ꑱꆀꂱꋀꒃꌊꀞꇽ
26
1 ꒀꑭꑸꄰꌺꒀꑸꏠꒀꄊꇩꏤꃰꃅꄻꆸꄮꇬ，ꑳꀊꊆꅇꂷꇁꌊꑱꆀꂱꄷꑟꇈ，ꇬꏭ： 2 “ꑳꀊꊆꑠꃅꉉ：‘ꆏꑳꀊꊆꑷꂿꂶꌠꐷꈭꇬꉆꄉ，ꅇꂷꉢꅽꏯꈁꉉꈧꌠꋍꍈꑋꇤꇬꄡꎭꃅ，ꉉꉹꁌꒀꄊꇩꏤꇓꈓꈀꐥꅉꇬꄉꇁꌊꑳꀊꊆꑷꂿꇬꇗꅉꃅꇁꈧꌠꇰ。 3 ꋀꊇꉠꅇꅲꄉꄺꀱꌊꄷꅠꈝꃀꏡꌠꐞꇁꇬꆹ，ꉢꉠꉪꐨꄺꀱꄉ，ꉮꃤꂴꏭꋀꄸꃅꅠꑽꐛꅹꄻꋀꌶꎻꂿꄷꈧꌠꉢꄻꋀꌶꇁꀋꎽꌠꉬ。 4 ꆏꋀꏭꉉꒉ，ꑳꀊꊆꄹꇬ：‘ꀋꄸꄷꆍꊇꉠꅇꀋꅲ，ꄹꏦꆍꂾꄉꉢꄻꄉꈧꌠꑌꀋꍬ， 5 ꉈꑴꅇꂷꉢꈍꑋꃢꃅꉠꁏꐚꌋꅇꄜꊿꈧꌠꉢꁆꌌꆍꏭꉉꒉꎻꈧꌠꆍꊇꇬꀋꅲꇬꆹ， 6 ꉢꀋꎪꃅꑷꂿꋋꂷꁳꏃꇊꇓꈓꌟꃅꈔꑍꎻ，ꑳꇊꌒꇌꁳꇁꇩꏤꈀꐥꌠꃅꋋꍃꋌꏽꌠꇓꈓꑠꂷꐛꎻ’ꄷ”ꄷ。7 ꆦꑝꊿ、ꌋꅇꄜꊿꌋꆀꉹꁌꈧꌠꆹꑱꆀꂱꑳꀊꊆꑷꂿꇬꄉꈁꉉꌠꅇꂷꈧꌠꋀꊌꈨꀐ。 8 ꑱꆀꂱꅇꂷꑳꀊꊆꋍꏭꉉꈧꌠꈀꐥꃅꋌꉉꉹꁌꋍꏅꇰꌐꈭꐨꆏ，ꆦꑝꊿ、ꌋꅇꄜꊿꌋꆀꉹꁌꈧꌠꐯꇯꑱꆀꂱꋀꒃꅜꇈ，ꇬꏭ：“ꆏꌦꄡꑟꀐ！ 9 ꆏꑞꃅꑳꀊꊆꂓꄜꄉ，ꑷꂿꋋꂷꏃꇊꇓꈓꌟꃅꈔꑍ、ꇓꈓꋋꂷꀋꎪꃅꈥꅐꀜꅐꄉꊾꂷꇬꀀꌠꀋꊌꌠꉬꃅꅉꄜ？”ꄷ。ꄚꄉꉹꁌꈧꌠꐯꏑꌌꑳꀊꊆꑷꂿꇬꄉꑱꆀꂱꋀꇱꇊꄉꀐ。
10 ꒀꄊꇩꏤꌟꒉꌠꂾꈧꌠꌤꑠꋀꈨꇬꆏ，ꃰꃅꑷꂿꇬꄉꑳꀊꊆꑷꂿꇬꆹꇈ，ꇁꑳꀊꊆꑷꂿꇬꀃꈈꀊꏀꄷꁬꌠꃹꆹꈌꇬꑌ。 11 ꆦꑝꊿ、ꌋꅇꄜꊿꌋꆀꉹꁌꈧꌠꆏꌟꒉꌠꂾꈧꌠꏭ：“ꊿꋋꏢꌉꇫꎭꄡꑟ，ꑞꃅꆏ，ꋌꇓꈓꋋꂷꈔꑍꇁꃅꅉꄜ，ꆍꊇꈀꄸꑌꋍꑠꆍꊌꈨꀐ”ꄷ。
12 ꑱꆀꂱꆏꌟꒉꌠꂾꌋꆀꉹꁌꈧꌠꏭꑠꃅꉉ：“ꑳꀊꊆꉢꋌꇱꁆꌌꑷꂿꋋꂷꌋꆀꇓꈓꋋꂷꈔꑍꇁꌠꃆꂮꄜ，ꅇꂷꆍꈀꈨꋋꈨꄜꇁꎻ。 13 ꆍꊇꀋꃅꆍꃅꐨꑽꑌꈧꌠꄺꀱꄺꑣꄉ，ꑳꀊꊆ-ꆍꏃꃅꌋꅇꅲꑲꆏ，ꋋꆹꉪꐨꄺꀱꄉꉮꃤꋌꈁꉉꈧꌠꁳꇁꆍꌶꀋꎽꌠꉬ。 14 ꉢꃅꄉꇬꆹ，ꆍꉜꉏ！ꉢꆍꇇꈐꇬꀀ，ꆍꉜꇬꌌꈍꃅꄈꍑꆏ，ꆍꊇꁨꈍꃅꉡꊝ！ 15 ꄚꆍꊇꇯꍝꃅꋍꑠꅉꐚꑲꆀꍑ，ꀋꄸꄷꉡꆹꆍꌉꌦꇫꎭꑲꆏ，ꀙꀋꐥꃅꊿꌉꌠꑽꃤꑠꇁꇓꈓꋋꂷꌋꆀꇓꈓꇬꉹꁌꈧꌠꀂꏽꎍꌠꉬ；ꑞꃅꆏ，ꉡꆹꇯꍝꃅꑳꀊꊆꇱꁆꌌꆍꄷꄉꅇꂷꋋꈨꈀꐥꃅꄜꆍꇰꇁꎻꌠꉬ”ꄷ。
16 ꌟꒉꌠꂾꌋꆀꉹꁌꈧꌠꆏꆦꑝꊿꌋꆀꌋꅇꄜꊿꈧꌠꏭ：“ꊿꋋꂷꌉꀋꋭ，ꑞꃅꆏ，ꋋꆹꑳꀊꊆ-ꉪꏃꃅꌋꂓꄜꄉꉪꏭꅇꉉꌠꉬ”ꄷ。 17 ꋀꇩꏤꈐꏭꅡꈭꌟꒉꈍꑋꑹꆏꄓꇬꉆꄉ，ꉹꁌꋍꈜꏓꇁꈧꌠꏭ： 18 “ꑭꀕꏦꒀꄊꃰꃅꄺꄮꇬ，ꃀꆀꎭꊿꂱꏦꂶꌠꅉꄜꄉꒀꄊꊿꏭꑠꃅꉉ：
‘ꄙꀕꃪꀕꉬꉎꂽꑼꌊꁈꑳꀊꊆꄹꇬ：
ꑭꉢꇓꈓꆹꃄꅉꏬꂿꌠꌟꃅꊿꇫꂿꇁ，
ꑳꇊꌒꇌꇓꈓꆹꀋꎪꃅꄉꈥꅐꀜꅐ，
ꑷꂿꋥꅉꇬꁧꂶꌠꆹꀋꎪꃅꇁꌩꏪꇓꃴꇬꁦꀮꂷꐛꄷ’ꄷ。
19 ꄚꒀꄉꃰꃅꑭꀕꏦꌋꆀꒀꄊꉹꁌꈧꌠꊿꋋꂷꋀꌉꇫꎭꀐꅀ？ ꑭꀕꏦꃰꃅꑳꀊꊆꁌꒉꏦꃪꄉ，ꑳꀊꊆꏭꂄꃅꋀꊝꇁꄷꇖꀋꂟꅀ？ ꑠꅹ，ꑳꀊꊆꉪꐨꄺꀱꄉꋌꈁꉉꌠꉮꃤꑵꌠꄻꋀꌶꀋꎽꌠꉬ。ꀋꄸꄷꊿꋋꂷꉪꌉꇫꎭꇬꆹ，ꑽꃤꆈꒉꀕꌠꉪꐆꇬꅜꄉ，ꊨꏦꃅꌊꊨꏦꑴꅉꉮꌠꉬꀐ”ꄷ。
20 ꀊꋨꄮꇬ，ꊿꃶꆀꑸꂓꑠꂷꐥ，ꋋꆹꏸꆀꑳꆀꊿꏃꂷꑸꄰꌺꉬ，ꋋꑌꑳꀊꊆꂓꄜꄉꇓꈓꋋꂷꌋꆀꃅꄷꋌꈚꈔꑍꇁꑴꄷꅉꄜ，ꋌꈀꄜꌠꆹꑱꆀꂱꈀꄜꌠꌋꆀꐯꃅꐯꌟ。 21 ꒀꑸꏠꃰꃅꌋꆀꋍꂽꑼꌳꈄꈧꌠ、ꇛꌺꈧꌠꆹꃶꆀꑸꅇꂷꑠꋀꈨꇬꆏ，ꃶꆀꑸꋋꂷꌉꇫꎭꏢꉨ。ꋍꑠꃶꆀꑸꈨꇬꆏ，ꋍꐬꆠꄉꋌꆶꉞꏹꃹꁧꀐ。 22 ꒀꑸꏠꃰꃅꆏꑸꇱꀧꄰꌺꑱꆀꇂꄉꂶꌠꋌꁆꌌꊾꈨꏃꉞꏹꄉꇫꒃꒉꎻ。 23 ꃶꆀꑸꆹꉞꏹꄉꋀꒃꌊꒀꑸꏠꃰꃅꄷꇁ，ꄚꄉꂗꍵꑱꃀꌊꃰꃅꇱꌉꇫꎭꇈ，ꋍꂿꂶꌠꋀꇵꉹꁌꎃꀕꄃꁧꑭꇬꄉ。
24 ꄚ，ꎭꃓꄰꌺꑸꑭꇤꆹꑱꆀꂱꀧꌋꃅꄉ，ꑱꆀꂱꋌꏮꉹꁌꇇꈐꊐꄉꋀꁳꌉꌦꇫꎭꀋꎽ。