Yoona kaabhiyirirwa echigongo cha Nyamuwanga
4
1 Nyamuwanga ejire aasiga okusingaarisya Abhaninaawi, ogwo ꞉gutaakondeeye Yoona, ˆnaabhiyirwa muno. 2 ˆNaasabhwa Raatabhugenyi ati, “Awe Raatabhugenyi, bhunu naariga niri mu‑chaaro chaani, ꞉neeganirisiisye ati nikwo kutyo owuja okukora. Niyo isonga ꞉neerukire okuja Tarisiisi. Naariga nimenyere ati awe uri wa obhwitiriranya na echigongo, utakubhiyirwa bhwangu, wijuuye eryenda, ka wone wimariiriiye siku joone okusiga okusingaarisya abhaanu. 3 Mbe woori, Raatabhugenyi, enikusabhwa unyite, kwa okubha anye okwikara ni nyakara nifwe.”4 Raatabhugenyi ˆnaasubhya Yoona ati, “Owitogera ati ni kisi okubhiyirwa kutyo?”
5 Niwo Yoona ˆnaawuruka mu‑musi gwa Ninaawi, ˆnaagenda, ˆneenyanja ebhuwuruka esuubha ya omusi ogwo. ˆNeeyumbakira echiwuuna awo. Ejire aamara, ˆneenyanja mu‑mbewo ya echiwuuna echo, ˆnaategereraga arore chinu echija okukorekana mu‑musi ogwo. 6 Niwo Raatabhugenyi Nyamuwanga ˆnaaragirira akati kanu akaranda kamere na okukura awoawo. ꞉Aakamesiisye korereki Yoona abhone imbewo na okumuwonʼya mu‑nyaako inu aariga ari nayo. Yoona ˆnaakondererwa imbewo ya akati ako muno. 7 Nawe orusiku rwa akabhiri mu‑ruguru, Nyamuwanga ˆnaaragirira riwororo ribhurungure akati ako nikooma. 8 Ejire risuubha ryawuruka, Nyamuwanga ˆnaatiimura omuyaga gwa ribhirabhira, niguyemba okusooka ebhuwuruka esuubha. Risuubha niryocha Yoona mu‑rwotoosi, ˆnaarebherera okuyutuka. Niwo ˆnaayika ati, “Anye okwikara ni nyakara nifwe.”
9 Nawe Nyamuwanga ˆnaasubhya Yoona ati, “Woori Yoona, owitogera ati ni kisi okubhiyirwa kutyo inguru ya akati ako era?”
Omwene ati, “Cha! Niri na risungu rya okufwira‑ko!”
10 Nawe, Raatabhugenyi ˆnaamubhwira ati, “Awe owunyaakirira akati kanu ꞉kaamerere na okukura ingeta imwi, ingeta inu ꞉yaaruubhiiye nikooma. Awe ꞉utaakayambire nooro ꞉utaakasakiiye echiinu choonechoone bhunu kaakuraga. 11 Woori, mu‑musi omukuru gwa Ninaawi ogwo, bhari‑mo abhaanu bhisira egana rimwi na makumi gabhiri (120,000) bhanu bhatakutura okumenya omusango gwa ekisi na omubhiibhi. Ka wone, bhiri‑mo ebhitungʼanwa bhyafu muno. Nyabhuriko anye wone, jiiyire muno nifwire echigongo omusi ogwo.”