ꑱꌏꑸꄯꒉ 28

ꑱꃔꆃꄰꏯꅇꈪꊐ

1 ꑱꃔꆃꄰꎧꑱꀿꆺꒉꄇꒉꌠꄂꌆꀍꄟꅑꈧꌠꆹꉮꃤꐥꀐ，

ꋀꀑꒉꑊꒉꆹꃨꊰꌟꃅꊰ；

ꋀꊇꃅꂂꃅꎔꌠꇁꄿꄩꀀꄉꎧꅝꎧꑱꇧꁠꀐ。

2 ꇬꉚ！ꌊꆹꊋꃤꈀꇨꀕꑠꂷꐥ，

ꋋꆹꋒꌦꉐꂷꀉꇨꑠꄲꌡ，

ꃅꆳꂷꉐꊾꈔꋏꑠꄲꌡ，

ꒉꃀꒈꅐꅶꁆꍤꁆꌩꑠꂡꌡ，

ꋌꀋꎪꃅꇇꐛꄉꋀꊇꋌꇵꃄꅉꇬꄚꌠꉬ。

3 ꑱꃔꆃꄰꎧꑱꀿꆺꒉꄇꒉꌠꄂꌆꀍꄟꅑꈧꌠꆹ，

ꀋꎪꃅꄉꊿꌌꄔꈻꇁꌠꉬ。

4 ꋀꀑꒉꑊꒉꆹꃨꊰꌟꃅꊰ，

ꇁꄿꃅꂂꃅꎔꏢꄩꋦ，

ꃅꎸꄮꐰꑟꇁꂾꀋꃨꂶꀕꇬꂾꂔꌠꌟꃅ，

ꊿꊌꂿꄷꌦꆏ，

ꊿꑣꇇꈐꊐꄉꊿꇣꋠꌠꉬ。

5 ꀊꋨꄹꉇꑟꇬꆏ，ꄙꀕꃪꀕꂽꑼꌊꁈ-ꑳꀊꊆꆹ，

ꀋꎪꃅꇁꋍꉹꁌꇫꋒꇈꈧꌠꀑꒉꑊꒉꌠꄂꌆꀍꄟꐛꌠꉬ；

6 ꇁꑋꅉꇬꑌꄉꊒꆽꀕꃅꀞꇽꌠꒋꂷꐛ，

ꇁꇓꈓꀃꈈꁭꑭꁮꄙꐙꄙꌠꊋꃤꐛ。

ꒀꄊꄰꌟꒉꌠꂾꎧꑱꈧꌠ

7 ꊿꋋꈨꆹꎧꑱꄉꉉꆹꉇꆹꃅꐙ，

ꎦꆈꑱꄉꐚꐰꅞꐚꉎꅞꃅꐺ，

ꆦꑝꊿꌋꆀꌋꅇꄜꊿꎦꆈꑱꄉꉉꆹꉇꆹꃅꐙ，

ꎧꑱꄉꁍꇑꎴꇉꌊꐚꐰꅞꐚꉎꅞꃅꐺ。

ꐛꒌꋀꊌꂿꌠꋀꄜꋊꆹꑽꇫꎭ，

ꀞꇽꄮꇬꉬꀋꉬꌠꑌꊨꀋꄅ。

8 ꋠꄜꈧꌠꄩꃅꋀꐷꐛꄉꊽꉌꁕꑓꆽꀕ，

ꁦꎴꑠꈚꂯꇬꀋꐛꀐ。

9 ꋀꊇꆏꉠꏯ：“ꋌꌧꇐꂿꇐꌌꈀꄸꂘꐺꌠꉬ？

ꅇꂷꉐꂷꋍꑠꄜꋊꈀꄸꇰꐺꌠꉬ？

ꋌꉉꀉꑳꀉꆂꀋꅝꀐꄉꀉꂿꂣꈐꀋꀀꈧꌠꇰꌠꅀ？

10 ꑞꃅꆏ，ꋋꆹꉃꅐꉄꅐ、ꊉꋪꊉꑑ、ꅇꌆꉐꌄ，

ꋌꑵꉬꄷꌦ、ꀊꋩꑵꉬꄷꌦꃅꉉꇬꎷ”ꄷ。

11 ꑠꅹ！ꑳꀊꊆꆹꉇꉻꊿꊾꁒꊿꐀꌠꈂꀸꌋꆀꉐꆂꁳꉹꁌꋋꈨꏭꅇꉉꎻ。

12 ꋌꋀꏭ：

“ꄚꇬꆹꑬꆏꅉꉬ，

ꆍꊇꊿꐙꄏꌍꆜꌠꁳꑬꆏꎻ，

ꋌꈚꆹꑬꆏꅉꉬ”ꄷ。

ꄚꋀꊇꆏꇫꅲꀋꅲ。

13 ꋀꊇꉜꇬꆹ，

ꑳꀊꊆꅇꂷꋋꈨ“ꉃꅐꉄꅐ、ꊉꋪꊉꑑ、ꅇꌆꉐꌄ，

ꋌꑵꉬꄷꌦ、ꀊꋩꑵꉬꄷꌦ”ꃅꐙ；

ꑠꅹ，ꋀꊇꁨꏭꉜꄉꁧꇬ，ꀍꃈꀱꆽꃅꐚꉈꑴꄚ，

ꄷꀋꁧꂷꊂꌸꇈ，ꊰꃅꐬꇬꊐꄉ，ꊿꇱꒃꅜꀐ。

ꑭꉢꇓꈓꑳꎏꄅꇓ

14 ꑠꅹ，ꆍꊇꑳꇊꌒꇌꉹꁌꏲꂠꌠꊾꁒꊿꐀꋋꈨ，

ꑳꀊꊆꅇꂷꅲꄡꑟ。

15 ꆍꊇꄹꇬ：

“ꉪꊇꌦꃤꌋꆀꏤꐪꒃꄉꀐ，

ꌦꊿꐤꅉꌋꆀꐯꐉꏤꐪꒃꄉꀐ，

ꂸꀴꄡꀋꉆꌠꏶꎼꇁꇬ，

ꈍꃅꑌꇁꉪꌶꀋꄐ，

ꑞꃅꆏ，ꉪꊇꆹꈱꅇꌊꉪꁾꅉꃅꄉ，

ꃶꀋꐚꌠꌊꉪꂁꅉꃅꄉ”ꄷꉉꋺ。

16 ꑠꅹ，ꌋꑳꀊꊆꑠꃅꉉ：

“ꇬꉚ！ꇓꂵꂷꉢꄻꅉꃀꃅꑭꉢꇓꈓꄉ，

ꇓꂵꋋꂷꆹꎖꉺꌠꊝꅗ，

ꋋꆹꁌꇐꈤꌠꑳꎏꄅꇓ、ꈫꈈꌠꅉꃀꉬ；

ꊿꋋꉘꇈꌠꆹꏦꅍꀋꐥ。

17 ꉡꆹꊒꆽꀕꌠꉢꌌꎖꑟꃅꄉ，

ꑖꉬꉢꌌꎖꑟꏣꇓꃅꄉ；

ꈰꏅꌠꁾꅉꆹꋒꌦꉐꂷꂨꇫꎭ，

ꆍꂁꅉꆹꒈꂃꒊꆫꉱꇫꎭ。