misong!’
27 Nempa tomwate ma nbabal tbwariny a ne nsikul Musa ma nfalak,
‘Ise ma nfair ko ma mweluk ulun ma mangtetak ber kam?
28 Nre mose ma mfwen yakw,
farlan maniap ma mfwen tomwat Mesir a ne e?’
29 Lama Musa ndengar farane nafla nbie Mesir ma neluk mangum na yampren Midian.
Ne nafsau ma anaky merwanar du.*
30 Ngarak buty fat a relak,
malaektar sa nma nakmat Musa na nus letkape nlosir bubuar Sinai.
Malaekat a ne namin au folur na skiki kakari dalam.
31 Musa nampriang desar ma nsalan farane,
ne nti nlosir ma nsalan fen ngamone,
metryat e,
ndengar Ratu liriny ma nfalak,
32 ‘Yakw ye Ratu!
Ma nusmir,
Abraham,
Ishak ma Yakub rsatngur ber Yakw.’
Ndengar farane namtaut ma ngangasar,
ma to nbaran ma nsalan far skiki kakari ne.
33 Ne Ratu nfalak a nbal,
‘Malin kalin sendalar a ne mof emar,
fali ain ma mumdir a ne,
iane ompak lelerap.
34 Yakw kswalan ningw tomwatar nir susar monuk na Mesir ma kdwengar ma rnrok,
mpa kmwa ma kalin sir.
Ma Lere ye kswiduk ko ma mbwali ko far Mesir.’”*
35 Musa ye ma Israelar rasipur i ma rfalak,
“Ise ma nfair ko ma mweluk ulun ma mangtetak?”
Nempa Ratu nsiduk i ma neluk ulun ma mangtetak noak ma malaekat natanuk nor i nof skiki kakari ma nfolur ne.*
36 I ye ma nrure nus Israelar rbie rof Mesir ma nose kabain mpasalnar ma fanikar na Mesir,
na Tasik Memeye ma na ain letkape ngarak buty fat.*
37 Ne Musa nfalak ber tomwat Israelar a nbal feti,
“Keta Ratu nafmorip nabyar sa nof a kmi far yakw ye.”*
38 Musa ye ma raktem tomwat Israelar rafburat sir a na ain letkape.
I neluk lenre ber nusninrar noak ma malaekat natanuk nor i na bubuar Sinai.
Ma nlangun Ratu Ni ngribatnir ma nose ma tmorip.
Ma nafbotin Ratu Ni ngribatnir a ne ber kit.*
39 Nempa nusninrar to rmpeang ma rdengar i ma rasipur i.
Ma rmpeang ma rbali sir far nus Mesir.
40 Sir rfalak ber Harun,
“Mose ratwawatar ber kam nema sir rnrure kam.
Botuan feti Musa nrure kam ma mbie mof Mesir nempa lere ye to mafai safe diat i.”*
41 Mpe lere ne sir rose walut far sapi anaky ma rloik snyompar,
betno rampumpuki sir a na kabanir ma koko sir a rose ne.*
42 Mpe Ratu natliur sir ma nsalan lonri ma rsatngur ber kabanir a na langit.
Iane farlan ma rarengi na nabyar nir kitap farye,
“Hei!
Tomwat Israelar!
Kmi mimin ain letkape ngarak buty fat lo,
nempa to lain sa fuky ma mfyen binatang ma mlyoik ber Yakw.*
43 Ma ka mibare befak dewa Molokh,
ma walut ftune ma ngarany Refan.
Kmi myose waltwar a ne ma msyatngur ber sir
mpa keta kyebas kmi far ain ma dodo na balisya Babel.”
44 Stefanus nfalak a nbal,
“Noak ma nusninrar ramin ain letkape,
rabare befak.
Befak ne neluk faniak feti Ratu namin iane.
Ratu nluan Musa ma nose befak a ne nlarat safe ma nfatutu ber i.*
45 Befak ne ma nusninrar ral ber empnir nusnir ma ronr na nuse ye noak ma Yosua nfarete.
Ne raktem rafrai ninr nuse rof nus walyetar,
mpe Ratu ntulung sir ma natian nus walyetar ne nof sonirlury.
Mpene befak ne namin nuse ye terik ma rai Daud.*
46 Daud nafsenange Ratu dalamy.
I ntak Ratu ma ninrang ma nafdiri dasar sa ber Ratu nema Yakub empuny nusiny rsatngur ber I na iane.*
47 Nempa Daud to nafdiri das ber Ratu lan Salomo e.*
48 Mpe Ratu Mangamin medase to namtoran das ma tomwatar rose ne,
fali rarengi na nabyar nir kitpar farye,
49 Langit ne Yakw ningw matoran ain,
ma saryamprene ne Ningw afin eme.
Ma mifdiri das safe ber Yakw ye?
Ma keta kswanary na mpe?*
50 To mifai feti koko Yakw kose monuk kabanir ye e?
51 Hei tomwat ulw arwalkwar a kmi,
dalmir a raktem monuk lo ma myepat tlingmir nof Ratu Ni ngribatnir!
Ma mbyangal dedesar Ratu Smwangtany farlan nusmir!*
52 Nabi mpear ma nusninrar to raus a rbabal sir?
Ratu Ni mangsiduk luryanir rfen sir.
Safo sir ye ma rafwibar na Tomwat Botuan sa ni mamae,
ma lere ye minrenre I ber muswar ma rfen I.
53 Kmi mlyangun Musa ni faretar ma malaektar rafbotin nempa to mlyarat!”
Rfen Stefanus
7:54-60
54 Lama mangtetak agamar a ne rdengar safe-safe monuk ma Stefanus a nfalak a ne sir rares desar ma rakarat nif i.
55 Nempa Stefanus nfen ber Ratu Smwangtany ma nfon far langit,
ne nsalan Ratu snyain idak ma Yesus namdir seriny fian.
56 Ne Stefanus nfalak,
“Yakw kswalan langit ntakbanril,
ma Yesus,
Tomwate Anaky namdir Ratu seriny fian.”
57 Mpene mangtetak agamar ne repat tlingnir ma fwayak fwoik sir,
ne rtamyabur ma romat i.
58 Ne rakei i far kote burit ma rose ma rakjai i ror batyar.
Mpe mangtunganb lepuskwar ma rsoi i a ne ralin nir rabit melaswar ma rnau ber tabwer sa ngarany Saulus nema bise ma rakjai i.
59 Noak ma rakjai Stefanus e,
i nsampayang farye,
“O Yesus ninr Mangnrure Silai,
mswaluk smwangtangw.”
60 I nsangitil betno nfalak nor liriny silai,
“Mangnrur Silai,
kete mal sale ye ber sir ma rabare!”
Lama nfalak farane,
i nmat.