ꑳꇊꌒꇌꇓꈓꊿꅥꁖ
52
1 ꑭꄂꏦꑍꊏꋋꈓꃅꄉꃰꃅꄻꆹ，ꋌꑳꇊꌒꇌꄉꃰꃅꊯꊪꈎꄻ。ꋍꀉꂿꆹꉳꃀꄣꂓ，ꆀꇂꊿꑱꆀꂱꄰꀋꃋꉬ。 2 ꑭꄂꏦꆹꒀꑸꏠꌟꃅꌤꆿꑳꀊꊆꉜꇬꄷꅠꑠꀉꄂꃅꇬꎷ。 3 ꑠꅹ，ꑳꀊꊆꇨꇅꃃꅩꌬꀕꌊꑳꇊꌒꇌꇓꈓꌋꆀꒀꄊꇩꏤꊿꊝꄉ，ꉹꁌꈧꌠꋍꂾꄉꋌꈹꉈꏭꎭꀐ。ꊁꆏ，ꑭꄂꏦꇁꀠꀘꇍꃰꃅꆼꁏ。 4 ꋌꃰꃅꄻꈬꈎꐛꄹꈎꊰꆨꊰꑋꄹꉇꌠꆏ，ꀠꀘꇍꃰꃅꆀꀯꏧꆀꌒꆹꋍꂽꈀꐥꃅꋌꇽꌊꑳꇊꌒꇌꇓꈓꌉꇁꇈ，ꁾꇓꋀꄻꄉꍆꇓꈓꀊꈫꀊꇋꀀꌐꀐ。 5 ꑳꇊꌒꇌꇓꈓꀠꀘꇍꂽꇱꇊꇤꏢꀕꃅꄉꅷꑭꄂꏦꃰꃅꄻꊯꊪꈎꐛꄹꈎꌠꑟ。
6 ꀊꋨꄹꈎꇖꆪꈬꑍꄹꉇꌠꆏ，ꇓꈓꇬꋙꈘꒈꈘꀙꐯꀙꄉ，ꉹꁌꈧꌠꋠꅍꀋꊌꃅꂮꐚꇧꁠꀐ。 7 ꊁꆏ，ꇓꈓꂶꌠꀠꀘꇍꂽꇱꅥꁖꄉ，ꒀꄊꂽꈧꌠꌋꐓꄷꋀꆈꌊꃰꃅꁬꃨꉻꈫꏢꁮꏭ，ꇓꉻꑍꏮꌠꇢꊭꇬꀃꈈꐫꌠꑆꄉꆶꁧꀐ。ꏦꇍꄂꂽꈧꌠꀊꈫꀊꇋꄉꇓꈓꌉꐹꄮꇬꆏ，ꑭꄂꏦꃰꃅꆹꆶꑸꇁꀠꃅꄷꏭꉜꄉꁧꀐ。 8 ꏦꇍꄂꂽꈧꌠꈹꅸꑭꄂꏦꃰꃅꊂꇁꇈ，ꑱꆀꇬꇓꈓꐦꀞꇬꄉꑭꄂꏦꋀꒃꅜꀐ；ꑭꄂꏦꂽꈧꌠꋌꀋꐊꃅꆶꂱꑱꅉꈴꁧꌐꀐ。 9 ꏦꇍꄂꂽꈧꌠꆏꑭꄂꏦꃰꃅꋀꒃꅜꇈ，ꋀꇱꈻꌊꉳꂸꃅꄷꆀꀘꇁꇓꈓꀠꀘꇍꃰꃅꂾꑟꄉ，ꑽꃤꃰꃅꀞꋌꁳꀐ。 10 ꀠꀘꇍꃰꃅꆏꑭꄂꏦꌳꃈꅮꈧꌠꑭꄂꏦꂾꄉꋌꌉꇫꎭ，ꉈꑴꒀꄊꊿꌟꒉꌠꂾꈧꌠꑌꈀꐥꃅꋌꌉꇫꎭꌐꀐ。 11 ꑭꄂꏦꑓꋪꋑꌠꋀꃹꇫꎭ，ꋍꈭꐨꆏ，ꐯꎸꉗꌊꑭꄂꏦꋀꎤꌊꀠꀘꇍꁧꇈ，ꑭꄂꏦꋀꇱꈢꏦꑳꇬꊐꄉꅷꌥꄮꇬꑟ。
ꑳꀊꊆꑷꂿꊿꐆꐯꀋꉜ
12 ꆀꀯꏧꆀꌒꀠꀘꇍꃰꃅꄻꊯꈬꈎꐛꄹꈎꌠꉬꆪꏃꑍꄹꉇꌠꆏ，ꀠꀘꇍꃰꃅꐏꁇꌟꒉꆀꀯꌒꇁꄊꇁꌊꑳꇊꌒꇍꇓꈓꇬꑟꇈ， 13 ꑳꀊꊆꑷꂿ、ꃰꃅꑷꂿ、ꌌꁈꇛꌺꑷꂿꈧꌠꌋꆀꑳꇊꌒꇌꇓꈓꀉꁁꑳꇤꈀꐥꃅꋌꐗꇫꎭꌐꀐ。 14 ꐏꁇꌟꒉꐊꐺꌠꏦꇍꄂꂽꑼꈧꌠꆹꑳꇊꌒꇌꇓꈓꀊꈫꀊꇋꇓꉻꏭꌠꋀꐆꐯꀋꉜꇫꎭꌐ。 15 ꀊꋨꄮꇬ，ꐏꁇꌟꒉꆀꀯꌒꇁꄊꆹꉹꁌꌢꎭꇤꅠꀕꌠ、ꉹꁌꇓꈓꇬꋒꇈꈧꌠ、ꊿꈌꊰꄉꀠꀘꇍꃰꃅꐊꇁꈧꌠꌋꆀꇔꇷꇫꋒꇈꈧꌠꐯꇯꋌꁮꌊꁧꌐꀐ。 16 ꄚꉹꁌꌢꎭꇤꅠꀕꑠꈨꆏ，ꐏꁇꌟꒉꆀꀯꌒꇁꄊꇤꀊꄶꇬꐥꄉ，ꋀꁳꑌꃀꌧꊈꉻꈫꀨꎹ、ꋙꊪꒉꏽꄉꇈꎽ。
17 ꑳꀊꊆꑷꂿꇬꐯꌷꁧ、ꐯꀻꌅꄉꈤꌋꆀꐯꀻꌅꀉꒉꐯꀉꒉꏡꌠꏦꇍꄂꊿꇱꅥꐷꐯꇯꄉ，ꋀꎞꌊꀠꀘꇍꁧꌐꀐ。 18 ꉈꑴꆏ，ꌃꎔꑷꂿꇬꉽꐯ、ꑄꀻ、ꑐꄉ、ꍔꌺ、ꎸꀺꌋꆀꆦꑝꅉꌬꌠꀉꁁꐯꌬꀮꌬꀏꈧꌠꃅꋌꎞꌊꁧ； 19 ꉈꑴꀞꍗ、ꃆꄔꏦꀻꌅ、ꍔꌺ、ꉽꐯ、ꂷꇭꄉꅍ、ꎸꀺꌋꆀꎧꈈꅍꈧꌠꐎꌊꄻꄉꌠꉬꄿꂿ，ꏂꌊꄻꄉꌠꉬꄿꂿ，ꐯꇯꐏꁇꌟꒉꂶꌠꇱꎞꌊꁧꌐꀐ。 20 ꀉꁁꆏ，ꌙꇊꂱꄻꑳꀊꊆꑷꂿꇬꄉꌠꐯꌷꁧꑍꁧꌠ、ꐯꀻꌅꀉꒉꐯꀉꒉꏡꌠꌋꆀꋍꇂꃴꐯꇌꁱꊰꑋꏢꌠꑌꐊ。ꌬꀮꌬꀏꋍꑠꆹꀉꑌꇨꄉ，ꋂꏣꌊꏣꂿꑖꀋꉬꀐ。 21 ꐯꌷꁧꑍꁧꌠꆏ，ꋍꁧꌠꇬꀊꂥꐨꆏꊰꉆꇇꊃꆈꐛ；ꀉꄖꐨꆏꇇꏸꇖꏢꐛ，ꀊꉻꐨꆏꑍꊏꇇꊃꆈꐛ，ꈬꄔꆏꇬꈣ， 22 ꐯꌷꁧꀂꏾꇬꆏꐯꀎꇓꂷꄻꇬꃃꄉ，ꐯꀎꇓꋋꂷꀊꂥꐨꆏꉬꇇꊃꆈꐛ，ꐯꀎꇓꈭꇍꆏ，ꐯꌊꏃꆺꁰꀕꌋꆀꐯꑟꏍꄉꒃꇬꄀꄉꌐ，ꀉꁁꁦꌠꑌꐯꃅꐯꌟꌡ，ꄡꇗꏃꆺꁰꀕꅑ。 23 ꐯꌷꁧꁦꌠꆏꏃꆺꁰꀕꈬꊰꃘꂷꒃꇬꄀꄉ，ꐯꑟꏍꄉꈧꌠꈭꇍꑌꏃꆺꁰꀕꅑ，ꐯꇯꋍꉐꂷꒃꇬꄀꄉ。
ꒀꄊꊿꌞꊿꁮꌊꀠꀘꇍꁧ
24 ꐏꁇꌟꒉꆀꀯꌒꇁꄊꆹꆦꑝꌌꁈꑭꆾꑸ、ꆦꑝꌌꁈꇂꃴꑭꃓꑸꂶꌠꌋꆀꀃꈈꐏꊿꌕꑻꐯꇯꋌꒃꄉꀐ。 25 ꉈꑴꆏ，ꇓꈓꇬꄉꂽꏃꌟꒉꂷ、ꃰꃅꇖꊩꄟꃀꏃꑹ、ꃅꄷꀊꋩꈚꇬꂽꎹꂽꇴꌠꏲꌋꂷꌋꆀꉹꁌꀊꄶꀀꑠꃘꊰꑹꋌꒃꄉꀐ。 26 ꐏꁇꌟꒉꆀꀯꌒꇁꄊꆹꊿꋋꈨꐯꇯꋌꏃꆀꀘꇁꇓꈓꇬꀠꀘꇍꃰꃅꁵꁧꀐ。 27 ꊿꋋꈨꆹꉳꂸꃅꄷꆀꀘꇁꇓꈓꄉꀠꀘꇍꃰꃅꇱꌉꇫꎭꌐ。ꑠꃅꄉ，ꒀꄊꊿꆹꋀꃅꄷꄉꊿꁮꌊꌞꃅꄷꁧꀐ。
28 ꒀꄊꉹꁌꆀꀯꏧꆀꌒꇱꁮꌊꁧꌠꃷꁨꆹꑠꈨꐥ： ꆀꀯꏧꆀꌒꃰꃅꄻꏃꈓꐛꄹꈎꌠ，ꒀꄊꊿꌕꄙꌋꆀꑍꊎꌕꑻꋌꁮꌊꁧ； 29 ꋌꃰꃅꄻꊰꉆꈓꐛꄹꈎꌠ，ꑳꇊꌒꇌꄉꒀꄊꊿꉆꉐꌕꊰꑋꑼꋌꁮꌊꁧ； 30 ꋌꃰꃅꄻꑍꊎꌕꈎꐛꄹꈎꌠ，ꐏꁇꌟꒉꆀꀯꌒꇁꄊꇱꁮꌊꁧꌠꒀꄊꊿꆹꏃꉏꇖꊯꉬꑻ；ꊿꈀꐥꃅꐯꇯꇖꄙꃘꉐꑹꉬ。
ꒀꑸꏢꏦꑳꇬꄉꊿꃑꎼꇁ