12
Nipatikhaw ay John han pfupfai ja han dragon
1 Amat hichi ja gwa khu han nabnab-on an nipatikhaw ad uchu an pang-imatunan. Tinnig u han pfupfai an timmataˈchug ay chuy pfulan. Pomooˈ chi lopfong na an amat hi hukhit, ja nungkokorona hi himpolo ta chugway pfittuwan. 2 Khumaju an tomoˈkhong hichuy an pfupfai hotti khun mun-okhab hi chokhoh na.
3 Ja gwacha khu han oha an pang-imatunan an tinnig u ad uchu. Nipatikhaw han otongngan an mumpfolah an dragona an peto chi ulu na an numpunkorona ja himpolo chi haˈkhud na. 4 In-akhamid na chin igwit na hachi me-atloh khaggwan chi pfilang hachi pfittuwan ad uchu ja empa-aˈpfaw na heto lota. Immuy timmaˈchug ay chuy gwachaan chin pfupfai an tomottoˈkhong ta henehemmona hi pfumutajan chin pfuˈjug ta anuna. 5 Muti unagkhu entoˈkhong chuy pfupfai chin empfalay na an lala-e ja himpfumagkha ja nalaˈ-oy hichuy unga an timmalakhuy ay chuy agawwachaan Apo Jos an inu-umpfun ay chuy trono na. Hitay an empfalay na ja umali han timpo an mun-ap-apo hija an amin hana tatakhu ay tay lota ja ma-id chi hay mangapfak ay hija. 6 Chin ayya pfupfai ja lemmajaw ja immuy han lukhar an ma-id chi nunheto an enhakhanan Apo Jos ta mahalimunan hi himpolo ta han chugway khahot ta han unum chi polo (1,260) an arkhaw.
7 Himpfumagkha ja nungkhukhubpfat cha ad langit. Hana angher Apo Jos an impanguluwan Michaelb ja khinupfat cha chin dragon. Ja hichuy an dragon ja hachi numpun-ibpfa na an napukhit an angher ja himmango cha an miˈkhukhubpfat. 8 Muti na-apfak chin dragon ja hachi numpun-ibpfa na an napukhit an angher, hotti ma-id kalintikhan cha an mihihidchi ad langit. 9 Hotti nituud chin dragon ja chin angher na heto lota. Hitay an dragon ja hijah tay chin numpatikhaw an ulog chin hophopapna.c Hitay hini allon cha an hi Satanas wenno hini Diablo an khun umallilaw hana tatakhu hi apfuglapfuglay.
10 Napfalin ja chengngor u han maˈgwap an ugwap ad langit an nangali hi,
“Nachakngan hini panakhuwan Apo Jos hay hana tatakhu na.
Impatikhaw na hini ma-id ipadpadchungana an apfalinana an mun-ap-apo.
Hi Kristo an hennag na an Mamahhod ja impatikhaw na hini apfalinana.
Ti hi Satanas an khun umuy ay Apo Jos hi a-arkha-arkhaw ta papfaholona hay hana a-akhi ta-o an namati
Ja penakak Apo Jos ad langit.
11 Enapfak hana a-akhi ta-o hi Satanas khapo ay ni chalan ni Pfoˈtot an Karnero an nun-ajuh chin natajana, ja khapo hi nanihtikhuwan cha ay ni omaˈ-atana.
Ti agkhuy cha inay-ayyugwan hini piˈtakhuwan cha, anong un cha matoy khapo hi pammati cha. 12 Hotti mun-an-anla aju an amin an gwa heto ad langit!
Muti ka-ahi aju an gwa hina lota ja hichi baybay.
Ti engkhah cha hi Satanas hina gwachaan ju ja munnaud an mapfungot,
Ti anila na an un hoˈhoˈchod hini timpo an pangatana ay ni podhona an aton.”
13 Unot nunhalemottongan tay an dragon an nituud hija heto lota, ja numpuchug na chin pfupfai an nangtoˈkhong chin pfuˈjug an lala-e. 14 Muti nichatan hichuy pfupfai hi chugwah o-otongngan an pajaˈ chi tugwi ta gway enat na an temmajap ta immuy han lukhar an ma-id chi nunheto an enhakhanan Apo Jos. Ja mahalimunan hija hichi hi toloh tagwon ta han khaggwa, ja ma-id mapfalin chuy dragon an umuy ay chuy an lukhar. 15 Hotti impapfutay chuy dragon han chanum an narpu ay chuy ta-o na ta chimmatong ta mi-anud hichuy pfupfai. 16 Muti natulungan chin pfupfai, ti nakngaˈ chin lota ja na-unog chin chanum an narpu ay chuy ta-on chuy dragon. Hotti agkhuy ni-anud chin pfupfai. 17 Hijaot un pfimmungot chin dragon ay chuy pfupfai ja empacheh na an ay mangupfat hachi nataynan an holag chuy pfupfai, an chicha hana khun mangunud ay ni urchin Apo Jos ja khun manihtikhuwan ay ni umannung an omaˈ-atan Hesu Kristo. 18 Ja immuy chin dragon ay chuy pingngit chi baybay ja timmataˈchug.