2
Hini madpor an hinchalon Apo Hesus
1 He-a Timoti an empfalay u hi pammati, mahapor an pfumi-ah a khapo ay ni khohkhoh Kristo Hesus. 2 Hato chengngor mu an intudtuchuˈ an khun tihtikhuwan hachi cho-or an tatakhu, ja ipa-innilam hana mapagtarkan an namati ta chicha khu chi manuchugwan hana uchumna.
3 Miˈ-anuh a koma an mangedpor hi likhat an umali ay chita-o an namati ay Kristo Hesus an amat ay ni aton ni hinchalo an mangedpor an amin hi i na hortapon. 4 Ti ma-id hinchalo hi mangat hi tamun chi sibiliyan, ti hini tamun chi hinchalo chi pachot-anana an omepachenor ay ni apo na. 5 Amat ay ni miˈ-uk-ukkit an achi na ma-ala hini lagpfu na an emmapfak nu achi na ep-ephod an unuchon hini urchin chi miˈ-uk-ukkit. 6 Amat hina khu ay ni mangkhikhimoh an muntamu an hija chi mahhun an mangala ay ni pfungan ni inliyaˈ na. 7 Hato an inaliˈ ay he-a ja ep-ephod mu an nomnomon, ti hi Apo Hesus chi tomolong ay he-a ta annilaom hini podhona an ipa-innila.
8 Achim alichuwan hi Hesu Kristo an holag Ari David, an natoy ja nummahu. Hijah tay hini Ebanghelyo an khun u ekasaba. 9 Khapo hi pangtudtuchugwaˈ ay tay Ebanghelyo ja tayya an mapalikhataˈ ja napfangkelenganaˈ an amat hana i khun pomatoy. Muti anong unaˈ aton heto, ja hitay hapit Apo Jos ja un chah chamchama mapfangkelengan? 10 Hijaot un u anuhan an amin hato likhat an horhortapon khapo hana tatakhu an pinilin Apo Jos ta gway aton cha an miˈtakhu khapo hi neˈ-oh-ohhaan cha ay Kristo Hesus ta magwachaan cha hi mapmaphod an piˈtakhuwan ad langit hi ma-id chi pogpogna. 11 Umannung hitay nitulaˈ an allona hi,
Nidchum ta-o ayya an ne-etoy ay Kristo chin natajana,
ja miˈtakhu ta-o khu ay hija hichi ad langit.
12 Nu anuhan ta-o an amin chi likhat
ja midchum ta-o ay hija an mun-ap-apo.
Muti ehaot ta-o ayya hini nidchuman ta-o ay hija,
ja ehaot chita-o ay ni arkhaw an panumarjaan Apo Jos ay chita-o.
13 Nu achi ta-o mamati ay hija,
ja munchochodcha an mapagtarkan hija,
ti achi mapfalin an i na ehalla hini inali na.
Hini maphod an ministron Apo Jos
14 Khun mu epanomnom hay hato hana tatakhu khapo ay Apo Jos ta achi angkhay hay haphapit an ma-id chi poot na hon i cha nunhohongngilan, ti ma-id chi hay itolong na an una paˈ-iyon hini pammatin hana munchochongngor. 15 Muti he-a ja un mu gwot ehamad an ep-ephod an ituchu hitay umannung an Hapit Apo Jos. Hot ma-apfulut a an amat hi takhu an khun muntamu an ma-id pfuma-inana nu ngachah ni tamu an khuna peˈpeˈ-at. 16 Achi a i mimidchum hana tatakhu an un cha munhaphapit hana ma-id herpfi na ay Apo Jos. Ma-id itolong na, ti unaagkhu i-achawwi chi tatakhu ay ni penhod Apo Jos. 17 Hana khun cha ituchu ja amat hi chokhoh an lomoˈloˈ an amin heto achor. Nidchum cha Himeneus ay Filetus an khun muntuchu hi amat heto. 18 Immachawwi cha ay ni umannung an tudtuchu ti allon cha hi napfalin anu hini amahuwan chi namati. Ja hitay hini chimmalat an napaˈ-i hini pammatin chi uchumna. 19 Muti anong un gway muntudtuchu hi nehahalla, ja hitay ayya Hapit Apo Jos ja nahamad. Ti mipadchung hi nahamad an pfato an epognachan chi pfalay, ja hitay an pfato ja gwa han nitulaˈ an allonay, “Hi Apo Jos ja anila na hana tatakhu na.”a Ja inali na khu hi, “Hini mangali hi namati ay Apo Jos ja mahapor an chuˈkhona an amin hana napukhit.”
20 Ay ni pfalay chi pfaˈnang ja gwacha hana pengkhan ja malokong an pfalitoˈ ja khampfang chi apja na, ja gwacha khu hana napa-ot an ajiw, ja gwacha hana lotay apja na. Hay hana napfarpfalor ja ma-usar hi nahamad an khagwong, ja hana uchumna ja ma-usar hi kompormi an khagwong. 21 Amat heto chi aton Apo Jos hi tatakhu. Hana tatakhu an umachawwi hana napukhit an ugali hot gwacha han napfalor an pangusaran cha ay Apo Jos, ti me-anag ja nehahagkhana cha an ma-usar ta aton cha hana maphod an epa-at Apo Jos. 22 Hotti chuˈkhom hana napukhit an podpodhon chi ungunga an khun at-aton, ta un mu gwot pachot-anan hini magpong an piˈtakhuwan ja hana mangpaphod ay ni pammatim. Ja pachot-anam an mamhod hi uchumna an tatakhu, ja hapulom hini pun-oh-ohhaan ju an namati. Midchum a hana khun munhochor ay Apo Jos an maleneh chi nomnom cha. 23 Achim chodchonglon hana ma-id chi poot na an khun hapihapiton hana tatakhu an ma-id anila na, ti mangchat hi punhohongngilan. 24 Ti hini khun munserbi ay Apo Hesus ja achi khun meˈhohongnger, ta unaot nignikhaon hana tatakhu. Nala-eng an manudtuchu ja na-anuh. 25 Ep-ephod na an manudtuchugwan hana pumapaˈ-i ay tay nahamad an tudtuchu, ta alamadniˈ ja lomanon Apo Jos hini nomnom cha, ta chuˈkhon cha hana pfahor cha ja niˈ-annila cha hini umannung an tudtuchu. 26 Nu amat heto hot mipfu-aan cha ay ni enat Satanas an namalud ay chicha ta aton cha hini penhod na.