Job 34

Intu-man Elihu ni immehel

¹ Kan mewan Elihu ey ² “Hi-gayun nekallaing niya nekannemneman, dengel yu eya e-helek. ³ Ya bungut kamenamtam hedin mepelhat hu kennen. Heni daman tangila e tuka dedngela hedin kayyaggud winu lawah etan ehel. ⁴ Wadan hi-gatsun mannemnem hedin hipa neiptek niya hi-gatsu mengamta hedin hipa kayyaggud. ⁵ Hi Job ey kantuy ‘Endi bahul ku ey beken ni meandeng hu kapenuwet Apu Dios.’ ⁶ Ey kantuy ‘Endi bahul ku nem kanday maitekkak. Eleg me-kal eya degeh ku anin ni eleggak manliwat.’

⁷ Kaw wada inang-ang yun tuun henin Job e endi lispituh tun Apu Dios? ⁸ Pinpinhed tun mekikkillaw ni tuun lawah nemnem tu. ⁹ Ey kantuy ‘Endi silbitun pengu-unnudan nan Apu Dios.’

¹⁰ Dengel yu e-helek, hi-gayun amta tu mengewwat. Emin tuu ey amta da e eleg manliwwat hi Apu Dios e Kabaelan tun emin. ¹¹ Hedin ya tuka pehding ey tuka iddawat hu lebbeng tun meidwat dedan di hakey ni tuu, meippuun di hipan impahding nunman ni tuu. ¹² Ya kakulugan tu ey eleg mabalin ni an pehding Apu Dios e Kabaelan tun emin hu lawah. Eleg mewan mabalin ni beken ni meandeng hu tuka panhuwet ni tuu. ¹³ Endi an nemeltanan Apu Dios ni kabaelan tu tep wada ngu dedan ni hi-gatu humman. Ey endi an nemutuk ni hi-gatun mengippaptek ni emin ni bebley eyad puyek. ¹⁴ Gullat ni bangngaden Apu Dios hu biyag ni indawat tun hi-gatsun tutu-u et ¹⁵ nanna-ud ni mettey itsun emin et mambalin itsun dep-ul.

¹⁶ Imay, pandengel kan hi-gak hedin nelaing ka niya nenemneman ka. ¹⁷ Hi Apu Dios ey wada kelebbengan tun man-ap-apu tep meandeng tuka pehding. Kele ni-nganguy kammuy wada bahul tu? ¹⁸ Tuka ibbunget ida papatul niyadda aap-apu e kantuy ‘Lawah nemnem yu ey beken ni meandeng yuka pehding.’ ¹⁹ Eleg tu ippahhig idan aap-apu niya kekeddangyan hu impeminhed tu, tep lintu tudda dama nangkewetwet. ²⁰ Yadda edum ni tuu ey ida kamangkinnemtang ni mettey ni gawan hileng. Anin idan aap-apu et ida kame-kal di daka pan-ap-apui ni netey ida nem beken ni ya kapehding ni tuu hu kaumhulun ni daka ketteyi.

²¹ Hi Apu Dios ey tuka ang-ang-anga hu kapambiyag idan tuu niya emin hu daka pehpehding. ²² Endi hakey ni lawah nemnem tun tuun dammutun tu ittaluan hi Apu Dios di engeenget. ²³ Et humman hu, eleg mahapul ni gegtuden Apu Dios hu penuwetan tun tuu. ²⁴ Eleg mahapul ni mahmahan tu ni han tu ingkal hu hakey ni ap-apu ma-lat ihullul tu edum. ²⁵ Tep inamta tu ngu dedan hu elaw da, et humman hu, tudda kaapputa niya tudda kabahbahan hileng. ²⁶ Tuka peang-ang e tuka kastiguadda lawah ni tuun ²⁷ nengisiked ni mengu-unnud ni hi-gatu niya nengiwalleng ni tugun tu. ²⁸ Daka panhelheltap hu nangkewetwet, et humman hu, ida kamampehemmehemmek nan Apu Dios ma-lat baddangan tudda. ²⁹ Nem hedin kan Apu Dios ey pakdag tu i-ineng, kaw hipa an memihhul ni hi-gatu? Hipa makkaw dammutun pehding ni tuu hedin eleg hengngudan Apu Dios? ³⁰ Nem eleg tu i-abulut ni man-ap-apudda hu eleg mengu-unnud ni hi-gatu ma-lat eleg da panhelheltap hu tutu-u.

³¹ Job, attu et ehelen mun Apu Dios e muka ebbuluta e nanliwat ka niya isiked mu law ni manliwwat. ³² Nem ku kammu na-mu mewan ey ‘Hipa nambahulan ku? Ehel mu et eggak law ipahding.’

³³ Kaw hullulan Apu Dios hu ninemnem tun pehding ma-lat u-unnuden tu pinhed mu? Nem tam dingkug mu ngu dedan hi Apu Dios. Ngenamung kan mannemnem. Bekkennak ni mampilli. Imay, ehel mun hi-gami hedin hipa muka pannemnem. ³⁴ Emin hu mengngel ni hi-gak, anin idan nenemneman ey daka tetbala e kanday ³⁵ ‘Mukun henin nunman kapan-e-ehhel Job ey tep endi amta tu niya endi kametunnung ni tuka e-e-hela.’ ³⁶ Hedin pakannemnemen yudda in-inhel Job ey amtaen yu e heni kapan-e-ehhel ni lawah ni tuu hu tuka pan-e-ehhel. ³⁷ Dakel dedangngu liwat tu ey induman tu pay et ngehayen tu hi Apu Dios.”