Yesus naftutu feti felan farpe ma tulung tomwatar ma rawatan
6:1-4
1 Yesus naftutu tomwatar a nbal farye:
“Ka minremi,
ka kete myose mir agame ni tetetkar na tomwatar sonirlury nema rsalan ma rdangin a kmi.
Farlan kmi myose farane keta Amir na surga to nal sewe ber a kmi.*
2 Mpa farlan myal kabar sa ber tomwatar ma rawatan la mtyulung sir,
ka kete mfyalak ber tomwatar.
Farlan kmi mfyalak ber tomwatar na safe ma kmi myose ne,
iane farlan tomwatar ma rose felnir farlan tomwat ngamonar.
Sir rfatutu nir ngamone ne na das sampangar ma srat dalmir,
nema tomwatar rsalan ma rdangin sir.
Yakw kfwalak ber a kmi,
tomwatar ma rose farane ronri nir sewe lo rof tomwatar ma rdangin sir a ne.
3 Nempa farlan kmi myal kabar sa ber tomwatar ma rawatan la mtyulung sir,
ka kete myose ma tomwatar rafai.
Iane feti farlan limir fian nal kabanir sa,
ka limir bayal kete nafai.
4 Farlan myal kabar sa ber tomwatar la mtyulung sir e,
ka myose ma tomwat walyetar kete rafai.
Farlan kmi myose farane keta Amninrar na surga nsalan safe ma tomwat walyetar to rsalan a ne,
ma keta I nbalas ber a kmi.”
Yesus naftutu Ni manglartar ma rsampayang
6:5-15
5 Yesus nfalak,
“Farlan msyampayang e,
ka kete mbyalak tomwatar ma rose felnir farlan tomwat ngamonar.
Sir a ne rmpeang ma rsampayang e,
ramdir a na das sampangar,
ma srat matnir,
nema tomwat walyetar rsalan sir.
Yakw kfwalak ber a kmi feti ni botuan e,
lan iane sewe ma sir ronri.*
6 Nempa noak ma msyampayang,
ka mtyi kamar ma mfyolat a mtyeri kmi,
betno msyampayang ber Amir ma to msyalan I a ne.
Fali keta Amir nsalan safe ma myose ma tomwatar to rafai ne.
Ma keta I nal sewe ber a kmi.
7 Ma farlan msyampayang e kete mlyoling a mkyakit ngribatnir mbyalak tomwatar ma to rafai Ratu.
Fali sir rdaun feti farlan rsampayang melaswar keta Ratu ndengar nir sampangar a ne.
8 Mpa ka kete msyampayang mlyarat tomwatar a ne,
fali Amir nafai safe-safe monuk ma mpyerlu noak ma to mtyak myof I a fuky.
9 Mpa ka msyampayang farye:
Kam Amyamar Ko mumin surga,
Ka weni tomwatar ralang Ko ngaram.
10 Ka weni Ko mweluk Rai ma mfwarete tomwatar na saryamprene,
ka weni tomwatar rlarat Ko Nim mpempeang na saryamprene feleles farlan sir ma ramin surga ma rlarat Nim mpempeang a nbal.
11 Mwal tnyame dengan ber kam lere ye.
12 Ma mlwure mamy salar,
farlan kam mlwure tomwatar ma rose yatak kam a nbal.
13 Ma kete mwinrang ma mfufw far sale dalam,
nempa mwalin kalin kam mof kabain yatkar.
[Fali Ko ye ma Nim kuase,
ma lan Ko ye ma mfwarete,
ma Nim dadangin terik ma dedesar.
Amen.]
14 Fali farlan kmi mlyure tomwatar ma rose yatak a kmi,
keta Amir ma namin surga ne nlure mir salar a nbal.
15 Ma farlan kmi to mlyure tomwatar ma rose yatak a kmi,
keta Amir to nlure mir salar a nbal.”*
Yesus naftutu tomwatar ma rpuase
6:16-18
16 Yesus nfalak a nbal,
“Farlan mpyuase e ka kete mbyalak tomwatar ma rose felnir farlan tomwat ngamonar.
Sir rose felnir farlan tomwatar ma rampalim nema tomwat walyetar rsalan feti sir rpuase.
Yakw kfwalak ber a kmi feti ni botuan e,
lan iane sewe ma sir ronri.
17 Nempa farlan mpyuase e,
ka miraup ma msyisir ulmir.
18 Kmi myose farane nema tomwatar kete rafai feti kmi mpyuase,
nempa lan Amir ma namin surga ne ma nafai.
Mpe Amir ma tomwatar to rsalan a ne,
keta rsalan safe ma myose ma tomwatar to rsalan a ne,
ma keta I nbalas ber a kmi.”
Yesus naftutu tomwatar ma rabutin nir anoskai na surga
6:19-24
19 Yesus nfalak a nbal,
“Ka kete mibutin mir kabanir a na saryamprene ye,
fali keta langatrar rane ma wengar rafyatak kabanir a ne.
Ma mangamnangar keta rma ma ramnang a nbal.*
20 Nempa ka mibutin mir kabanir a na surga,
fali keta langatrar to rane ma wengar to rafyatak kabanir a ne.
Ma mangamnangar to bise rma ma ramnang.
21 Fali ain mpe ye ma mnyau mir kabanir ma kotkir,
keta mdyaun kabanir a ne dedesar.
22 Matmir ye farlan damar ma nodir dalmir.
Farlan matmir a rangafel,
keta bise ma nodir monuk dalmir.*
23 Nempa farlan matmir bubul keta dalmir makrokap a nbal.
Mpa farlan matmir to rangafel keta safe-safe monuk a ne makrokap a nbal.
24 Tomwatar to bise ma rkarya ber bosar du.
Fali keta nkamis sa nlengan nof sa,
nre keta i nalarat liry ber sa,
ma sa e to nfaduli.
Feleles farlan kmi a nbal,
kmi to bise ma mkyarya ber Ratu,
ma dedesar ma mdyaun kabain saryamprenar.”*
Ka kete dalmir suse na mir momorip
6:25-34
25 Yesus nfalak a nbal,
“Mdyengar ma kfwalak,
ka kete dalmir suse na mir momorip feti keta mine safe nre myenum safe.
Ma ka kete dalmir suse nbal feti keta mfyonak safe.
Fali mir momorip ubany nlengan nof tnyamar,
ma tenmir ubany nlengan nof rabtyar.
26 No msyalan mangkyar na langit,
sir to ryefar finyar,
to ral isnir,
ma to rabutin nir tnyamar na lumbung.
Nempa Amir ma namin surga ne nfane sir.
Kmi mifai feti keta Ratu nsalan a kmi a nlengan nof mangkyar a ne.
27 Tomwatar ma dedesar e dalmir suse keta to bise ma rtafal nir ngarkar,
boloka jam lese motak.
28 Mpa ubany safe ma dalmir suse na rabtyar?
No msyalan bung lelemukwar ma ratrump a na letar,
sir to rkarya ma to raosyamp.
29 Yakw kfwalak ber a kmi,
rai Salomo ma naoskai desar e to nfonak rabit ngafelar farlan bungar a ne.*
30 Urwar ma lere ye ramin lete dalam ma bobole tomwatar rapu motak e Ratu nafyamping sir ma nangafel.
Ma keta I npiare kmi nlengan nof urwar a ne!
Ma safema to milele I!
31 Mpa ka kete dalmir suse ma mfyalak feti keta mine safe,
myenum safe,
nre mfyonak safe.
32 Tomwatar ma to ralele Ratu,
dedesar ma ranriak kabanir monuk a ne.
Nempa kmi e kete myose farane,
fali Amir ma namin surga nafai feti kmi mpyerlu safe-safe monuk a ne.
33 Mpa ka mireke ma Ratu nfarete neluk Rai na mir momorip a fuky,
ma ka myose mlyarat Ni mpempeang.
Mpe keta I ntafal safe-safe monuk a ne ber a kmi.
34 Mpa ka kete dalmir suse na bobole.
Fali ni bobole e keta mtyungan suse felan sa nbal.
Mpa ka mdyaun lan suse ma diat a kmi lere ye,
fali iane dengan lo ma kete mtyafal.”