ꂘꅇꇐꀳ 30

ꑸꇴꇓꄜꉺꅇ

1 ꑸꏸꄰꌺꑸꇴꇓꆹꏃꃅꌋꇁꋋꉌꐡꄉ，

ꑱꄝꌋꆀꃷꏧꑋꏯꑠꃅꄜꉺ：

2 ꉡꆹꊾꂷꀋꌡꃅꎇꃀꂷꌡ，

ꊿꌟꃅꀑꁮꅺꐳꃅꀋꐛ。

3 ꉡꆹꌧꅍꂿꅍꉢꋋꌷꀋꊌ，

ꌃꎔꋍꉎꀋꐥꂶꌠꑌꉢꇬꀋꌧ。

4 ꈀꄸꂷꉬꉎꁧꇈꀱꀁꋌꇁ？

ꈀꄸꂷꃅꆳꋌꈹꇇꁮꇬꊐꄉ？

ꈀꄸꂷꀆꐒꋌꄟꀂꄁꇬꊐꄉ？

ꈀꄸꂷꃄꅉꇖꎏꄹꌐꋌꄀꄉ？

ꋌꑞꂓ？ꋍꌺꆹꑞꂓ？

ꆏꅉꐙꀕ？

5 ꏃꃅꌋꅇꂷꆹꋍꇬꋑꀋꋒꅇꌃꉬꌐ，

ꊿꋌꊩꋋꁠꐥꌠꆏ，ꋌꇁꋀꄩꈜꐛ。

6 ꆏꋍꅇꂷꈧꌠꇬꁧꎆꇱꀋꉆ，

ꑠꀋꉬꑲꆏ，ꋌꇁꌊꅽꏯꊨꀖꄉ，ꆏꈰꏅꌠꄇꇖꀕꇁꂵ。

7 ꏃꃅꌋꀋ！ꉢꅽꏯꌤꑍꐘꇖꂟ，

ꉢꀋꌦꀕꇯꆐ，ꆏꈀꎭꀕꃅꉠꇖꅇꂟꅇꅲ：

8 ꆏꈀꎭꀕꃅꃶꀋꐚꌠꌋꆀꈱꅇꏅꅇꑠꁳꉡꐞꁧꎻ；

ꉢꁳꌢꎭꄡꎽ，ꌣꈚꑌꄡꎽꃅ，

ꉢꈁꈉꌠꋠꅍꅝꒉꈧꌠꄻꉡꇖ。

9 ꑠꀋꉬꑲꆏ，ꉢꋠꇎꅝꄀꇨꄉꀱꌊꆏꀋꌧꃅ：

“ꑳꀊꊆꆹꈀꄸꉬ？”ꃅꉉꇁꂵ；

ꉈꑴꆏ，ꉢꌢꎭꇰꅠꀕꌊꈏꈱꄉ，

ꉠꏃꃅꌋꂓꉢꌌꍍꋉꄸꄀꂵ。

10 ꌌꁈꂾꄉꋍꁏꐚꊂꀠꀋꉆ，

ꋌꆏꍁꆏꏽꄉ，ꆏꇁꊿꑽꃤꐤꂷꐛꂵ。

11 ꊿꋍꑵꆏ，ꀉꄉꍃꏽ，

ꋬꂻꄻꀉꂿꀋꁵ。

12 ꊿꋍꑵꆏ，ꋍꊨꏦꁦꎴꎻꈁ，

ꄚꇯꍝꃅꇬꋍꊨꏦꍍꃤꆀꃤꒈꋌꇬꀋꎭꑴꌦ。

13 ꊿꋍꑵꆏ，ꆺꒉꄇꒉꑓꋪꀏꉜꀋꇁ，

ꑞꑌꋌꉜꑓꋪꊐꀋꄉ。

14 ꊿꋍꑵꆏ，ꎐꂷꂗꍵꌡ，ꑣꎐꅅꃅꌡ，

ꐧꇁꃰꊿꎬꅧꌠꌋꆀꌢꎭꌠꐯꇯꑍꅝꌐꏭꄐ。

15 ꁶꆹꀋꃋꑍꂷꐥ，

ꅉꀕꃅ：“ꉢꁳꇁ，ꉢꁳꇁ”ꃅꏅꇬꎷ。

ꇎꇁꀋꉆꌠꆏꌕꑵꐥ，

ꐥꅷꇁꇬ“ꇎꀐ”ꃅꉉꀋꋻꌠꇱꑲꆏꇖꑵꐥ：

16 ꌦꊿꐤꅉ、ꌺꒆꇖꉘꀋꄐꌠꀋꃀ、ꒉꅝꇎꇁꀋꉆꌠꃄꅉꌋꆀ‘ꇎꀐ’ꄷꉉꀋꇁꌠꃆꄔ。

17 ꊿꀉꄉꒊꈧ、ꀉꂿꉜꄸꄉꇫꅇꀋꃅꌠꆏ，

ꋍꑓꂷꀋꎪꃅꇉꈫꇁꄿꀉꐚꄵꇫꎭ，

ꏬꌺꇱꑢꅝꌠꉬ。

18 ꉢꇫꎖꇬꑞꀋꄐꌠꌤꆿꇣꋲꌠꆏꌕꑵꐥ，

ꉢꇬꀋꌧꌠꇱꑲꆏꇖꑵꐥ：

19 ꃅꈬꇬꏬꆉꐙꏦ，

ꇓꆈꀋꃀꄩꁮꏂꐿꏦ，

ꎿꃀꇬꆳꂾꈳꏦ，

ꌺꃰꌋꅪꐮꉂꏥꏦ。