ꑮꃀꌳꉔꂷꃆꂮꄜ
31
10 ꑮꃀꌳꉔꑠꂷꈀꄸꋌꊊꄐ？ꋋꆹꃀꆏꍗꀕꈀꉾꀕꌠꏭꀋꋌꃅꁌꇐꈤ。
11 ꋍꌐꃶꋋꉈꊪ，
ꀋꎪꃅꊌꐨꀋꇎꅍꀋꐥꌠꉬ。
12 ꋋꆹꋍꐥꍂꃅꌐꃶꁳꈲꏣꀉꄂꊌꎻ，
ꉮꏣꊝꀋꎽ。
13 ꋌꑾꎭꌋꆀꃆꏼꎹꈹꌊ，
ꉌꇿꃅꄉꎭꋩꑱꍹ。
14 ꋋꆹꀋꇊꆏꃼꇇꃅꊿꆳꂾꇷꌟꃅ，
ꋍꑱꈐꑱꑭꊿꎁꃅꋚꄎꒉꏤ，
ꑘꃤꃅꋭꌠꋌꁸꁏꃀꈧꌠꁳꃅꎻ。
16 ꋋꆹꉪꏡꄉꃄꅉꏬꋌꃼꌊꇁ，
ꎆꃀꋍꊨꏦꎹꄉꌠꌊꑌꃀꌧꊈꏬꋌꊪꄉ。
17 ꋋꆹꐧꑭꍣꄉꄐꅍꐥ，
ꆧꁨꊋꑌꑘꇨꐔ。
18 ꋋꆹꋍꃼꇇꍍꊵꎑꌠꋌꅉꐚ，
ꋍꂷꇭꆹꈊꃀꋋꉔꃅꄔꄉꇬꎷ。
19 ꋌꇇꎇꎭꆺꄳꄿꌭ，
ꇇꌌꑟꑊꎭꃹꏮ。
20 ꋌꇇꁮꁉꄉꌢꎭꌟꁧꌠꇲꄻ，
ꆧꁨꎇꌊꀋꇎꀋꂪꌠꇇꀤ。
21 ꋋꆹꃰꐛꆈꁌꀕꑌꋍꑱꈐꊿꊂꀋꐒ，
ꑞꃅꆏ，ꋀꋋꑷꃅꃢꈜꊪꅪꊷꆣꀕꌠꈚꌐ。
22 ꋌꊨꏦꎁꃅꀀꀨꈈꇉꄺꑣ，
ꋍꃢꈜꆹꃆꁁꀊꌤꌠꌋꆀꑸꀬꊪꅪꌠꌊꈪꄉ。
23 ꋍꌐꃶꋀꃅꄷꅡꈭꌟꒉꈧꌠꈽꇓꈓꄇꂿꁭꑭꑌꇬ，
ꊿꃅꋌꌥꌐ。
24 ꋌꃆꁁꀊꌤꌠꌊꃢꈜꈪꄉꃷ，
ꐧꃬꄻꌊꃼꇇꃅꊿꃷ。
25 ꊋꃤꌋꆀꀑꑊꋌꌌꃢꈜꃅꄉꈚ，
ꋌꉪꊁꇁꋍꑍꐥꐨꄀꇬꇿꒉꏽ。
26 ꋌꈌꋊꅇꉉꄷꌦꆏ，ꉪꑌꌧꋬꅇꂷꇫꅐꇁ，
ꋍꉐꆂꆹꉂꑟꅑꌠꉙꅇꂘꅇꉉ。
27 ꋌꑱꈐꑱꑭꏲꂠ，
ꑘꀋꁨꃅꋙꋠꀋꋻ。
28 ꋍꌳꃈꅮꈧꌠꇁꌊꋍꏭꋌꌒꃤꊌꌠꉬꀐꄷꄜ，
ꋍꌐꃶꑌꋋꀮꋌꄑꄉ：
29 “ꌋꅪꌳꉔꌠꌐꃅꌐꀋꄿ，
ꄚꈀꐥꃅꆏꏡꑠꂷꇬꀋꐥ”ꃅꉉ。
30 ꇐꑌꌋꉆꑠꆹꉇꇷꉇꉻꀉꄂꌠ，ꅪꁧꎔꑌꋍꁊꎔ；
ꌋꅪꑳꀊꊆꁌꒉꏦꃪꌠꀉꄂꀋꎪꃅꄉꍗꅇꊌ。
31 ꆍꊇꋌꈀꃅꈁꑽꄉꈧꌠꐛꅹꃅꈁꁠꄻꋌꁳ，
ꋌꁳꋍꃅꐨꐛꅹꃅꇓꈓꄇꂿꁭꑭꄉꀑꑊꊌꎻꅊꇈ。