Job 26

Ya inhumang Job nan Bildad

¹ Immehel mewan hi Job ey kantuy ² “Em, kakkayyaggud ka tep et-eteng hu imbaddang mun hi-gak e nekakkapuy katteg ngun tuu! ³ Kayyaggud et kaka umtugun niya muka ituttuddu inedal mud tuun endi nemnem tu e henin hi-gak. ⁴ Hipa ni-ngangu nangngelan muddan nuntan ni kakkayyaggud ni tugun? Hipa kan linnawan immehel ni hi-gam?

⁵ Nanna-ud ni ida kamanggegeygey hu linnawan nangketey di bebley ni netey di dallem ni baybay. ⁶ Humman ni bebley idan netey ey eleg meha-ninan niya eleg meitlun nan Apu Dios, ⁷ e nengibiklag ni north ni kabunyan niya nengiha-ad ni puyek e endi neituunan tu. ⁸ Winedan Apu Dios hu danum idad kulput ey eleg meikkuyyag anin ni mebel-at. ⁹ Ey heni linibutan tun kulput hu bulan et eleg meang-ang. ¹⁰ Ey heni yad pappeg ni baybay hu nengiptekan tun pan-appilan ni kawwalwal niya hileng. ¹¹ Hedin bimmunget hi Apu Dios ey heni kamanggiwwed ida tukud ni kabunyan. ¹² Impaineng tu baybay tep ya kabaelan tu, ey gapuh mewan ni elet tu ey pindit tu etan anggetakkut ni mategud baybay. ¹³ Ey gapuh ni et-eteng ni kabaelan tu ey kinapya tun kakkayyaggud hu ang-ang ni kabunyan. Ey pintey tu etan et-eteng ni anggetakkut ni uleg.

¹⁴ Yadda huyyan impahding tun tayu kaketngai ey ekket ni ebuh ni kei-ang-angan ni kabaelan tu. Hipa makkaw hu dammutun mengewwat ni et-eteng ni kabaelan tu?”