13
Nipatikhaw ay John han atattata-ot an animar
1 Ja tinnig u khu han oha an atattata-ot an animar an chimma-ar hichi baybay. Peto chin ulu na ja himpolo chin haˈkhud na an numpunkorona. Ja an amin chin ulu na ja gwa han nitulaˈ an ngachan Apo Jos ti una khun tortorpon hini apfalinana. 2 Omaˈ-at hi khenger hini tikhaw na muti chin hu-i na ja amat hi hu-in chi bear, ja amat hi layon chin ta-o na. Inchat chin dragon ay hija hini apfalinana ja hini nangato an kalintikhana an mun-ap-apo. 3 Chin oha an ulun tay atattata-ot an animar ja gwa han lemmoˈloˈ an hukhat an mamatoy ay hija, muti napoynan chamchama. Ja nanor hachi tatakhu heto lota ja nakhujud cha ta namati cha ay chuy an animar. 4 Dinaydayaw cha chin dragon ti hijay nangchat hi apfalinana. Ja dinaydayaw cha khu chin animar ja inali cha hi, “Ngay ngachah ay chita tay an animar an achi ma-ab-apfak ti ma-id chi hay ipadchungana!”
5 Hitay an animar ja himmapit. Ja numpa-akhaja ja nunhapit hi mipfuhur ay Apo Jos. Ja nichatan hija hi apfalinan an mun-ap-apo hi apat chi polo ta han chugwa hi pfulan. 6 Ja ingkhimoh na an munhapit hi napukhit ta paˈ-iyona hini ngachan Apo Jos ja hini punhitugwana ad langit, ja an amin hana gwa hichi. 7 Ja nichatan hija hi apfalinan an meˈpatoy an amin hana tatakhun Apo Jos ja an mangapfak ay chicha. Ja nichatan khu hija hi apfalinan an mun-ap-apo an amin hana numpfino-ob-on an holag ja tribo ay tay lota an numpunpfino-ob-on khu chi hapit cha. 8 Hotti cho-or chi tatakhu hi mundaydayaw ay chuy an atattata-ot an animar, an amin hana agkhuy nitulaˈ chi ngachana ay ni libju an nitula-an hana miˈtakhu hi ma-id chi pogpogna. Nituttulaˈ hay hana ngachan hana miˈtakhu ay tay an libjun ni Pfoˈtot an Karnero an nidaton ta natoy khapo hi pfahor, nete-a hi agkhuy pay narmugwan tay lota.
9 Tayya han alloˈ ay chaˈju an namati, hotti chonglon ju. 10 Gwa hana uchumna ay chaˈju an neˈcha an chupopon hana pfuhur Apo Jos. Ja neˈcha khu hana uchumna an patajon cha. Ja ma-at an ma-at hay hato. Hotti hana tatakhun Apo Jos ja mahapor an ehemad cha hini peˈ-at cha an miˈ-unud ay hija ta gway aton cha an mangedpor hay hato an likhat.
11 Tinnig u khu han nabnab-on an atattata-ot an animar an pfimmutay ay tay lota. Chugwa chin haˈkhud na an amat hi haˈkhud chi pfoˈtot an karnero, ja amat hi dragon chin hapit na. 12 Pfinanoh na chin apfalinan chin oha an atattata-ot an animar an nannag ay hija, ja impapilit na hachi tatakhu ay tay lota ta dayawon cha hichuy an animar an lemmoˈloˈ chi hukhat na an napoynan. 13 Hitay metob an animar ja cho-or chi impatikhaw na hi numpfino-ob-on an milagro. Impa-ali na han apoy an narpu ad uchu ja tittinnig hachi tatakhu. 14 Inallilaw na hana agkhuy namati an tatakhu heto lota khapo ta tinnig cha hini apfalinana an pfinanoh na chin nahhun an animar. Ja inalin tay an animar hachi tatakhu ta mun-ephod cha hi pfolor an meˈmeˈnong chin animar an lemmoˈloˈ chi hukhat na an napakhit hi pfangid ja agkhuy natoy. 15 Ja nichatan hichuy netob an animar hi apfalinan an mangchat hi hochohchan chuy pfolor ta mapfalina an humapit, ja an mamatoy an amin hana achi mundayaw ay hija. 16 Ja impapilit chuy netob an animar ta an amin chi tatakhu, nababa man wenno natakhay, achangjan man wenno napubli, himpfut man wenno pfu-un, ja mamarkaan cha ay ni agwan an ngamoy cha wenno ay ni tuˈpaw cha. 17 Ja hini takhu an agkhuy namarkaan ja mepagwa ay chicha chi ngumina ja mungngina. Hitay an memarka ja hijah tay hini ngachan chin nahhun an animar wenno hini pfilang chi ngachana. 18 Mahapor an manomnom aju an tatakhu ta annilaon ju nu ngay podhon tay pfilang an hapiton. Ti hitay an pfilang an ngachan ni animar an unum chi khahot ta han unum chi polo ta han unum (666) ja pfilang an ngachan chi takhu.