Inyarubha ya kabhiri ya
Yowana
Obhukeesya
1
1 Anye omukaruka weemwe mu‑riikirisya, enikukaamira awe omusubhaati omwendwa unu usorerwe na Nyamuwanga, aamwi na abhaana bhaawo. Ni chimari nibheendere bhoone. Nitari anye omwene era unu nibheendere, tari na abhaanu bhoone bhanu abhamenya echimari. 2 Echibheenda kwa okubha eswe na emwe, echimenya echimari chinu chiyigiiye, ka wone echigenderera okuchimenya akajaanende.3 Mbe, Raata Nyamuwanga na Omwana waaye Yeesu Kirisito, abhachiyaana obhwitiriranya, echigongo na omurembe, eswe bhanu echiruubha echimari na eryenda.
Echimari na eryenda
4 ꞉Naakondeeywe muno nejire naarora abhaana bhaawo abharebhe nibharuubha echimari, rwa kutyo Raata Nyamuwanga ꞉aachiragiriiye. 5 Woori, omusubhaati omwendwa, ku‑nyarubha inu, enikusabhwa ugayuke echiraagiro chinu echaayika ati cheendane. Echiraagiro chinu enikukaamira chitari chiyaaya wuri, tari ni chiryachirya cha kara chinu chaariga chiri nacho okusookerera omwanya gunu ꞉chaambire okwikirisya Yeesu.a 6 Okwendana ni kugenderera okugayuka ebhiraagiro bhya Nyamuwanga. Cheendane nicho echiraagiro chinu ꞉mwoonguuwe okusookerera omwanya gunu ꞉mwaambire okwikirisya Yeesu Kirisito.
Okukengya inguru ya orubheeyi
7 Mbe, enaayika kutyo, kwa okubha abhabheeyi bhaafu bheebhukire ku‑chaaro kunu. Abhaayika ati Yeesu Kirisito ꞉eejire atari na omubhiri rwa gwa omuunu.b Omuunu woonewoone unu kaayika kutyo ni omubheeyi, ka wone niwe omusoko wa Kirisito.c 8 Woori, emwe abheene, mwiyangarire, korereki mwasiga okufwirwa‑mo ku‑mirimu jinu mukorere imbere ya Nyamuwanga, tari muramire echiyaanwa chikobhere. 9 Omuunu woonewoone unu atakugenderera okuruubha ameeyigisyo ga Kirisito, ka wone kaagayindura, oyo atari na obhumwi na Nyamuwanga. Nawe, unu kaagenderera okugaruubha, oyo ari na obhumwi na Raata Nyamuwanga na Omwana waaye wone. 10 Mbe, omuunu woonewoone akaaja kw‑imwe unu atakwiyigisya echimari inguru ya Kirisito, mwasiga okumukuma mu‑misi jeemwe, ka wone mwasiga okumukeesya rwa omwikirisya oweejaanyu. 11 Okubha omuunu unu kaamukeesya, kaasangira aamwi nage mu‑bhibhiibhi bhinu kaakora.
Obhukeesya bhwa obhuteero
12 Woori, niri na emisango myafu ja okubhabhwira, nawe nitakwenda okubhakaamira ku‑rupapura era. Tari, eniiyikanya okuuja okubhagosorera na okusimura na emwe chibhuganganyiisye ameeso, korereki bhoone chikondererwe aamwi.
13 Mbe, abhaana bha omuyara oweejaanyu unu asorerwe na Nyamuwanga, abhakukeesya.