Yesus Ni kuase ma ntetak yayatrwar na Yahudyar nir ler Sanari
6:1-5
1 Na ler sa e,
na tomwat Yahudyar nir ler Sanari,a
Yesus nor Ni manglartar rmpan rof let gandum dalam.
Ni manglartar rusir gandum,
ma rfusak kalin kiktir betno rane isnir.*
2 Ne tomwat Farisyar ketnir ma ramin a ne rfalak,
“Safema sir rlangas tetetkar ma Ratu nal ber Musa ne ma rkarya na ler Sanari?”b
3 Ne Yesus nfalak,
“Ali kmi to mbyaca na Kitap Lelerap dalam na safe ma rai Daud nose noak ma i nor ni tomwatar ramlafar e?*
4 I nti Ratu Ni befak dalam ma nal roti ma rsompe ne lo ma nane ketan,
betno nal lian ber ni tomwatar.
Safo nof tetetak agame lan mangsompar ma bise rane roti ne.”*
5 Ne Yesus nfalak,
“Yakw,
Tomwate Anaky Ningw kuase ma ktwetak safe ma tomwatar bise nre to bise rose na ler Sanari!”
Yesus nafngamone mangamluktwar sa na Yahudyar nir ler Sanari
6:6-11
6 Na ler Sanari sa nbal e,
Yesus nti naftutu na das sampayang.
Na iane tomwat sa limany fian namlukut.
7 Mangaftutu Musa ni faretar ketnir ma tomwat Farisyar ranaumat Yesus feti keta I nafngamone tomwate ne na nir ler Sanari nre tate.
Rose farane la ranriak Ni sale.
8 Nempa Yesus nafai nir andanwar.
Mpa I nfalak ber tomwate ma limany namlukut a ne,
“Mwa ma mumdir lury ye!”
Ne tomwate ne nti namdir lury.
9 Mpene Yesus nfalak ber sir,
“Yakw kwenrat a kmi:
Nof Musa ni tetetkar e,
kit tose safe na ler Sanari?
Tose ngamone nre tose yatak?
Tafngamone tomwatar nre tsalan lonri ma rmat motak?”
10 Yesus nfon a nlole monuk sir,
betno nfalak ber tomwat mangamlukut a ne,
“Mkwonrar limam!”
Mpa nkonrar limany,
ne nangamon desar.
11 Mpa mangaftutu Musa ni faretar ma tomwat Farisyar a ne rares desar,
ne rasayak ber sir feti keta rose farpe I.
Yesus nfil Ni mangsiduk buti resin du
6:12-16
12 Na ler sa e,
Yesus nti lenir sa ma nsampayang.
Na iane I nsampayang ber Ratu nronram ngadoe.
13 Lama bobolisin e,
I ntar Ni manglartar,
ne nfil tomwate buti resin du nof sir a ne.
I nafneni sir a na mangsidkwar.
14-16 Sir a ne ye:
Simon ma Yesus nafngare i a na Petrus,
ma Simon wainy Andreas,
Yakobus
ma Yohanes,
Filipus
ma Bartolomeus,
Matius
ma Tomas,
Alfeus anaky Yakobus,
ma Simon ma rtar i feti tomwat Zelot,c
Yakobus anaky Yudas,
betno Yudas Iskariot ma keta nfenri Yesus.
Yesus naftutu ma nafngamone tomwatar yadin
6:17-19
17 Mpene Yesus nor Ni mangsidkwar rnrunrur rof lenran a ne,
ma rnar a na ain manesan.
Na iane Ni manglarat walyetar rabut sir lo.
Tomwatar yadin rma rof monuk propinsi Yudea ma Yerusalem ma rof nus laran Tirus ma Sidon.
18 Sir rma ma rdengar Ni anftutu,
ne rtak ma nafngamone sir rof nir maningkyar.
Yesus natian kalin smwangat yatkar nof sir a nbal.
19 Tomwatar monuk a ne rareke ma rasyol I,
fali kuase ma nbie nof I a ne la nafngamone sir.
Yesus natanuk na suse ma senange
6:20-26
20 Yesus nfon Ni manglartar ma nfalak,
“Ngamone ber tomwatar ma rdaun feti to ubnir sasaf,
fali keta reluk Ratu Ni tomwatar noak ma I nfarete neluk Rai.
21 Ngamone ber a kmi ma lere ye mimlafar,
fali keta Ratu nafbotan a kmi!
Ngamone ber a kmi ma lere ye mtyasing,
fali keta Ratu nose ma myalip.
22 Ngamone desar ber a kmi ma tomwatar ma to rmpeang a kmi,
ratian a kmi,
rarikan a kmi,
ma rsoi lamain a kmi fali mlyarat Yakw,
Tomwate Anaky.*
23 Luryain e nusnir rose nabyar farane nbal.
Mpa farlan tomwatar rose kmi farane,
ka mimpumpuki kmi ma dalmir a rsenang,
fali keta myonri berkat silai ma Ratu nau ber a kmi a na surga ne.*
24 Nempa tomwat mangoskayar a kmi,
keta mtyungan suse maberat desar,
fali na mir momorip e,
msyenang lo.
25 Kmi ma lere ye mibotan keta mtyungan suse maberat desar,
fali keta mimlafar!
Ma kmi ma lere ye myalip keta mtyungan suse maberat desar,
fali keta dalmir suse ma mtyasing!
26 Farlan tomwatar monuk rdangin a kmi,
keta mtyungan suse maberat desar,
fali noak a ne nusnir rdangin nabi wawatar farane nbal.”
Mkyamis mir muswar
6:27-36
27 “Nempa kfwalak ber a kmi ma mdyengar Yakw lere ye:
Mkyamis mir muswar,
ma myose ngamone ber tomwatar ma to rmpeang a kmi.
28 Msyampayang ber Ratu nema nberkat tomwatar ma rangoak a kmi,
ma msyampayang a nbal ber tomwatar ma rose yatak a kmi.
29 Farlan tomwatar rtef totokmir balisyae e,
ka myinrang ma rtef totokmir balisyae nbal.
Farlan tomwatar ral mir rabit melaswar,
myal a mbyal mir rabit seselwar.
30 Farlan tomwatar rtak kabanir sa rof a kmi e,
myal ber sir.
Farlan tomwatar rkampres mir kabanir e,
ka kete mtyak a mbyali.
31 Safe-safe ma kmi mpyeang ma tomwatar rose ber a kmi a ne,
ka myose farane ber sir a nbal.*
32 Farlan mkyamis lan tomwatar ma rkamis a kmi,
keta Ratu to nal sewe ber a kmi.
Fali tomwat salar rkamis tomwatar ma rkamis sir a nbal.
33 Farlan myose ngamone ber lan tomwatar ma rose ngamone kmi,
keta Ratu to nal sewe ber a kmi.
Fali tomwat salar rose ngamone farane nbal.
34 Ma farlan kmi myal doit ber lan tomwatar ma bise ral a rbali ber a kmi,
keta Ratu to nal nimet ber a kmi.
Tomwat salar rose farane nbal,
fali ralele feti keta ral a rbali monuk.
35 Ma kmi e,
ka kete myose farane!
Ka mkyamis mir muswar ma myose ngamone sir.
Myal doit ber mir muswar ma kete milele feti keta ral a rbali ber a kmi.
Farlan kmi myose farane dedesar,
keta mir sewe silai,
ma keta kmi myeluk Ratu Mangamin medase angkir.
Fali Ratu Ni dalamy ngamone ber tomwatar ma to rafai rose terima kasih,
ma ber tomwat yatkar a nbal.d
36 Ka mir lolompang ber tomwatar monuk,
feleles farlan Amir ma Ni lolompang ber tomwatar monuk.”
Kete mfyasale tomwatar
6:37-42
37 Yesus nfalak ber tomwat ngayadin,
“Ka kete mfyasale tomwatar,
nema Ratu kete nfasale kmi a nbal.
Kete myukun tomwatar,
nema Ratu kete nukun a kmi a nbal.
Mlyure tomwatar nir salar,
nema Ratu nlure mir salar a nbal.
38 Myal ber tomwatar nema Ratu nal a nlengan nof iane ber a kmi a nbal.
Farlan tomwate nsar fase,
keta ntean ma nawawan ma ntafal a nbal terik ma nputuk.
Farlan myal ber tomwatar farane,
keta Ratu nal farane nbal ber a kmi.”
39 Mpene Yesus nfalak tnyanuk pupular sa ber sir farye,
“Farlan matbole nkolat matbole,
botuan feti keta radu a rfufw far meloke dalam nre?*
40 To manglarat fen lese nbal ma tomwatar ralang i a rlengan nof ni tuangguru,
nempa farlan i nareke ma nafai safe-safe ma naftutu ne keta i feleles nor ni tuangguru.*
41 Katutun sit ma namin wamir matnir e,
kmi msyalan,
ma balak ma namin matmir e,
to mkyeban.
42 Safema kmi mfyalak ber wamir feti,
‘Awa,
mwa ma kwalin katutun sit kof matam dalam a ne,’
safo balak ma namin matmir a ne to mkyeban.
Hei tomwatar ma myose felmir farlan tomwat ngamonar,
myalin kalin balak ma namin matmir dalam a ne fuky,
nema mkyeban miflyonri ma bise myalin kalin katutun sit myof wamir matnir.”
Tomwate ni adat nfatutu dalamy
6:43-45
43 Yesus nasaur ber tomwat ngayadin farye,
“Katutun ma nangafel keta buany nangafel,
ma katutun ma to nangafel keta buany to nangafel a nbal.
44 Kit tafai tal katutun nof buany.
Fali tomwatar to rtikar ara buany rof skiki kakari,
ma to rtikar anggur buany rof katutun matdyemnir.*
45 Tomwat ngamone keta nose lan ngri ngamonar fali ndaun lan kabain ngamonar.
Tomwat yatak keta nose lan ngri yatkar fali ndaun lan kabain yatkar.
Safe ma tomwate nfalak a ne,
iane nof dalamy.”
Das makoran ma das mamafun
6:46-49
46 Yesus nfalak ber tomwat ngayadin a nbal,
“Kmi to myose mlyarat safe ma Yakw kfwalak mpa ubany safe ma mtyar Yakw feti,
‘Mangnrur Silai,
o Mangnrur Silai.’
47 Tomwatar ma rakmat Yakw ma rdengar Ningw ngribatnir,
ma rose rlarat,
keta kal tnyanuk pupule farye:
48 Sir farlan tomwate ma nafdiri ni das.
Luryain e,
nkal ompak melaman desar,
betno naftoran fanderen na bati das.
Nait ma kjaip silai nma e,
to bise ma nrake das a ne,
fali fanderen namkoran.
49 Nempa ise ma ndengar Ningw ngribatnir ma to nose nlarat,
i farlan tomwate ma nafdiri das na ompak ma to fanderen.
Nait ma kjaip a nma e,
nrake das a ne ma namsos desar.”