Okwibhurwa kwa Yeesu
2
1 Mu‑siku ejo ja okwibhurwa Yowana, Kayisaaria Awuguusito ˆnaaragirira ati, abhaanu bhoone bhanu bhari mu‑bhyaro bhya obhutungi bhwaye, bhaje okubharwa. 2 Okubharwa kunu, nikwo kwariga kwa okwamba na ꞉kwabheeye‑wo omwanya gunu Kireniyo aariga ari musiibha wa Siiriya. 3 Kurwa ejo, abhaanu bhoone nibhagenda okubharwa bhuri muunu mu‑musi gwabho.4 Jejefu wone, ˆneemuka okusooka mu‑musi gwa Najareeti mu‑mukoowa gwa Gariraaya, ˆnaariinya okuja mu‑musi gwa Bhetereyeemu mu‑mukoowa gwa Yuudeya. Bhetereyeemu nigwo gwariga guri musi gwa omukama Dawudi na Jejefu aariga ari wa mu‑ruganda rwaye.
5 Jejefu ꞉aagendere okubharwa na Maryamu unu aariga ateeye‑ko obhuko. Maryamu oyo aariga afugaaye. 6 Bhachaari Bhetereyeemu eyo, omwanya gwa Maryamu okwibhura nigukinga. 7 ˆNeebhura omwana waaye wa obhubhere ari wa echirume. ˆNaamuswikira emyenda, ˆnaamumaamya mw‑itubha rya okuriisisya‑mo jiingʼa, kwa okubha ꞉bhataabhwene obhumaamo mu‑nju ya abhagenyi.
Abhareefi abhasoromokerwa na maraayika
8 Mu‑masambu ga Bhetereyeemu awo, bhaariga bhari‑mo abhareefi nibhaangariraga ebhitunganwa bhyebhwe mu‑ngeta. 9 Mbe, maraayika umwi wa Raatabhugenyi ˆnaabhasoromokera na rikusyo rya Raatabhugenyi niribhasingira na okubhamirikira mbaara joone. Nibhagwatwa na echibhabhuko chaafu muno. 10 Nawe, maraayika oyo ˆnaabhabhwira ati, “Musige okuubhaya! Niijire okubhareetera emisango ja ekisi, jinu jirikora abhaanu bhoone bhakonderwe muno. 11 Reero inu, mu‑musi gwa Dawudi, eebhurwa‑mo Omuchungusi weemwe. Omuchungusi oyo niwe Kirisitob Raatabhugenyi. 12 Echibharikisyo cha okubheeresya ejo ni ati, omuja okusongʼana omwana omurera afundikiywe emyenda, amaamibhwe mw‑itubha rya okuriisisya‑mo jiingʼa.”
13 Awoawo, echise echinene muno cha bhamaraayika abheejaabho okusooka mu‑rwire nibhabha aamwi nage. Niwo bhoone, nibhakuuya Nyamuwanga ati,
14 “Nyamuwanga wa mu‑rwire akusibhwe!
Ku‑chaaro anu, omurembe gubhe ku‑bhaanu bhanu eendere.”
15 Bhamaraayika abho bhejire bhaasubha mu‑rwire, abhareefi nibhaayikana ati, “Chigende Bhetereyeemu, korereki chirore jinu Raatabhugenyi aachibhwira ku‑njira ya maraayika.” 16 Kurwa ejo, nibhagenda bhwangubhwangu. Bhejire bhaakinga nibhasongʼana Maryamu na Jejefu, nibharora omwana omurera oyo amaamibhwe mw‑itubha. 17 Bhejire bhaamara okumurora, nibhabhatondera joone jinu maraayika aabhabhwira inguru ya omwana oyo. 18 Abhaanu bhoone bhanu ꞉bhoonguuwe, ꞉bhaaruguurire muno inguru ya emisango ja abhareefi abho. 19 Nawe, Maryamu ˆnaajituura joone ejo mu‑mutima gwaye, ˆnaajiiganirisyaga. 20 Abhareefi abho nibhasubha‑wo, keenu nibhasiimaga Nyamuwanga na okumukusya ku‑joone jinu ꞉bhoonguuwe na okurora, kwa okubha jinu ꞉bhaabhwiriiywe na maraayika nikwo kutyo joone ꞉jaabheeye.
21 Omwana oyo ejire aakingya siku etaanu na esatu okusookerera eebhurwe, nibhamutenda. Nibhamutoga risiina Yeesu, kwa okubha niryo risiina rinu maraayika urya aariga abhabhwiriiye okumutoga, omwanya gunu nyiramwene aariga achaari okugega inda.
Omwana Yeesu kaasirwa mw‑Iyekaru
22 Mbe, jisiku ja Maryamu na Jejefu okwesibhwa nijikinga, rwa kutyo jeendwaga na ebhiraagiro bhya Muusa. Niwo ku‑bhubhiri bhwebhwe nibheemuka, nibhasira Yeesu Yerusareemu korereki bhamutuure mu‑mabhoko ga Raatabhugenyi Nyamuwanga. 23 Okubha, jikaamirwe mu‑bhiraagiro bhya Raatabhugenyi ati, “Bhuri mwana wa obhubhere wa echirume ni musorwa wa Raatabhugenyi.”c
24 Aamwi na ejo, bheendaga bhasoosye echiyaanwad chinu echaayikwa mu‑bhiraagiro bhya Raatabhugenyi ati, “Musoosye echiyaanwa cha okwesibhwa, ebhiguuti bhibhiri amwi ebhyana bhibhiri bhya echiguuti.”e
25 Yerusareemu awo, aariga ari‑wo omuunu umwi unu aatogwaga ati, Simiyooni. Simiyooni oyo aariga ari murengeresi na aagayukaga Nyamuwanga. Omuunu oyo aarindiriraga okurora obhuchungusi bhwa Nyamuwanga ku‑Bhayisirayeeri. Mwoyo Mweru aariga ari aamwi nage. 26 Mwoyo Mweru aariga amumenyesiisye ati, atarifwa achaari okurora Kirisito wa Raatabhugenyi Nyamuwanga. 27 Kurwa ejo, abheebhusi bha Yeesu bhejire bhaasira Yeesu mw‑Iyekaru, korereki bhakore kutyo ebhiraagiro bhyayikaga, Simiyooni wone Mwoyo Mweru ˆnaamutangasya ati eengire omwo. 28 Omwo, ˆnaaramira omwana Yeesu mu‑mabhoko gaaye na okusiima Nyamuwanga kutya,
29 “Woori Raatabhugenyi, rwa kutyo ꞉waambwiriiye,
nikwo kutyo jaakuumira.
Woori ukaansigire anye omukosi waawo, nimaame kwa omurembe,
30 kwa okubha, neerorera obhuchungusi bhwawo,
31 bhunu wiiraabhire imbere ya abhaanu bhoone.
32 Obhuchungusi obhwo, ni bhweru bhwa okweresya injira yaawo,
ku‑bhaanu bhanu bhatari Bhayawudi,
na okuyaana abhaanu bhaawo Abhayisirayeeri rikusyo.”
33 Emisango jinu Simiyooni ꞉aayikire inguru ya omwana oyo, nijiruguusya esemwene na nyiramwene. 34 Simiyooni ˆnaabhasabhirwa amabhando, ˆnaabhwira Maryamu nyiramwene omwana oyo ati, “Ringira! Omwana unu asorerwe na Nyamuwanga ati, asingaarisye Abhayisirayeeri bhaafu, na arichungura Abhayisirayeeri abhandi bhaafu. Aribha echibharikisyo chinu chiriremwa na abhaanu. 35 Jiribha kutyo, korereki jinu jaariga jiyibhisire mu‑myoyo jeebhwe, jituurwe ku‑bhweru. Awe omwene, mu‑mutima gwawo uryungwa obhwasye muno, wuti usomerwe imbanda.”
36 Yerusareemu awo, aariga ari‑wo omuragi umwi wa echigasi unu aariga akokoowe muno. Risiina ryaye aatogwaga Aana, omuyaasya wa Faanweri, wa mu‑ruganda rwa Asyeri. ꞉Eekaaye na omurume waaye miguuga etaanu na ebhiri era, omurume waaye ˆnaafwa. 37 ˆNaabha omutumbagasi, ˆnaakingira rikura rya miguuga makumi gataanu na gasatu na ena. Omugasi oyo, aasiibhaga mw‑Iyekaru, mwanya gundi aasabhwaga mu‑ngeta na mu‑mwisi kurya wuri. 38 Ku‑mwanya ogwoogwo, Aana oyo ˆnaakinga ku‑mwana oyo, ˆnaamba okusiima Nyamuwanga. ˆNaayika emisango ja omwana oyo, ku‑bhaanu bhoone bhanu bheeyikanyaga ati Nyamuwanga aryerura Yerusareemu.
Okusubha Najareeti
39 Mbe, Jejefu na Maryamu nibhamara okukora joone jinu ebhiraagiro bhya Raatabhugenyi bhyendaga. Nibhasubha ewaabho mu‑musi gwa Najareeti, mu‑mukoowa gwa Gariraaya. 40 Omwana oyo ˆnaakura, ˆnaakomeera, ˆneejusibhwa obhwengeeso. Amabhando ga Nyamuwanga gaariga gari aamwi nage.
Yeesu mw‑Iyekaru rya Nyamuwanga
41 Abheebhusi bha Yeesu bhaariga bhanarire okugenda Yerusareemu bhuri muguuga, mu‑chikukuru ya Okwambuka.f
42 Okuruubhana na jitungwa jeebhwe, omwanya gunu Yeesu ꞉aakingiisye miguuga ekumi na ebhiri, ꞉bhaagendere nage Yerusareemu mu‑chikukuru ya Okwambuka. 43 Bhejire bhaamara ichikukuru eyo, niwo abheebhusi bha Yeesu, nibheemuka okusubha iika nawe omwana oyo Yeesu ˆnaasigara Yerusareemu, abheene okumenya wuri. 44 Bheetogeraga ati, ari aamwi na abheejaabho bhanu bhaasubhaga iika. Bhejire bhaamara rusuku rumwi mu‑njira, nibhaamba okumuyenja mu‑bhayiri bheebhwe na mu‑bhasaani bheebhwe. 45 Bhejire bhaamubhura, nibhasubha Yerusareemu okumuyenja.
46 Orusuku rwa kasatu, nibhamusongʼana mw‑Iyekaru, eenyanjire agatigati ya abheeyigisya bha ebhiraagiro bhya Nyamuwanga, ˆnaabhategeresyaga na okubhabhuusirisya amabhuusyo. 47 Abhaanu bhoone bhanu bhaamutegeresyaga kutyo aasimuraga, nibharuguura muno inguru ya obhwengeeso bhwaye na amasubhyo gaaye.
48 Abheebhusi bhaaye bhejire bhaamurora, nibharuguura muno. Nyiramwene ˆnaamubhuusya ati, “Omwana waani, ni kurwa ki waachikorera kutya? Rora anye na esomwana, chaari nichikuyenja chiyayire muno!” 49 Omwene ˆnaamusubhya ati, “Ni kurwa ki omunyenja? Mutakumenya ati, jinyiire okubha mu‑nju ya Raata waani?” 50 Abheebhusi bhaaye, ꞉bhataarisombookeeywe risubhyo ryaye.