40
1 Intu-man Apu Dios ni immehel nan Job 2 ey kantuy “Kaw wada pay edum ni ihhumang mun hi-gak, e Dios e Kabaelan tun emin? Kammuy hi-gak neihla. Imay, et manhummangan ita.”
3 Kan Job nan Apu Dios ey 4 “Endin hekey hu bilang ku, et humman hu, endi ihhumang kun hi-gam. 5 Dakel law inhel ku et humman hu, endi law edum ni nak e-helen.”
6 Entanniy immehel mewan hi Apu Dios e wada etan di pewek et kantuy 7 “Imay, manhinnanggan ita ma-lat wada mahmahak ni hi-gam niya mahapul ni hummangem. 8 Kaw ya pinhed mun e-helen ey hi-gam hu limpiyuh niya neiptek, beken ni hi-gak? 9 Kaw neiingngeh hu elet mud elet ku? Kaw heni kidul hu ehel mu henin ehel ku? 10 Hedin kammuy ‘Em’ peang-ang mu kakulugan ni dayaw mu niya muka pampahhiyai henin kapengippeang-angin patul ni dayaw tu niya kasina-gey ni saad tud tuka pambalwasi. 11 Ey peang-ang mu bunget muddad tutu-un kamampahhiya ma-lat mampekumbabah ida. 12 Itkel mun hi-gada niya ibabah mudda, anin idan lawah ni tutu-u et pakabbahbah mudda. 13 Iku-kum idad puyek niya heni mudda ikelabut di bebley idan netey. 14 Et hedin kinabaelan mun impahding ida humman, ey hi-gak memengngulun menettebal ni hi-gam niya ebbuluten ku e nengapput ka. 15 Nemnem mu e ya hippopotamus e anggetakkut ni animal ey winedak dama henin hi-gam. Ya helek tuka kenna e henin baka. 16 Nem naka-let humman ni animal. 17 Maka-andeng hu ikul tu e henin keyew e sedar niya mekelhidda laman ni heli tu. 18 Ey mekelhi genit tu henin gembang, niya mekedhel hu heli tu e heni gumek. 19 Humman keka-ka-letan di emin ni animal ni lintuk niya hi-gak ni ebuh pakeapput ni hi-gatu. 20 Wadadda hu kakkayyaggud ni kennen tud duntuduntug e kapan-a-ayyamin edum ni animal. 21-22 Kamanhiddum di gilig ni wangwang di hengeg idan katlubbung e hinenian ni helek e lotus et yadda keyew e willow. 23 Eleg umtakut ni naka-let ni danum di Wangwang e Jordan ey eleg tu hengnguda anin ni mangkepaghitan angah tun danum. 24 Hipa wada kabaelan tun mengullap nunman ni animal ma-lat depapen tu? Ey hipa wada kabaelan tun mengikket ni eleng tu?