ꃆꏂꊂꑋꉘꇉꐨ
23
1 ꑳꀊꊆꑠꃅꉉ：“ꆫꊿꉠꆫꁍꇬꑿꈧꌠꋌꌌꑆꐒꎸꍓ、ꋌꁌꋌꀘꇫꎭꌠꆹꉮꃤꐥꀐ！”ꄷ。 2 ꑳꀊꊆ-ꑱꌝꆀꏃꃅꌋꆹꆫꊿꋍꑱꌝꆀꉹꁌꆫꉘꈧꌠꏭ：“ꆍꊇꉠꑿꈧꌠꀨꎹꆽꃴꀋꄉꃅꆍꁌꆍꀘꇫꎭ，ꇬꉚꄉ！ꉡꆹꀋꎪꃅꆍꑽꃤꄸꃤꐛꅹꃅꆍꇇꇩꍈꌠꉬ。ꋍꑠꆹꑳꀊꊆꉉꌠꉬ。 3 ꉡꆹꉠꑿꉢꈹꀊꄶꎭꌠꇩꏤꈧꌠꈬꇬꄉ，ꉠꑿꇫꋒꇈꈧꌠꏃꉈꑴꋀꃅꄷꇁ；ꋀꊇꀋꎪꃅꄉꁬꎶꀉꑌꇁꌠꉬ。 4 ꉢꀋꎪꃅꆫꃀꈨꌋꌊꋀꀨꎹ、ꋀꆫꉘꎻ。ꋀꊇꏸꑋꀋꏦ，ꐫꑌꐬꀋꆠꀐ，ꋍꂷꂯꆙꀋꅝ。ꋍꑠꆹꑳꀊꊆꉉꌠꉬ。5 ꇬꉚ！ꃅꑍꑟꇁꂯꀐ，ꉢꀋꎪꃅꄊꃥꄰꐴꌠꇬꄉꑖꉬꌠꅿꁮꍈꉢꄻꇫꅿꇁꎻꌠꉬ；ꋋꆹꀋꎪꃅꃰꃅꌅꈌꌬ，ꌤꃅꇬꉪꑌꌧꋬ，ꃄꅉꇬꄉꊒꆽꀕꃅꑖꉬꌬꇁ。ꋍꑠꆹꑳꀊꊆꉉꌠꉬ。 6 ꋌꌅꈌꌫꄮꇬꆏ，ꒀꄊꊿꀋꎪꃅꈭꋏꊌ，ꑱꌝꆀꊿꑌꋬꂻꃅꇬꀀ。ꋋꆹꀋꎪꃅꊿꇬꏭ‘ꑳꀊꊆꆹꉪꑖꉬ’ꃅꇴꌠꉬ”ꄷ。
7 ꑳꀊꊆꉈꑴꑠꃅꉉ：“ꇬꉚꄉ！ ꃅꑍꑟꇁꂯꀐ，ꊾꆹꀋꎪꃅꑱꌝꆀꊿꉞꏹꄉꋌꏃꅐꇁꌠꐩꋊꐩꍂꃅꇫꐥꌠꑳꀊꊆꏭꄐꄉꅇꏤꀋꒃꀐ。 8 ꊾꆹꑱꌝꆀꌺꇖꊂꋊꈧꌠꒈꀑꏭꄉꋌꏃꐞꇁ，ꇩꏤꋀꋌꈹꀊꄶꎭꈧꌠꈬꄔꇬꄉꋌꏃꉈꑴꇁꌠꐩꋊꐩꍂꇫꐥꌠꑳꀊꊆꏭꄐꄉꅇꏤꒃ。ꋍꈭꐨꆏ，ꋀꊇꀋꎪꃅꋀꊨꏦꃅꄷꀀꇁꌠꉬ”ꄷ。
ꑳꀊꊆꆹꌋꅇꄜꊿꃶꀋꐚꈧꌠꋌꌌꋍꁮꐚꃅꄉ
9 ꉉꅷꅉꅇꄜꊿꀊꋨꈨꃆꂮꑟꑲꆏ，
ꉠꉌꂵꆅꌦꄉꏽ，
ꉠꃷꅍꈧꌠꑑꃹꏾꌌꀕ；
ꑳꀊꊆꌋꆀꋍꌃꎔꌠꅇꂷꐛꅹꃅ，
ꉡꆹꎧꑱꀿꂷꌡ，ꎧꇱꌅꌊꐺ。
10 ꃄꅉꇿꀕꑌꎼꃅꃏꑽꌠꐛꀐ！
ꃄꅉꍃꊌꏿꊌꐛꅹꐒꊀꏽ，
ꇈꈬꅔꈋꁬꆰꃅꄉꀊꃶꌐ。
ꋀꊇꈝꂿꄸꇁꅠꌠꍬ，
ꃄꈌꄐꃅꌅꈌꌬ。
11 ꌋꅇꄜꊿꌋꆀꆦꑝꊿꇯꆏꌋꁌꀋꒉꏦꀋꃪ。
ꉠꑷꂿꈐꏭꄉ，ꋀꃅꐨꑽꑌꄷꅠꈧꌠꉢꊌꂿ。
ꋍꑠꆹꑳꀊꊆꉉꌠꉬ。
12 ꑠꅹ，ꋀꈝꃀꆹꉔꈜꑠꏢꌡ，
ꋀꊇꀋꎪꃅꊿꇱꈹꅸꆈꋧꋪꅉꇬꊐꄉ，
ꐚꇁꇬꄚꌠꉬ；
ꑞꃅꆏ，ꃅꈎꉢꋀꇇꇩꍈꄹꈎꌠꑟꇬꆏ，
ꉢꀋꎪꃅꉮꃤꁳꇁꋀꌶꎽ。
ꋍꑠꆹꑳꀊꊆꉉꌠꉬ。
13 ꉡꆹꌒꂷꆀꑸꇓꈓꇬꌋꅇꄜꊿꌤꆿꄷꅠꊽꉌꁕꑠꃅꌠꉢꂿꋺ；
ꋀꊇꀠꆀꌦꌋꇇꄧꈴꄉꅉꄜ，
ꉠꑱꌝꆀꉹꁌꁳꈜꑽꎽ。
14 ꉡꆹꑳꇊꌒꇌꇓꈓꇬꌋꅉꅇꄜꊿꌤꆿꄷꅠꊽꐬꆠꑠꃅꌠꉢꂿꋺ；
ꋀꊇꎼꃅꃏꑽ，ꈱꅇꏅꅇꉉ，
ꊿꄸꌠꇇꀤꇇꄻꐺ，
ꊿꋍꊨꏦꄸꃤꅠꃤꐞꄉꀱꇁꑠꂷꀋꐥ。
ꉢꉜꇬ，ꋀꊇꆹꌙꄏꂷꇓꈓꌡ，
ꑳꇊꌒꇌꉹꁌꆹꀒꃀꇁꇓꈓꌡ。
15 ꑠꅹ，ꌋꅇꄜꊿꈧꌠꃆꂮꆏ，ꄙꀕꃪꀕꉬꉎꂽꑼꌊꁈꑳꀊꊆꑠꃅꉉ：
“ꇬꉚꄉ！ꉢꀋꎪꃅꉇꈌꄻꋀꍈ，ꅋꒉꄻꋀꄎ；
ꑞꃅꆏ，ꍍꋉꄸꄀꌠꌤꆹꑳꇊꌒꇌꇓꈓꌋꅇꄜꊿꈧꌠꄷꄉꅐꇁ，
ꁭꁘꅷꃄꇖꄹꊂꑟꀐ”ꄷ。
16 ꄙꀕꃪꀕꉬꉎꂽꑼꌊꁈꑳꀊꊆꑠꃅꉉ：“ꆍꊇꑴꌠꌋꅇꄜꊿꋋꈨꈀꄜꌠꅇꂷꑠꄡꅲ。ꋀꊇꆍꁳꀨꀋꐥꄩꀋꐥꑠꉘꇉꎻ，ꋀꈁꉉꌠꐛꒌꑠꆹꋀꉌꂵꒌꉪꌠ，ꉢꑳꀊꊆꉉꌠꀋꉬ。 17 ꋀꊇꅉꀕꃅꊿꉢꉚꄸꈧꌠꏭ：‘ꑳꀊꊆꄹꇬ，ꆍꊇꀋꎪꃅꋬꂻꊌꄷ’ꄷ。ꋀꊇꉈꑴꊿꆸꉈꆽꁁꌊꊨꏦꉪꐨꈴꄉꃅꈧꌠꏭ：‘ꉮꃤꈍꃅꑌꆍꌶꀋꇁ’ꄷ”ꄷ。
18 ꋀꊇꈀꄸꂷꑳꀊꊆꃀꈿꅉꇬꐊꄉ，
ꑳꀊꊆꅇꂷꋌꂿꋌꈨꋺ？
ꈀꄸꂷꉌꂵꑘꊐꄉꑳꀊꊆꅇꂷꅲ？
19 ꇬꉚ！ꑳꀊꊆꇨꇅꃃꐨꆹꆳꇨꉏꆈꌟꃅꁏ，
ꆲꏂꈀꇨꀕꌠꌟꃅꄓ，ꀋꎪꃅꇁꊿꄸꈧꌠꀂꏾꌸꌠꉬ。
20 ꑳꀊꊆꈍꃅꑌꇨꇅꃃꐰꀋꇁ，
ꅑꅸꋍꉌꂵꉪꄉꏣꄉ、ꄐꄉꏤꄉꈧꌠꃅꐛꌐꄮꑟ。
ꊁꇁꌐꂫꋍꑍꆏ，ꋍꑠꆍꊇꊨꄅꇁꌐꌠꉬ。
21 ꑳꀊꊆꑠꃅꉉ：
“ꌋꅇꄜꊿꀊꋨꈨꆹꉢꋀꁆꋀꄻꀋꋻꇬ，
ꋀꋧꁧꃅꇬꀥꐺ；
ꉢꋀꏭꅇꂷꉉꀋꋻꇬ，
ꋀꋧꁧꃅꅉꄜꐺ。
22 ꀋꄸꄷꋀꊇꉠꃀꈿꅉꇬꐊꋺꑲꆏ，
ꋀꊇꆹꀋꎪꃅꉠꉹꁌꁳꉠꅇꂷꅲꎻ，
ꉠꉹꁌꁳꄷꅠꈝꃀꐞꄉꄸꀋꃅꅠꀋꑽꎻ。
23 ꉡꆹꈛꑌꅉꇬꀉꄂꐥꌠꏃꃅꌋꅀ？ꈜꎴꐯꈜꎴꅉꇬꐥꌠꏃꃅꌋꀋꉬꅀ？ 24 ꊾꂷꂁꆈꈬꀕꅉꇬꀀꄉ，ꉢꋌꊊꀋꂿꄎꑴꅀ？ꋍꑠꆹꑳꀊꊆꉉꌠꉬ。ꉡꆹꃅꃴꃄꅉꇿꇬꑌꐥꌠꀋꉬꅀ？ꋍꑠꆹꑳꀊꊆꉉꌠꉬ。 25 ꌋꅇꄜꊿꀊꋨꈨꈁꉉꌠꉢꈨꀐ，ꋀꊇꉠꂓꄜꄉ：‘ꉢꀄꂼꂻꀐ！ꉢꀄꂼꂻꀐ！’ꃅꈱꅇꏅꅇꄜ。 26 ꌋꅇꄜꊿꈌꈱꉏꏅ、ꇬꇉꐈꋓꋋꈨꑠꃅꅷꈍꄮꑟꁧꌠꉬ？ 27 ꋀꊇꀄꂼꀧꐮꇰꄉ，ꉠꉹꁌꁳꉢꀋꎺꎻ，ꑠꆹꋀꁍꁈꈧꌠꀠꆀꌦꌋꊂꈹꁧꄉꉢꀋꎺꌠꌋꆀꐯꌟ。 28 ꌋꅇꄜꊿꀄꂼꂻꈧꌠꁳꋀꀄꂼꀧꎻ；ꄚꉠꅇꂷꊪꈧꌠꁳꀋꎪꀋꎙꃅꉠꅇꂷꉉꎻ。ꎬꏜꈨꈍꃅꌌꎭꂷꌡꉆꂯ？ꋍꑠꆹꑳꀊꊆꉉꌠꉬ。 29 ꉠꅇꂷꆹꃆꄔꌡꌠꀋꉬꅀ？ꇓꂵꋌꐷꋧꐛꃀꐛꌠꇁꄵꌡꌠꀋꉬꅀ？ꋍꑠꆹꑳꀊꊆꉉꌠꉬ。