Job 35

Intu-man Elihu ni immehel

¹ Immehel mewan hi Elihu nan Job ey kantuy ² “Beken ni kayyaggud e Job hu kammuy ‘Endi liwat kun Apu Dios.’ ³ winu kammuy ‘Endi silbi tun nakka pengu-unnudin hi-gatu.’ winu kammuy ‘Hipa ginunggunah kun eleg manlilliwwat?’

⁴ Hummangen ku hu inhel mu niyadda inhel ni gagayyum mu. ⁵ Itengaw mud kabunyan et ang-angem ida kulput ni naka-itta-gey. ⁶ Hedin kantu et neliwtan ka niya dakel nanliwatan mu, kaw wada mabalin ni ippahding ni liwat mun Apu Dios? ⁷ Ey hedin kantu et kakkayyaggud impahding mu, kaw wada ibbaddang tun hi-gatu winu hipa mahapul tun dammutun iddawat mun hi-gatu? ⁸ Yadda edum mun tuu hu mebaddangan di kayyaggud ni impahding mu niya hi-gada manhelheltap di lawah ni impahding mu.

⁹ Hedin neligtan hu tuu ey ida kamampehemmehemmek di tuun dammutun umbaddang ni hi-gada ma-lat meihwang di diman ni ligat. ¹⁰ Nem beken ni hi Apu Dios e nanletun hi-gada hu daka pampebaddangi, anin ni hi-gatu kamenga-alluk ni tuu ma-lat dammutun man-a-appeh ida, anin ni wada ligat da. ¹¹ Em, eleg ida mampebaddang ni hi-gatu e nengidwat ni kalinaing da et eta-ta-gey ida nem yadda sisit niyadda animal.

¹² Ey hedin mandasal ida man eleg hummangan Apu Dios hu dasal da, tep ida kamampahhiya niya lawah ida. ¹³ Et humman hu, endi silbitun ida mandasal nan Apu Dios e Kabaelan tun emin, tep eleg tu dedngela dasal da. ¹⁴ Ey naka-ihhalla kumamman hedin kan tayuy eleg tu ang-anga kameipahpahding. Tep limpiyuh tuka pehding nem pakkadek ni ennusan tayun hehgeden. ¹⁵ Kaw kammu nem eleg kastiguan Apu Dios hu kamanliwwat? ¹⁶ Endi silbin in-inhel mu tep eleg mu amta muka e-e-hela.”