22
Ya inhumang Eliphas e iTeman
1 Himmumang hi Eliphas e iTeman et kantuy 2 “Hipa silbi tayun tuu nan Apu Dios? Endi. Ya kakulugan tu ey anin idan kelalla-ingan et endi silbi dan hi-gatu. 3 Anin ni kantu et endi liwat ni hakey ni tuu, et hipa humman nan Apu Dios e Kabaelan tun emin? 4 Kaw ya muka penaydayawin hi-gatu hu himmulun ni nengipahdingan tuddan nuntan ni hi-gam ma-lat tugunen daka? 5 Beken mannuman, tep ya himmulun ey ya dakel ni liwat mu et keang-angan ni kalinewah mu.
6 Inlam hu balwasin tuun eleg tu hambayad hu utang tu et endi law ibbalwasi tu. 7 Eleg mu idwatan ni kennen niya danum ida neupa niya na-wew ni tutu-un immalin an nambagan hi-gam, 8 anin ni kedangyan kan peteg, ey kaka medeyyaw niya et-eteng kabaelam. 9 Eleg mudda baddangan hu nangkebalu, ey piniliw mu limmuddan nepu-hig, niya impanligligat mudda. 10 Et humman hu kameipahpahding ida huttan ni anggetakkut ni hi-gam, 11 e heni ka wadad engeenget niya heni ka nalsing di lebeng.
12 Hi Apu Dios e wadad kabunyan ey tuka uh-uhdungin emin hu bittuwen. 13 Kaw kammu nem eleg han-ang-ang Apu Dios hu kad-an mud engeenget? 14 Ey kaw kammu nem hennian ni kulput hu matetun tuka pandalladallanid kabunyan di ta-pew ni puyek, et eleg tu ang-anga hu muka pehpehding? 15 Kaw eleg mu issiked ni pehding hu henin kaippenahding idan lawah ni tutu-u?
16 Yadda lawah ni tuu ey endi maptek ey neendidda, anin ni eleg ni medatngan hu nagtud ni aggew ni ketteyyan da e henidda in-anud ni nedakkel ni danum. 17 Mukun hanniman meippahding ni hi-gada ey tep inwalleng da hi Apu Dios e kandan hi-gatuy ‘Ngenamung kami ngu. Kaw hipa dammutun pehding mun hi-gami?’ 18 Ey hi-gatu nengidwat ni emin ni kayyaggud ni hi-gada. Tawwey, eggak han-awat hu kapannemnem idan nunman ni tutu-u.
19 Ida kamanggagaya ey ida kamakangngi-ngi hu kayyaggud ni tutu-u hedin inang-ang da e nekastigu hu lawah ni tuu. 20 Kanday ‘Nanna-ud ni mebahbah ni emin hu kinedangyan idan lawah ni tuu. Hedin wada mewan hu metdaan ni eleg mebahbah ey megihheb di apuy.’
21 Pampekumbabah ka kumaddan nan Apu Dios e Job ma-lat bendisyonan daka mewan ni hi-gatu. 22 Abulut mu hu tuka ituttuddu niya nenemnem mu et eleg mu liwwanen. 23 Hedin mambangngad kan mengu-unnud ni hi-gatu et issiked mun manliwwat ey kayyaggud law kaya hu meippahding di biyag mu. 24 Entan law tu gagamgami hu pihhuh niya pan-ibbeng mudda balituk mu. 25 Hi Apu Dios e Kabaelan tun emin hu kamei-ellig ni pihhu mu niya balituk mu.
26 Et um-amleng ka kayan mandinnel ni hi-gatu e Kabaelan tun emin. 27 Ey hedin mandasal kan hi-gatu man hummangen tu dasal mu, ey pehding mu hu insapatah mun hi-gatu. 28 Kayyaggud ali pambalinan ni emin ni pehding mu et yumaggud kaya neitu-wan mu. 29 Ey hedin wada tuun neipebabah niya nedismayah ey indasalam, ey nanna-ud ni baddangan Apu Dios humman ni tuu. 30 Hedin makulug ni muka paka-u-unnuda hi Apu Dios ey baddangan mudda nanliwat ma-lat meihwang ida.”