ꑱꌝꆀꊿꏃꃅꌋꏃꉈꑴꇁ
“ꉹꁌꂗꍵꑱꃀꇂꃴꄉꈭꅐꇁꈧꌠꆹꇈꈬꅔꈋꄉꑆꊋꊌ；
ꑱꌝꆀꆹꑬꆏꈉꋀꎹꊊꀐ”ꄷ。
3 ꀋꉊꂴꑳꀊꊆꑱꌝꆀꂾꅐꇁꇈ，ꇬꏭ：
“ꉢꀋꑍꀋꈤꌠꉂꐪꌊꆎꉂꆎꅉ，
ꑠꅹ，ꉡꆹꉂꐪꈁꅼꀕꌠꌊꆎꈻꆏꅰ”ꄷ。
4 ꑮꆜꌺꑱꌝꆀꀋ！ ꉢꆎꋈꀱꄺꀱꄉ，
ꆏꋋꂷꋉꐛꄻꐛ。
ꆎꆹꉈꑴꋍꃢꃅꇬꋒꇇꁉꊭꌊ，
ꅐꉈꏭꊿꉌꇿꑓꇿꈧꌠꐊꄉꀛꐂꇁꌠꉬ。
5 ꆍꊇꀋꎪꃅꌒꂷꆀꑸꃅꄷꉘꁌꈧꌠꇬꄉꑌꃀꌧꊈꊪ，
ꑌꃀꌧꊈꊪꌠꆹꉌꇿꃅꋀꑌꃀꌧꊈꅝꌠꉬ。
6 ꃅꑍꑟꇁꂯꄉꀐ，ꐏꁇꊿꆹꀋꎪꃅꑱꃔꆃꉘꁌꈧꌠꇬꄉꑠꃅꇳꍝ：
“ꄓꇁꌶ！ ꉪꊇꑭꉢꉘꁌꉜꄉꁧꂿ，
ꑳꀊꊆ-ꉪꏃꃅꌋꄷꁧꂿ”ꄷ。
7 ꑳꀊꊆꉈꑴꑠꃅꉉ：
“ꆍꊇꑸꇱꎁꃅꉌꇿꑵꉙꑵꄡꑟ，
ꇩꏤꈀꐥꌠꈬꄔꀑꋾꂶꌠꎁꃅꇳꉔꄡꑟ。
ꆍꊇ：‘ꑳꀊꊆꀋ！ ꆏꈀꎭꀕꃅꅽꉹꁌꈭꋏ，
ꑱꌝꆀꉹꁌꇫꋒꇈꈧꌠꈭꋏ’ꃅꍖꀴ、ꄛꇰꄡꑟ。
8 ꇬꉚꄉꅊꇈ！ ꉡꆹꀋꎪꃅꒈꀑꃅꄷꄉꋀꊇꉢꏃꇁ，
ꃅꋮꆸꈈꄉꋀꉢꇴꉢꏓꌊꉈꑴꇁꌠꉬ；
ꋀꈬꄔꇬꑓꋩꌠꐊ，ꐂꀜꌠꐊ，
ꀋꃀꃴꑌꌠꐊ，ꌳꋦꀋꃀꐊ；
ꋀꊇꀋꎪꃅꋍꁥꋍꁥꃅꐮꐊꄉꀱꉈꑴꄚꇁꌠꉬ。
9 ꋀꊇꑓꁴꑰꀕꇤꄉꇁ。
ꉡꆹꋀꈼꅇꂟꅇꈴꄉꋀꏃꂠ，
ꋀꁳꒉꋮꈝꃀꊒꆽꀕꌠꍬꇁꎻ，
ꋀꊇꀋꎪꃅꈩꀋꐛꃪꀋꏾ；
ꑞꃅꆏ，ꉡꆹꑱꌝꆀꀉꄉꉬ，
ꑱꃔꆃꆹꉠꌺꒉꉬ。
10 ꇩꏤꈀꐥꌠꀋ！ꑳꀊꊆꅇꂷꅲ，
ꈜꎴꅉꐛꌠꎿꅔꈧꌠꇬꄉ：
‘ꑱꌝꆀꋌꁋꀘꇫꎭꂶꌠꀋꎪꃅꋀꋌꇴꋌꏓꐯꇯ，
ꋋꆹꆫꃀꂷꑿꐏꁇꌠꌟꃅꋀꐏꁇꌠꉬ’ꃅꄜꁊ。
11 ꑞꃅꆏ，ꑳꀊꊆꆹꑸꇱꋌꋊꌊꇁꀐ，
ꊾꇨꋀꏭꀋꋌꌠꇇꈐꄉꋀꋌꋊꎼꇁ。
12 ꋀꊇꇁꌊꑭꉢꉘꁌꄉꉙꑵ。
ꑳꀊꊆꆹꆿꍯ、ꎧꏀ、ꒀꒉ、ꑾꌺ、ꇂꇤꌺꃅꂄꇁꎔꌠꑠꄻꋀꇖꐛꅹ，
ꋀꊇꉌꇿꑓꇿꀑꑊꒈꆭꀕꌠꉬ。
ꋀꊇꉻꈫꒉꇎꑠꂷꌟꃅ，ꐒꅍꊀꅍꍈꀋꐥꌠꉬ。
13 ꀊꋨꄮꇬꆏ，ꑮꆜꈧꌠꀋꎪꃅꉌꇿꃅꀛꐂ；
ꀊꏀꌠꌋꆀꃀꌠꀕꐯꇯꉌꈯꑓꈜꏽ；
ꑞꃅꆏ，ꉡꆹꋀꐒꃤꊀꃤꁳꇁꉌꃈꑓꌒꅍꐛꎻ，
ꉢꋀꈐꄀꊋꄀꄉ，ꋀꉌꎭꅍꁳꇁꉌꇿꅍꐛꎻꌠꉬ。
14 ꉢꀋꎪꃅꆦꑝꊿꁳꋅꎸꋠꄉꅗꎻ；
ꉠꉹꁌꁳꈁꂄꈁꎔꀕꌠꊌꄉꉌꂵꒈꊭꑙꎽ。
ꋍꑠꆹꑳꀊꊆꉉꌠꉬ”ꄷ。
ꑳꀊꊆꑱꌝꆀꊿꎭꃅꉈ
15 ꑳꀊꊆꑠꃅꄉꉉ：
“ꇁꂸꇓꈓꇬꉨꃚꇶꍠꀕꑠꇫꈌꐚ，
ꑠꆹꇁꏣꋍꌳꃈꅮꉩꌠ，
ꋌꉌꌒꄀꅇꅲꀋꄚꀐ，
ꑞꃅꆏ，ꋀꊇꐯꇯꇬꀋꐥꌐꀐ”ꄷ。
16 ꑳꀊꊆꉈꑴꑠꃅ ꉉ：
“ꈨꃅꑳꄡꉩꀐ，ꑓꁴꑌꄡꅐꀐ；
ꑞꃅꆏ，ꆏꎬꅧꌊꀈꈥꀋꈥ，
ꅽꌺꅽꇖꀋꎪꃅꁮꇂꐚꅍꄉꀱꉈꑴꇁ。
ꋍꑠꆹꑳꀊꊆꉉꄉꌠꉬ。
17 ꆎꆹꋌꊂꉘꇉꐨꐥꌠꉬ，
ꅽꌳꃈꅮꀋꎪꃅꀱꉈꑴꊨꏦꃅꄷꑟꇁ。
ꋍꑠꆹꑳꀊꊆꉉꄉꌠꉬ。
18 ꐝꉅꃅꉢꈨꇬ，ꑱꃔꆃꋍꊨꏦꎁꃅꑠꃅꇕꏒ：
‘ꉡꆹꇌꉘꌺꁱꀋꐛꑴꌦꑠꏢꌡ，
ꆏꉡꁱꉡꍋꄉꉢꁳꁱꐛꎻ。
ꆏꈀꎭꀕꃅꉢꁳꀱꇁꎻꑲꆏ，ꉢꀱꉈꑴꇁꄎꌠꉬ。
ꑞꃅꆏ，ꆎꆹꑳꀊꊆ-ꉠꏃꃅꌋꉬ。
19 ꉢꆎꐞꁧꈭꐨꆏ，ꉌꆐꅑꀱꍠꀕ，
ꉪꁏꏡꁏꇁꈭꐨꆏ，ꇇꁮꌊꄉꁱꆽꏶ，
ꀊꏀꄮꇬꃅꑽꏿꑽꈧꌠꐛꅹꃅꉢꎲꄏꉈꏠꇧꁠꀐ’ꄷ。
20 ꑱꃔꆃꆹꉠꌺꉢꇫꉂꂶꌠꀋꉬꅀ？
ꌳꃈꅮꉢꇫꉂꂶꌠꀋꉬꅀ？
ꉢꅉꀕꃅꇬꏭꊨꀖꑴꇬ，ꄡꇗꋌꉚꋋꅲꇬꎷ。
ꑠꅹ，ꉠꉌꂵꋌꇛꋋꄻ，
ꉢꀋꎪꃅꋋꎭꃅꉈ。
ꋍꑠꆹꑳꀊꊆꉉꌠꉬ。
21 ꑮꆜꌺꑱꌝꆀꀋ！
ꆏꅽꊨꏦꎁꃅꈜꌐꌷꁧꄖꇫꋉ，
ꅽꊨꏦꎁꃅꈜꄎꌐꂷꄻꇬꄀ，
ꋓꉪꁨꄉꄇꈜꆏꈴꋺꏡꌠꍬ。
ꑱꌝꆀꀋ！ ꀱꇁꌶ！ ꀱꉈꑴꅽꊨꏦꇓꈓꇬꇁ。
22 ꑗꈜꐞꁧꌠꌋꅪꀋ！
ꆏꀱꒊꀱꇁꃅꐺꅷꈍꄮꑟꂿꄷꌠꉬ？
ꑳꀊꊆꆹꃄꅉꇬꄉꌤꀊꏀꐘꋌꄻꄉꀐ，
ꋋꆹꌋꅪꁳꌺꃰꐏꁇꎻ”ꄷ。
ꏃꃅꌋꉹꁌꀋꎪꃅꊫꂫꐥꇁ
23 ꄙꀕꃪꀕꉬꉎꂽꑼꌊꁈꑳꀊꊆꑠꃅꉉ： “ꉢꊿꌞꊿꁮꌊꁧꈧꌠꁳꀱꇁꎻꄮꇬꆏ，ꋀꊇꒀꄊꃅꄷꌋꆀꇓꈓꈧꌠꇬꄉꉈꑴꋍꃢꃅ：‘ꑖꉬꌠꀀꅉ，ꌃꎔꌠꉘꁌꇆ！ ꑳꀊꊆꋬꂻꄻꆏꁳꅊꇈ’ꃅꉉꇁꌠꉬ。 24 ꒀꄊꇓꈓꈧꌠꇬꀀꌠꊿ、ꑘꃅꊿ、ꎆꆫꎆꏲꊿꐯꇯꒀꄊꃅꄷꀀꌐ。 25 ꉡꆹꊿꐙꄏꌠꁳꊋꑌꏡꑌꇁꎻ； ꐒꊀꌠꁳꑞꑌꇎꇁꎻ”ꄷ。
26 ꄚꄉ，ꉢꀀꐚꇁꇈꏮꀊꈫꀊꇋꉜꐺ；ꉢꀀꌒꐯꀀꌒꑠꄲꀀꀐ。
27 ꑳꀊꊆꑠꃅꉉ：“ꇬꉚ！ ꃅꑍꑟꇁꂯꄉꀐ， ꉢꑱꌝꆀꊿꌋꆀꒀꄊꊿꁳꌺꁬꇖꎶꇁꎻ ，ꑌꑿꀻꎆꇁꎻ。ꋍꑠꆹꑳꀊꊆꉉꌠꉬ。 28 ꉢꂴꏭꉪꄉꏤꄉꋀꐴꍠ、ꐅꀘ、ꆷꀱꆽꃅ、ꈔꋏ、ꉮꃤꄻꋀꌶꎽꋺ，ꊁꏭꑌꀋꎪꃅꉪꄉꏤꄉꋀꋈꄻ、ꊩꉘꌠꉬ。ꋍꑠꆹꑳꀊꊆꉉꌠꉬ。 29 ꀊꋨꄮꇬꆏ，ꊾꆹ：
‘ꀋꁧꑌꃀꌧꊈꏢꌠꅝꄉ，
ꌺꎐꉺꇧꁠ’ꃅꀋꉉꀐ。
30 ꊿꈀꄸꑌꂱꑱꊨꏦꑽꃤꐛꅹꃅꄉꌦꌠꉬ；ꈀꄸꑌꃀꌧꊈꏢꌠꅜꆏ，ꈀꄸꎐꉺꇧꁠꌠꉬ。
31 ꇬꉚ！ ꃅꑍꑟꇁꂯꄉꀐ，ꉢꑱꌝꆀꄰꌋꆀꒀꄊꄰꏯꏤꐪꀊꏀꏢꒃꌠꉬ。ꋍꑠꆹꑳꀊꊆꉉꌠꉬ。 32 ꏤꐪꋋꏢꆹꀋꉊꂴꋀꁍꁈꇇꁉꄷꉢꈻꌊꉞꏹꄉꅐꇁꄮꇬꏤꄉꌠꏤꐪꏡꌠꀋꌡ。ꉢꋀꌐꃶꉬꑴꇬ，ꉠꏤꐪꏡꌠꋀꐆꇫꎭꀐ。ꋍꑠꆹꑳꀊꊆꉉꌠꉬ。 33 ꀊꋨꇈꉈꆏ，ꉡꌋꆀꑱꌝꆀꄰꈀꒃꌠꏤꐪꆹꑠꉬ： ꉢꉠꄹꏦꈧꌠꄻꋀꄸꈐꊐꄉ，ꁱꋀꉌꂵꇬꄀꄉ。ꉡꆹꋀꏃꃅꌋꄻ，ꋀꊇꆏꉠꉹꁌꄻ。ꋍꑠꆹꑳꀊꊆꉉꌠꉬ。 34 ꋀꊇꈀꄸꑌꊨꏦꃷꇎꌋꆀꃺꑌꏭ：‘ꆍꊇꑳꀊꊆꌧꂿꄡꑟ’ꃅꉙꂘꄻꀋꅐꀐ，ꑞꃅꆏ，ꋀꊇꐭꌠꒉꌠꋍꂷꈀꐥꃅꉢꌥꉡꂿꌐ。ꉢꑽꃤꄻꋀꏆ，ꋀꑽꃤꄸꃤꑠꉢꎺꉌꂵꊐꀋꄉꀐ。ꋍꑠꆹꑳꀊꊆꉉꌠꉬ”ꄷ。
35 ꑳꀊꊆꆹꂵꆪꆏꉘꁮꁳꁨꑭꐝꇅꀕꎻ，
ꏭꏦꈴꄉꃅꏸꌋꆀꆧꁨꁳꈊꃀꁨꎻ。
ꎾꃝꃸꆽꄉꒈꂃꒊꆱꄓꇁꎻ，
ꄙꀕꃪꀕꉬꉎꂽꑼꌊꁈꑳꀊꊆꆹꋍꂓꉬ。
ꋌꄹꇬ：
36 “ꃅꃴꏭꏦꋋꈨꉠꂾꄉꑍꁧꇬꑲꆀ，
ꑱꌝꆀꊂꋊꑌꉠꂾꄉꋊꈙꇈ ，
ꐩꋊꐩꍂꃅꇩꏤꂷꀋꐛꆘꅝꌠꉬ。
ꋍꑠꆹꑳꀊꊆꉉꌠꉬ”ꄷ。
37 ꑳꀊꊆꑠꃅꉉ：
“ꊿꄩꏯꃅꃴꎕꑣꄎ、ꀏꏯꅉꃴꎖꉺꄎꄮꇬꑲꆀ，
ꉢꑱꌝꆀꊂꋊꈧꌠꃅꐨꑽꑌꐛꅹꃅꋀꉢꇤꇫꎭꌠꉬ。
ꋍꑠꆹꑳꀊꊆꉉꌠꉬ”ꄷ。