KOLOSAS
1
1 Ha-in hi Paul an numpfalin hi apostol Hesu Kristo, ti hitay chi podhon Apo Jos. Ja hay nun-ibpfaˈ heto ja hitay akhi ta-o an hi Timoti. 2 Tayya an muntulaˈ ami ay chaˈju an nasantuwan ja mapagtarkan an a-akhi hina ad Kolosas ti nidchum ta-o an amin ay Kristo.
Hi Apo Jos an Ama ta-o chi mangkhohkhohan ay chaˈju ja mangchat hi pomhochan chi piˈtakhuwan ju.
Chin nangkalalakhan Paul hay hana namati ad Kolosas
3 An amin chi pangkalalakhan mi ay chaˈju ja khun ami munyaman ay Apo Jos an Aman Apo ta-o an hi Hesu Kristo, 4 ti chengngor mi hini omaˈ-atan ni pammati ju ay Kristo Hesus ja hini pamhod ju an amin hana tatakhun Apo Jos. 5 Hitay pammati ja pamhod ju ja nepognad ay tay mamahhod an enchachaag Apo Jos an michat hay hana namati ay hija. Ja inannila ju hini omaˈ-atan tay enhahagkhanan Apo Jos ad langit chin nangngolan ju ay tay umannung an Ebanghelyon Kristo. 6 Pfu-un chaˈju ja angkhay chi nanginnila, ti nunchongor hitay Ebanghelyo hana apfuglapfuglay, ja maphod hini khuna ipfunga ay ni piˈtakhuwan hana namati. Ja amat hina khu hini pfunga na ay chaˈju nete-a chin nunchongolan ja nanginnilaan ju ay ni umannung an omaˈ-atan ni khohkhoh Apo Jos. 7 Hi Epafras an oha an podpodhon mi an pun-ibpfa ay tay punserbiyan mi ay Kristo chi nahhun an nanuchugwan ay chaˈju. Mapagtarkan hija an pfaar Kristo an khun mi honakhon an tomolong ay tay tamu mi. 8 Hijay nangpa-innila ay chaˈmi ay ni otong an pamhod ju hay hana tatakhun Apo Jos khapo ay ni Espiritu Santo an gawwacha ay chaˈju.
9 Nete-a chin nangngolan mi hay hato, ja ingkhimoh mi an mangkalalakhan ay chaˈju. Hay kalalag mi ja hini Espiritu Santo ja ichat na koma an amin hini pannaka-awat ja maphod an nomnom ta annilaon ju hini penhod na an peˈ-at ju. 10 Hot miˈtakhu aju an me-anag hay hana nidchum ay Apo Hesus ta aton ju hana omepa-anla ay hija ja peˈhehemad ju an amin hana maphod an khun ju aton hot ma-ug-ugman hini panginnilaan ju ay Apo Jos. 11 Hay kalalag mi ja papfi-ahon chaˈju ay Apo Jos khapo ay ni nakaskasda-aw an achi malukud an apfalinana, ta mun-an-anla aju an mangedpor nu nga chah chi hay maˈma-at ay chaˈju. 12 Khun aju koma munyaman ay Jos Ama, ti hijay nangpfilang ay chita-o an meˈpfanoh hana mun-aphod an enchachaag na an ichat hana tatakhu na, chita-o an niˈtattakhu ay ni mumpapattar an piˈtakhuwan. 13 Enekak chita-o ay Apo Jos ay ni munhehellong an pun-ap-apugwan Satanas ja inidchum chita-o ay ni mumpapattar an pun-ap-apugwan ni podpodhona an Empfalay na. 14 Khapo chin natajan tay Empfalay na ja nawayawaya-an ta-o, ti napakawan mahpay an amin chi pfahor ta-o an nidchum ay Kristo.
Hi Kristo chi napfagpfagto an amin
15 Hi Kristo chi pannikhan ay ni omaˈ-atan Apo Jos an achi matikhaw. Gawwacha hija chin agkhuy narmugwan tay lota ja napfagpfagto hija mu an amin chi hay limmun Apo Jos. 16 Ti hi Kristo chi nangpa-apjaan Apo Jos an amin hana gwa ad langit ja hana gwah to lota, hana matikhaw ja hana achi matikhaw, ja hana a-ap-apon chi angher ja hana uchumna an achi matikhaw an gway apfalinana. An amin hana narmu ja hijay nunlumu ta ma-idaydayaw hija. 17 Gawwacha hi Kristo hi narmugwan an amin chi nagwacha, ja hijay khun mangpaptoˈ ja mamanuh an amin. 18 Ja hijay ulu ta-o an amin an namati, ti hijay mangpaptoˈ ay chita-o an achor na, ja hijay arpugwan tay pfakhu an piˈtakhuwan ta-o. Hija hini nahhun an nummahu an achi mahpay matmatoy ta hijay napfagpfagto an amin. 19 Ti hay eneˈchan Apo Jos ja gwa an amin ay Kristo hini kinajos na. 20 Ja hijay eneˈchan Apo Jos hi mangehnot ay hija an amin hana gwah to lota ja hichi ad langit. Ja khapo chin chala na an nun-ajuh chin natajana hichi kros ja neˈ-oh-ohha cha ay Apo Jos.
21 Ja hijah tay chi na-at ay chaˈju. Chin hopapna ja ni-achawwi aju ay Apo Jos, ja pfuhur chaˈju ay hija khapo chin nomnom ja ugali ju an napukhit. 22 Muti penogpog Apo Jos chin pfimmuhulan ju ay hija chin natajan Kristo an i na nangdatunan chin achor na, ta magpong ja maleneh aju hi pannig na, ja ma-id oh-ohha hi i ju apahigwan. 23 Muti mahapor an tikhan ju ta etoloy ju an mamati ja ma-id i ju punharhalinchugwaan ja pehallaan. Achi aju koma makhinu ay ni pammati ju ta un juwot piˈhahalichit hini hahadchon ju an ichat Apo Jos khapo hi namatiyan ju ay ni Ebanghelyo an chengngor ju. Hitay an Ebanghelyo ja hija khu hini khun mekasaba hi apfuglapfuglay. Ja ha-in an hi Paul, hija khu chi khun u itudtuchu.
Hini nunserbiyan Paul ay ni iglesia
24 Mun-an-anlaaˈ ad ugwani khapo hay hato aparpalikhataˈ, ti ipfunga nay ap-aphochan ju. Hay hato an ujaˈ punlikhatan ja toloy hana likhat an eneˈchan Kristo an horhortapoˈ ay tay khun u punserbiyan hay hana namati ay hija an chichay achor Kristo. 25 Ha-in ayya ja enhaachaˈ ay Apo Jos an tomolong an amin hi namati ja impulang na ay ha-in hitay tamuˈ an mangpa-innila an amin ay tay hapit na ay chaˈju an Hentil. 26 Ti nete-a chin hophopapna ja gwacha an agkhuy impaˈpa-innilan Apo Jos hi tatakhu, muti ad ugwani ja impa-innila na ay chita-o an tatakhu na. 27 Hitay hini plano na an impa-innila na ad ugwani, an ipatikhaw na hini ma-id ipadpadchungana an khohkhoh na ay chaˈju an Hentil. Ad ugwani ja gwacha hi Kristo ay chaˈju ja hijah tay chi panginnilaan an ichatan chaˈju ay ni mapmaphod an piˈtakhuwan ay Apo Jos ad langit. 28 Hotti hi Kristo chi khun mi ipa-innila an amin hi tatakhu. Aton mi an amin chi hay manomnom mi hi aton an manukhun ja manudtuchugwan an amin hi tatakhu ingkhanah miˈ-ilog chi oha-ohanna ay ni pammati na ay Kristo. 29 Hotti tayya an ehehemad u an mangat ay tay impatamun Apo Jos khapo ay ni pfi-ah ja apfalinan an inchat Kristo ay ha-in.