ꑱꌏꑸꄯꒉ 11

ꄮꐽꌠꏲꄸꃯꉻ

1 ꑳꑭꄰꐴꀠꇬꄉꀋꎪꃅꍡꌺꇫꅿꇁ，

ꍡꌺꋍꐴꀠꇬꄉꅿꇁꋌꐘꆹꀋꎪꃅꂷꅑꇁꌠꉬ。

2 ꑳꀊꊆꒌꆹꀋꎪꃅꇁꋍꇭꀧꇬꌵ，

ꋋꆹꉪꑌꌧꋬꌠꌋꆀꀑꁮꅺꐳꌠꒌꉬ，

ꁈꏂꁈꇭꌠꌋꆀꊋꃤꈀꇨꀕꌠꒌꉬ，

ꌧꇐꂿꇐꌋꆀꑳꀊꊆꁌꒉꏦꃪꌠꒌꉬ。

3 ꋋꆹꀋꎪꃅꑳꀊꊆꁌꒉꏦꃪꌠꋌꌌꉌꇿꅍꃅꄉ；

ꋌꋍꑓꋪꈀꂿꈧꌠꇬꈴꄉꌤꆿꀞꇽꌠꀋꉬ，

ꋌꋍꅳꀧꈀꈨꈧꌠꈴꄉꉬꀋꉬꌠꊨꇽꌠꀋꉬ；

4 ꄚꋋꆹꑖꉬꈴꄉꌢꎭꌟꁧꌠꀞꇽ，

ꊒꆽꀕꃅꃄꅉꇬꎬꅧꌠꊨꇽ，

ꋍꈌꇬꅇꂷꌊꄯꁯꌟꃅꋧꃅꋋꂷꅥꏶ，

ꋍꈂꀸꇬꁖꇁꌠꌗꌊꊿꄷꅠꌠꈔꋏ。

5 ꑖꉬꆹꀋꎪꃅꋌꌌꐧꃬꃅꄉꅑ，

ꀋꎪꀋꎙꐨꆹꋌꌌꐧꀨꇬꉊꄉ。

6 ꀊꋨꄮꇬꆏ，ꆿꃀꀋꎪꃅꄉꑾꌺꌋꆀꋍꈚꀀ，

ꍀꉘꌋꆀꍶꌺꋍꈚꀀ，

ꆿꅪꌋꆀꇂꇤ、ꎆꋆꌠꐯꈽꐥ；

ꀉꑳꌺꁳꂴꄉꏃꐺꎻ。

7 ꑍꃀꌋꆀꊈꂾꐯꈽꄉꏜꋠ，

ꇂꇤꌺꌋꆀꊇꌺꐯꇯꋍꈚꀀ，

ꆿꅪꌋꆀꇂꁮꐯꈽꏜꋠꐺ。

8 ꀉꑳꀿꏂꌺꀉꆂꅝꌠꆹꂶꃶꏂꀀꈌꇬꈩꐺ，

ꀉꑳꌺꀉꆂꀋꅝꀐꌠꇇꌌꅋꑌꁮꏂꀀꅉꐫꇓꇬꉩꐺ。

9 ꉠꌃꎔꁧꇬꋍꈚꋑꀋꋒ，

ꋍꑠꐯꇯꊿꀋꑝꊿꀋꄵꀐ，ꐮꈔꋏꑠꑌꇬꀋꐥ；

ꑞꃅꆏ，ꑳꀊꊆꌧꂿꌠꌧꇐꆹꃄꅉꇬꃅꐛꈴ，

ꀆꐒꇁꎿꃀꇬꃅꐛꈴꌠꌋꆀꐯꌟ。