2 TIMOTI
1
1 Ha-in hi Paul an numpfalin hi apostol Kristo Hesus, ti hitay chi podhon Apo Jos, ta honakhonaˈ an i mangpa-innila ay ni amatan chi piˈtakhuwan an inalin Apo Jos hi michat hana nidchum ay Kristo Hesus.
2 Tayya an muntula-aˈ ay he-a Timoti an podpodhoˈ an empfalay u hi pammati. Hi Jos Ama ja hi Kristo Hesus an Apo ta-o chi mangkhohkhohan ja munnignikha ay he-a ja mangchat hi pomhochan ni piˈtakhuwam.
Khokhotan Timoti hana umannung an tudtuchu
3 Maphod hitay konsensiaˈ an munserbi ay Apo Jos amat chin a-ammod mi an Hudju. A-arkha-arkhaw ja lapfi ja khunaˈ munyaman ay tay Jos hi pangekhalalakhaˈ ay he-a. 4 Khun u khu nomnomnomon chin khun mu kumilaan chin nunhijanan ta, ja tan achi anhan hitay ingohoˈ an mannig ay he-a ta mehamad hi ujaˈ pun-an-anlaan.
5 Anilaˈ an nahamad hini pammatim. Ja achiyaˈ munharhalinchugwa an hini pammatim ja amat chin pammatin apom an hi Lois ja hi inam an hi Eunice, chicha an nahnahhun an namati.
6 Hijaot un u allon ay he-a ta pachot-anam an mangusar ay ni na-ispirituwan an apfalinan an inchat Apo Jos chin nangeh-aaˈ ay tay ngamoy u hi nangkalalakhaˈ ay he-a. 7 Achi a toma-ot an mangat ay tay apfalinam, ti hini Espiritu Santo an impa-alin Apo Jos ay chita-o ja pfu-un ta-ot chi ichat na, an ichat nay apfalinan an munserbi ay Apo Jos ja an mamhod hi ibpfah takhu, ja an mangpa-ennongan an amin hi peˈ-at.
8 Hotti achi a pfuma-in an manihtikhuwan ay Apo Hesus, ja achiyaˈ khu ipfa-in ay tay nipfapfalluchaˈ khapo hi punserbiyaˈ ay hija. Khapo ay ni pfi-ah an ichat Apo Jos ja un mu gwot anuhan an miˈlikhat hay hana likhat an khun ta-o hortapon khapo hi khun ta-o puntudtuchugwan ay tay Ebanghelyo. 9 Hi Apo Jos chi nanakhu ja nangajakhan ay chita-o an miˈtakhu an meˈ-annolot ay ni penhod na. Hitay ja pfu-un khapo hi hay i ta-o enat muti khapo ta nenomnom Apo Jos an nangkhohkhohan ay chita-o. Ti chin agkhuy pay narmugwan tay lota ja implanon Apo Jos an mangpatikhaw hi khohkhoh na ay chita-o khapo ay Kristo Hesus. 10 Ja umannung an impatikhaw nay khohkhoh na ad ugwani, ti immali hi Kristo Hesus an nanakhu ay chita-o. Enapfak nay apfalinan chi patoy ja impa-innila na an hana tatakhu an mamati ay ni Ebanghelyo ja magwachaan cha hi piˈtakhuwan an ma-id chi pogpogna. 11 Ja piniliyaˈ ay Apo Jos an numpfalin hi apostol ja manudtuchu ja mangekasaba ay tay Ebanghelyo. 12 Hitay chi khapo na hi khun u panortapan hato cho-or likhat, Muti achiyaˈ pfuma-in, ti anilaˈ hi Hesu Kristo an pinatiˈ ja achiyaˈ munharhalinchugwa an gway apfalinana an manalimun hana impulang na ay ha-in ingkhana ay ni arkhaw an pumpfangngachana.
13 Hana nehamad an tudtuchu an chengngor mu ay ha-in ja hijay pangpatnucham ay ni atom an muntudtuchu. Ja khun mu ipatikhaw hini amatan chi pammati ja pamhod an gwacha ay chita-o khapo hi i ta-o neˈ-oh-ohhaan ay Kristo Hesus. 14 Hini apfalinan ni Espiritu Santo an gwacha ay chita-o chi tomolong ay he-a ta halimunam hana nehamad an tudtuchu an impulang Apo Jos ay he-a, ta achi la-ahna ja i nahukatan.
15 Anilam an cho-or hana namati hina ad Asia an nan-ug ay ha-in, nidchum cha Figelus ja hi Hermogenes. 16 Muti hi Onesiforus ja hi Apo Jos chi mangkhohkhohan ay chicha an pamilya. Ti hijay khun uma-umali an manggwangar ja mangpa-anla ay ha-in ja achi na ipfa-in hitay nipfapfalluchaˈ. 17 Ti chin immaliyana heto ad Rome ja ingkhimoh na an maningit ay tay nipfapfalluchaˈ ingkhana hi emmamad na an nannig ay ha-in. 18 Ja anilam khu an amin hana enat Onesiforus an temmolong ad Efesus. Hotti hi adniˈ Apo Jos chi mangkhohkhohan ay hija ay ni umali an Ahugijan chi tatakhu.