ꑱꌏꑸꄯꒉ 58

ꋚꈻꄜꐨꇯꍝꌠ

1 ꆏꃚꐕꉐꐓꄉꏅ，ꀋꆏꃅꄉꏅ；

ꉶꁱꄏꌠꌟꃅꃚꐕꉐꐓꄉꉉ；

ꉠꉹꁌꈧꌠꏭꋀꑽꃤꄛꇰ，

ꑸꇱꄰꏯꋀꄸꃤꈧꌠꄜꉺ。

2 ꋀꊇꋍꑍꋑꀋꋒꉡꇖꉢꂟꐺ，ꉠꇗꅉꐝꉅꏾ，

ꑖꉬꈴꌠꇩꏤꌟꃅꋀꏃꃅꌋꏥꏦꋀꍞꇬꀋꎭ；

ꋀꊇꉠꏯꑖꉬꌠꀞꅇꇽꅇꇖꂟ，

ꉈꑴꉌꇿꃅꏃꃅꌋꄷꇁꏾ。

3 ꋀꊇꆏ：“ꉪꊇꋚꈻꇬ，ꆏꑞꃅꇬꀋꉜꌠꉬ？

ꉪꊇꊨꏦꇭꀧꏾꅍꆼꎭꄉꇬ，

ꆏꑞꃅꉪꀋꉜꀋꅲꌠꉬ？”ꄷ。

ꇬꉚ！ꆍꋚꈻꄮꇬꄡꇗꊨꏦꈲꏣꎹꐺ，

ꌞꊿꆍꎁꃅꑘꃅꃤꑽꈧꌠꁁꁒꋠꇬꎷ。

4 ꇬꉚ! ꆍꋚꈻꄮꇬꐯꊨꐮꇤ，

ꀋꂄꆈꒉꀕꃅꇵꊫꋏꌊꊿꅣꐺ。

ꆍꊇꀃꑍꑠꃅꋚꈻꇬꆹ，

ꆍꈼꅇꂟꅇꉬꉎꈨꆹꀋꄐꌠꉬ。

5 ꆍꊇꊨꏦꇭꀧꏾꅍꆼꎭꄉꋚꈻꑲꆏꉠꉌꃹꑴꄷꌠꅀ？

ꉢꊿꏭꀟꄖꌟꃅꀂꏾꈎꄉꇈ，ꃆꁁꌋꆀꈑꆠꈈꄉꀀꑲꆏꍑꀐꄷꅀ？

ꋍꑠꆏꌌꑳꀊꊆꇫꉌꃹꌠꋚꈻꃅꑍꉬꑴꄷꉉꉆꑴꅀ？

6 ꉠꉌꃹꌠꋚꈻꐨꆹ，

ꄷꅠꌠꎷꎤꇽꇫꎭ、ꇁꄉꇬꏦꀨꁌꇫꎭ、ꇁꄉꈀꐥꃅꆸꐔꇫꎭꄉ，

ꊿꇱꌌꆼꍅꆹꆋꈧꌠꁳꄿꐨꊌꎻꌠꀋꉬꄿ？

7 ꆏꁳꋠꅍꁸꊿꂮꐚꈧꌠꍈ，

ꊿꌢꎭꄉꄁꃰꏿꐺꈧꌠꏃꀁꇬꇁ，

ꅩꀧꍓꈧꌠꃢꈜꄻꇬꇢ，

ꅽꇨꊨꏣꑟꈧꌠꂾꐵꄡꐺꎻꄷꌠꀋꉬꅀ？

8 ꑠꃅꑲꆏ，ꁨꑭꆹꀋꎪꃅꎹꄓꉘꁮꑭꌟꃅꇁꆏꌶ，

ꅽꆅꃤꑌꋋꇅꃅꉃꄻꌒ；

ꅽꑖꉬꅽꂾꐊꄉꆎꈜꏁ，

ꑳꀊꊆꀑꒉꑊꒉꀋꎪꃅꅽꊂꄉꆎꀧꌋꃅꌠꉬ。

9 ꀊꋨꄮꇬꆏ，ꆏꈼꂟꑲꆏ，ꑳꀊꊆꀋꎪꃅꅽꅇꀱ，

ꆏꇖꂟꑲꆏ，ꋌꀋꎪꃅ：“ꉢꄚꇬꐥ”ꄷ。

ꀋꄸꄷꅽꈬꄔꇬꇁꄉꀉꇖꌠꆏꆼꇽꇫꎭ，

ꆏꇇꏸꄂꄉꊽꏯꀋꊨ，ꅇꄸꉐꄸꑠꀋꉉ，

10 ꊿꂮꐚꌠꎭꃅꉈ，

ꌢꎭꌟꁧꌠꁳꋠꂊꎻꑲꆏ，

ꅽꁨꑭꀋꎪꃅꇁꆈꋧꀕꅉꇬꁨ，

ꅽꃅꒉꆈꏸꀕꌠꑌꇁꂵꆧꁤꇅꀕꌠꌡꌠꉬ。

11 ꑳꀊꊆꀋꎪꃅꆏꏁꆏꂠꇬꎷ，

ꃅꃶꃅꌘꅉꇬꄉꅽꉌꂵꒈꊭꑙꎽ，

ꅽꃷꅍꁳꄉꇷꄙꊋꑌꎻ。

ꆎꆹꀋꎪꃅꉻꈫꀆꐒꎭꄉꂷꌡ，

ꉈꑴꒉꐬꒉꀕꀋꈘꏡꃅꈳꐬꌡ。

12 ꆍꊇꈬꄔꊾꈨꀋꎪꃅꇁꌊꃅꄷꀊꉗꃅꈥꅐꀜꅐꀐꈧꌠꋈꀱ，

ꀊꆨꋍꋏꇈꋍꋏꃅꌆꄉꌠꅉꃀꂶꌠꋈꀱꇁ。

ꊿꀋꎪꃅꅽꏯ‘ꎒꈌꐠꈌꋍꑕꂶꌠ、 ꈝꃀꄺꀱꄉꊿꁳꇬꀀꇁꎻꂶꌠ’ꃅꇴꌠꉬ。

ꑬꆏꃅꑍꏦꃤꍬꌠꌒꃤꊌ

13 ꀋꄸꄷꆏꑬꆏꃅꑍꏦꀋꐆ、ꈜꎴꃅꀋꁧ，

ꉠꑬꆏꃅꑍꄹꉇꌤꅽꊨꏦꉌꃹꐨꑠꀋꃅ，

ꑬꆏꃅꑍꄹꉇꆏꌌꉌꇿꑓꇿꃅꑍꑠꑍꃅꄉ，

ꑳꀊꊆꑬꆏꃅꑍꄹꉇꆏꇫꁌꒉꄉꆏꌌꃅꑍꀋꉬꀋꉆꑠꑍꃅꄉ，

ꆏꊨꏦꈀꈴꏾꅉꇬꀋꈴ，ꊨꏦꈀꉌꃹꅍꀋꎹ，ꈁꏾꃅꇬꉇꇬꀋꎹꑲꆏ，

14 ꆎꆹꑳꀊꊆꆏꌌꅽꉌꇿꐨꃅꄉꌠꉬ。

ꑳꀊꊆꑌꆎꁌꒉꄉꆏꁳꄩꀊꂥꅉꐥꎻ，

ꉈꑴꅽꁍꁈꑸꇱꁨꇐꄉꇐꈧꌠꌌꆎꉘꆎꄻ。

ꋍꑠꆹꑳꀊꊆꉉꌠꉬ。