39
Intu-man Apu Dios ni immehel nan Job
1 Kaw inamtam hu getud ni pan-ungngaan idan gelding di duntug? Ey kaw inang-ang mu hu ina-nun kapanpa-lekin makwah? 2-3 Ey kaw inamtam hedin piga bulan da ni han ida limmukbub ni mampa-lek? 4 Hedin neetteng hu impah da et na-let ida law ey ngenamung idan lawwan da.
5 Hipa nengiebulut ni mambalin idan immeyew hu edum ni kebayyu? 6 Hi-gak ni ebuh nengituttuddun hi-gadan meteggu etan di neahinan ni palnah di eleg mebebleyi. 7 Ida kameiddawwid umpaliteng ni bebley et eleg ida mabalin ni meeyyum ma-lat mengu-unnud ida. 8 Yaddad duntug ni daka panha-adi hu daka penemmakin kennen da.
9 Kaw dammutun meeyyum hu immeyew ni baka ma-lat dammutun pangngunnu winu an manha-ad etan di nekapyan panha-adan tu? 10 Ey kaw dammutun i-iket mu hakey et pan-aledum? 11 Kaw dammutun iddinel mud elet tu et maingunu hu ingngunum? 12 Kaw dammutun hi-gatu iddinel mun mengi-ennamut ni pagey mu?
13 Ya ostrich ey elistun mengippeyagpag ni payak tu. Nem eleg tu han-apput hu stork ni umtayab. 14 Ey tuka hi-yanadda itlug tud palnah et ngenamung idan man-a-attung diman et manekeban. 15 Eleg tu ikkaguh hedin wada mengigsin winu iddeyapdap ni animal di muyung hu itlug tu et magmik. 16 Ey anin ni me-pah ida et henidda beken tun impah e eleg tu ikkaguh hedin mettey ida. 17 Hanniman nengapyak ni hi-gatu e endi nemnem tu tep eggak idwatan ni laing tu. 18 Nem hedin umbesik, man hi-gatu keka-ka-letan e tuka li-bahi tuun nantakkay di na-let ni peteg ni umbesik ni kebayyu.
19 Job, kaw hi-gam nengidwat ni elet idan kebayyu? Ey kaw hi-gam nengipatmel ni andukkey ni bewek di tengda da? 20 Kaw hi-gam nengidwat ni elet dan umpaytuk e henin dudun? Ey kaw hi-gam nengidwat ni kaumtenul di eleng da et penattakkut dan tuu? 21 Hedin ida mekiggubbat man daka pan-iku-met heli dad puyek. Ey nemahhig e na-let idan umbesik. 22 Eleg da amtan umtakut ey eleg da tekkusi ispadah. 23 Kamangkillang almas idan sindalun nantakkay ni hi-gada niya kaumhili hedin naptangan. 24-25 Hedin simmenul tangguyup e humman pengippeamtaan da e wada gubat man ihik idan umbesik. Eleg ida um-ineng. Ida kaumkenu-ngeh hedin dingngel da tenul ni tangguyup. Da mewan kagibbeka e wada gubat anin ni neidaddawwi kad-an da. Hedin dingngel da mandal idan ap-apun sindalu man ihik idan mekiggubbat.
26 Kaw hi-gam nenuttuddun gawwang ni umtayab ma-lat mampalaw di south ni ahi kettekettelan? 27-28 Kaw pakkadek mandalem hu tulduh et han tumyab di eta-gey ni an mengapyan buya tud ta-pew ni babattu etan idad naka-itta-gey ni duntug? 29 Kaman-uh-uhdung diman et ang-angen tu animal ni dedpapen tun kennen tu, 30 ni neamung ida impah tu et pangkanen da.”