1 John 1

1 JOHN

Hini arpugwan chi piˈtakhuwan

^1,2 Tayya an muntulaˈ ami ay chaˈju ta ipa-innila mi hi Hesu Kristo an hija hini ma-ali an Hapit Apo Jos, an gawwacha an ninidchum ay Apo Jos chin hunhunana ja un marmu hitay lota. Hitay an Hapit Apo Jos ja hijay arpugwan chi piˈtakhuwan an ma-id chi pogpogna. Numpfalin hi takhu ja niˈtakhu ay tay lota, ja khun miˈhapit ay chaˈmi, ja immannung an tinnig mi ja mapfalin an ma-ugnan hija. Hini piˈtakhuwana ja ma-id teˈte-aana ja ma-id pogpogna, ti gawwacha hija an ninidchum ay Apo Jos an Ama ta-o. Hitay an tinnig mi ja hijah tay chi khun mi tihtikhuwan. ³ Hotti tayya an ipa-innila mi ay chaˈju hay hato tinnig mi ja chengngor mi ta gway aton ju an midchum ay chaˈmi an meˈ-oh-ohha ay Apo Jos an Ama ta-o ja ay Hesu Kristo an Empfalay na. ⁴ Intulaˈ mi hay hato ta makhotop hitay pun-an-anlaan ta-o.

Miˈtakhu ta-o ay ni mumpapattar

⁵ Hitay ipa-innila mi ja hijay chengngor mi ay tay Empfalay Apo Jos, an hi Apo Jos ja hijay hilaw ja ma-id munhehellong ay hija. ⁶ Nu khulat ta gway oha hi mangali hi un neˈ-oh-ohha ay Apo Jos muti hini piˈtakhuwana ja munhehellong, ja un munlahlah hija, ti agkhuy na inunud hini umannung an hapit Apo Jos. ⁷ Ja khulat ta nahamad hini piˈtakhuwan ta-o ta nahilagwan ta-o an amat ay Apo Jos an gawwa ay ni mumpapattar, hot maphod hini pun-oh-ohhaan ta-o an namati. Ja midchum khu an ma-ulahan hato pfahor ta-o khapo ay ni chalan Hesu Kristo an immajuh chin natajana. ⁸ Nu allon ta-o hi ma-id oh-ohha hi pfahor ta-o ja un ta-o lahlahan hitay achor ta-o, ti agkhuy ta-o inapfulut hini umannung an hapit Apo Jos. ⁹ Muti nu ipudnu ja empakawan ta-o hana pfahor ta-o ay Apo Jos, ja pakawanona, ja ulahana khu an amin hana napukhit ay tay piˈtakhuwan ta-o. Atona hitay an inali na, ti magpong hija. ¹⁰ Nu allon ta-o hi ma-id pfahor ta-o, ja un ta-o ipatikhaw an agkhuy limmamot hini hapit Apo Jos ay tay piˈtakhuwan. Ja un ta-o pumpfalinon hi Apo Jos hi munlahlah, ti achi amat hetoy allon ni hapit na.