21
Ya inhel Job
1 Immehel mewan hi Job ey kantuy 2 “Dengel yu anhan eya e-helek ma-lat humman penga-alluk yun hi-gak. 3 Entan inglay yu et umhellak. Hedin negibbuhhak, ey anin ni heghegnud yuwak.
4 Hi Apu Dios hu panlillihan ku, beken ni ya tuu, tep kele kabaelan tun emin ey eleg tuwak baddangi? 5 Gullat et dedan et metnga kayun menang-ang ni hi-gak. 6 Hi-gak mismuh ey nakka metnga niya nakka umgeygey hedin ninemnem ku eya neipenahding ni hi-gak.
7 Kele kai-abulut Apu Dios ni meteggu hu lawah ni tuu ingganah maka-a-ammadda niya tudda kapekeddangyan? 8 Ida kamehlag niya andukkey hu biyag da et daka ang-anga keettengan idan u-ungnga da niyadda inap-apuda. 9 Ey endi kapeellin Apu Dios ni memahbah ni pamilyah da niya endi daka tekkusi. 10 Anin ni halun da et kayyaggud hu daka pan-impah. 11 Ida kamampan-an-anla u-ungnga dan kaum-ena-ayyam, heniddan impah ni kalneroh ni kaumpenaypaytuk. 12 Ida kamenattayyaw, ida kaumgeniggittalah niya ida kaum-ena-ayyuding. 13 Mekallinggep hu biyag da niya endi ligat ni daka helheltapa ingganah mettey ida. 14 Anin ni hanniman et kanda kumedek nan Apu Dios ey ‘Eleg daka mahapul ni hi-gami niya eleg mi pinhed ni amtaen hu pinhed mun meippahding di biyag mi.’ 15 Ya kanda ey eleg mahapul ni u-unnuden hi Apu Dios, niya endi gun-uden dan mandasal ni hi-gatu. 16 Ey kanday kayyaggud hu biyag da tep ya kabaelan da. Nem hedin hi-gak ngu man eggak ebbuluta humman ni kapannemnemnem.
17 Nem kaw kastiguen idan Apu Dios? Eleg! Pinpinhakkey kaelliin ligat ni hi-gada. Ey hedin mewan wada impaeli tun ligat tep ya bunget tu ey eleg ida meilleggat. 18 Kaw kastiguen tudda henin kapehding ni na-let ni dibdib ni dagemi e tuka pan-ityab, winu henin dep-ul ni kaittayab ni pewek? Eleg!
19 Kanyuy ‘Kastiguen Apu Dios ida u-ungnga tep ya liwat ni ammed da.’ Nem eleg, tep yadda ngu etan nanliwat hu kastiguen Apu Dios ma-lat peang-ang tu e tuka ippahding humman tep ya liwat da. 20 Mahapul ni yadda nambahul hu meneltap ni nambahulan da ma-lat gibeken da hu bunget Apu Dios e Kabaelan tun emin. 21 Kaw hedin netey hu tuu man tu mewan law nenemnemen hedin melinggep hu pamilyah tu winu eleg? 22 Hipa ni-ngangu dammutun an mengituttuddun Apu Dios ni pehding tu? Kaw ambeken hi-gatu huwet ni emin ni tuu?
23-24 Ya edum ni tuu ey kayyaggud ni ingganah hu annel da e endi degeh da. Endi ligat da niya ida kaman-an-anla ingganah ketteyyan da. 25 Yadda dama edum ey nekawwetwet ida et anggehemmek ida ingganah ketteyyan da. 26 Nem nan-iingngeh idan emin e mebiggihan idad kulung da.
27 Inamtak et el-eleg hu yuka pannemnem ni hi-gak. 28 Kan yud nemnem yuy ‘Attu mewan hu baley etan ni kedangyan ni peteg ni tuun lawah hu tuka ippenahding ey?’ 29-30 Emin hu tuu, anin di attu ey daka ebbuluta et pinpinhhakkey anhan law hu kapengippeelliin Apu Dios ni ligat idan kamengippahding ni lawah. 31 Endi kamenge-ehhel ni nambahulan da niya endi kamengastigun hi-gada. 32 Ey hedin netey ida man nemahhig kapandeyyaw ni tuun hi-gada. 33 Dakel hu tuun kamekillaw di da pengikkullungan ni hi-gada niya dakel hu kaumlelemyung ni neteyyan da. Beken ni ebuh humman tep melinggep idan kamambakbaktad.
34 Hedin hi-gayu ngu dama ey endi silbitu yuka e-e-hela. Et inna-nu makkaw ni penga-allukan yun hi-gak ni henin nunman ni yuka e-e-hela?”