ꑱꆀꂱꆹꒀꄊꇩꏤꎁꃅꐒꉩꏽ
9
10 ꑱꆀꂱꑠꃅꉉ： “ꉡꆹꁧꇂꇈꌺꎁꃅꐒꇁꊀꄉꑓꁴꑰꀕꇤ，
ꇈꈬꅔꈋꆫꁍꎁꃅꃚꐕꉐꐓꄉꐒꉩꏽ；
ꑞꃅꆏ，ꇿꇬꑌꀊꃶꃵꌣꀕꄉ，ꊾꂷꇫꈴꌠꀋꊌꀐ。
ꎇꃀꍅꑓꂾꃚꍈꇫꈌꀋꐚ，
ꃅꃴꇬꉌꊭꉌꇓꌋꆀꃄꅉꇬꑋꁮꉆꁮꑠꑌꆶꁧꌐꀐ。
11 ꉢꀋꎪꃅꑳꇊꌒꇌꇓꈓꁳꈥꅐꀜꅐꄉ，
ꇁꀉꐩꀀꅉꐛꎻ。
ꉢꀋꎪꃅꒀꄊꇓꈓꈧꌠꁳꈥꅐꀜꅐꄉ，
ꊾꂷꇬꀋꀀꎻ”ꄷ。
12 ꈀꄸꂷꉪꑌꌧꋬꄉ，ꌤꋍꑠꐝꉅꄎ？ ꑳꀊꊆꈀꄸꏭꉙꂘꄉ，ꋌꁳꉉꄜꎻ？ꃅꄷꋌꈚꑞꃅꀜꐡꆿꐢ、ꈥꅐꀜꅐꇈꈬꅔꈋꌡꄉ，ꊾꂷꇫꈴꌠꀋꊌꌠꉬ？ 13 ꑳꀊꊆꆏꑠꃅꉉ：“ꑞꃅꆏ，ꉹꁌꋋꈨꆹꄹꏦꋀꂾꄉꉢꄻꄉꈧꌠꋀꇤꇫꎭ，ꉠꅇꂷꀋꅲ，ꇬꍪꄉꃅꀋꅲꃅ， 14 ꀱꆽꃅꌊꋀꉌꂵꆸꉈꆽꁁꂶꌠꉪꐨꈴꄉꌤꃅ，ꋀꁍꁈꉙꅇꂘꅇꈧꌠꇬꍬꄉꀠꆀꌦꌋꊂꈹꁧ”ꄷ。 15 ꑠꅹ，ꄙꀕꃪꀕꉬꉎꂽꑼꌊꁈꑳꀊꊆ-ꑱꌝꆀꏃꃅꌋꑠꃅꉉ：“ꇬꉚꄉ！ ꉢꀋꎪꃅꉇꈌꄻꉹꁌꋋꈨꍈ，ꅋꒉꄻꋀꄎ。 16 ꋀꊇꉢꇱꁋꀘꇩꏤꋀꌋꆀꋀꁍꁈꇬꌥꇁꀦꀋꐥꅉꇬꎭ；ꉢꉈꑴꌞꊿꁳꂗꍵꑱꃀꌌꋀꈹꌉꇁꎻ，ꅑꅸꋀꈔꑍꌐꄮꇬꑟ”ꄷ。
ꑳꇊꌒꇌꊿꐒꉩꏽꄉꇖꂟ
17 ꄙꀕꃪꀕꉬꉎꂽꑼꌊꁈ-ꑳꀊꊆꑠꃅꉉ：
“ꆍꊇꉪꏡꄉ，
ꀋꃀꌦꏷꉙꇐꉙꌠꇴꌊꇁ，
ꊿꁆꌌꀋꃀꊾꉩꉔꌠꇴꌊꇁ，
18 ꋀꁳꉆꐥꃅꉪꎁꃅꐒꉩꇁꎻꑲꆀ，
ꉪꁳꑓꁴꑰꀕꇤꇁꎻ，
ꉪꁳꑓꁴꒉꐬꌟꃅꅐꇁꎻ。
19 ꑞꃅꆏ，ꑭꉢꇓꈓꇬꉨꃚ：
ꉪꊇꐤꊰꇧꁠꀐ！
ꉪꊇꎲꅐꁁꅐꀙꐯꀙꀐ！
ꉪꃄꅉꉪꇤꇫꎭ，
ꉪꑳꇤꊿꐆꇫꎭꀐ’ꃅꑠꇫꈌꐚꇁ”ꄷ。
20 ꌋꅪꈧꌠꀋ！ ꆍꊇꑳꀊꊆꅇꂷꅲꄡꑟ，
ꋌꈁꉉꌠꅇꂷꈧꌠꊪꄡꑟ；
ꆍꀋꃋꈧꌠꉙꂘꄉꐒꉩꎻꄡꑟ，
ꈀꄸꑌꐯꉗꐯꂘꄉꌦꏷꉙꇐꉙ。
21 ꑞꃅꆏ，ꌦꃤꌍꑓꇬꑆꄉ，
ꇁꉪꃰꃅꑷꂿꇬꃹ；
ꉈꏭꄉꀉꑳꋌꆼꐡꇫꎭ，
ꏦꈜꇬꄉꀊꉘꋌꆼꇽꇫꎭ。
22 ꆏꑠꃅꉉꄡꑟ，ꑳꀊꊆꄹꇬ：
“ꊿꂿꆹꑭꀖꌟꃅꃄꅉꇬꁊꈴ，
ꉈꑴꒇꋩꊿꇤꇫꎭꇈꌠꋚꊂꌟꃅ，
ꊾꂷꇫꉅꌠꀋꊌꇁꌠꉬ”ꄷ。
23 ꑳꀊꊆꑠꃅꉉ：“ꊿꌧꅍꂿꅍꐥꈧꌠꋍꌧꅍꂿꅍꌌꈌꄡꒉ，ꊿꌳꈄꀬꅑꈧꌠꋍꊋꌗꌌꈌꄡꒉ，ꎆꋚꌊꁈꈧꌠꑌꋍꇇꇐꌌꈌꄡꒉ； 24 ꊿꈌꒉꌠꆹꐥꑲꆏ，ꋌꀑꁮꄉꉢꋋꂷꋌꌧꋌꂿꑠꌌꈌꒉꄡꑟ；ꉡꆹꑳꀊꊆꉬ，ꉢꋧꃅꇬꄉꀋꑍꀋꈤꌠꉂꐪ、ꊒꆽꀕ、ꑖꉬꑠꇬꈴꄉꌤꃅꌠꉌꃹ。ꋍꑠꆹꑳꀊꊆꉉꌠꉬ”ꄷ。