5
1 Podpodhon chaˈju ay Apo Jos an empfapfalay na, hotti hijay tuntunchon ju. 2 Ja miˈtakhu aju koma an magwachaan hi pamhod an amat ay ni pamhod Kristo ay chita-o, an impatikhaw na chin nangchatana ay ni achor na an natoy khapo ay chita-o. Inchat na ay Apo Jos hini piˈtakhuwana an amat hi mumpfango an insenso an nidaton.
3 Chaˈju hana nasantuwan an tatakhun Apo Jos hotti tikhan ju ta ma-id chi i ju aton hi chumalat hi panaphapitan chaˈju hi tatakhu hi un aju khun me-eloˈ hi pfu-un ahagwa ju ja napukhit chi nomnom ju ja na-amnagwan aju. 4 Achi koma nalukhit hini aton ju an munhuhupfug, ja achi ju koma hapiton hana napupukhit ja hana ma-id chi poot na. Hay gwot haphapiton ju ja hay hana panagyaman ay Apo Jos. 5 Ti hana khun me-eloˈ hi pfu-un ahagwa cha ja hana khun mangat hay hana napupukhit an penhod chi achor ja achi cha midchum ay ni Pun-ap-apugwan Kristo ja hi Jos Ama. Achi khu midchum hana tatakhu an na-amnagwan, ti un hana khina-u heto lota chi Apo Jos cha.
6 Achi ju pattiyon hana mangali hi pfu-un pfahor hay hato, ti munlahlah cha. Ti hini umannung ja hortapon hay hato ngumangannu hini pfungot Apo Jos. 7 Hotti achi aju i mimidchum hay hana amat hina, 8 ti nalahin chin niˈtakhuwan ju an munhehellong. Gawwacha aju ay ni mumpapattar ad ugwani khapo hi nidchuman ju ay Kristo. Hotti miˈtakhu aju ay ni mumpapattar an piˈtakhuwan. 9 Hana ipfungan ni takhu an nahilagwan ja hana maphod ja magpong ja umannung an peˈ-at na. 10 Achalon ju nu nga chah ni podhon Apo Jos ja hija chi aton ju.
11,12 Achi aju midchum an mangat hana khun aton hay hana khun miˈtakhu ay ni munhehellong an piˈtakhuwan an khun mangat hana ma-id chi poot na. Achi koma mahaphapapit hana khun cha iliˈ-ud an aton, ti apfapfa-in. Etoloy ju an mangat hi maphod ta gway aton cha an manginnila ay ni pinukhit ni khun cha peˈ-at. 13 Ti nu mahilagwan hana gwa ay ni hehellong hot matikhaw hini pinukhit cha. 14 Ja an amin hana mahilagwan hot pomatar. Hijah tay hini oha an nitulaˈ an allona hi,
“He-a ton nanalloˈ ja pfumangon a,
He-a ton natoy ja tumakhu a
Hot hilagwan Kristo hini nomnom mu.”
15 Hotti pa-ennongan ju an miˈtakhu ta unuchon ju hana khun aton hana mun-anomnom an tatakhu an pfu-un hay hana nun-atottot. 16 Mehahagkhana aju koma an amin hi timpo an mangat hi maphod, ti ad ugwani ja cho-or hana khun pfumahor. 17 Achi aju munggwonggwong ta un ju gwot annilaon nu nga chah chi podhon Apo Jos hi peˈ-at ju. 18 Tikhan ju ta achi aju khun mumpfutong, ti hitay chi apaˈ-iyan ju. Pfu-un koma hini pfinutong chi mangechalan ay chaˈju ta hini Espiritu Santo. 19 Hotti na-amung aju ayya ja engkankanta ju hana hapit Apo Jos an Psalm, ja hana uchumna an kantan chi namati an pundayaw ay Apo Jos ja mangpapfi-ah hi pammati. Ja mun-an-anla aju an mungkanta, ti hi Apo Jos chi khun ju ekantaan. 20 Anong un nga chah chi hay i na amatan, ja achi ju alichuwan an khun munyaman ay Jos Ama khapo hana enat Apo Hesu Kristo.
Hay mitukhun hi hempfapfalay
21 Khun aju manghin-u-upfay khapo ta eˈkhonan ju hi Kristo an Apo ju an amin. 22 Chaˈju an pfinapfai, mahapor an naˈna-unnud aju hay hana enah-ahagwaan ju, an amat ay ni aton ju an mangunud ay Hesu Kristo an Apo ta-o. 23 Ti hini lala-e ja hijay ulun ni ahagwa na, an amat khu ay Kristo an ulun hana namati an achor na. Ja hi Kristo khu chi Manakhu an amin hi namati. 24 Hotti hini aton chi namati an umunud ay Kristo ja hija khu hini aton chi pfupfai an umunud ay ni ahagwa na.
25 Chaˈju ayya an linala-e, mahapor an podpodhon ju hana enah-ahagwaan ju an amat ay ni pamhod Kristo ay chita-o an namati. Hitay pamhod Kristo ja nipatikhaw chin natajana khapo ay chita-o. 26 Ja pumpfalinona chita-o hi nasantuwan an tatakhun Apo Jos, ti na-ulahan ta-o khapo chin nangngolan ja nangunuchan ta-o ay ni hapit na, ja natihtikhuwan chin numpabautisaran ta-o hi chanum. 27 Hitay chi enat Kristo hot mumpfangngad an mangagwit ay chita-o an namati an mipadchung hi napintas an pfalahang an ahagwaona. Ay chuy ja ma-id oh-ohhah pfahor ta-o, ja mapmaphod ta-o hi pannig na, ti magpong ta-o. 28 Hotti amat hina koma chi aton ju an linala-e an mamhod hana enah-ahagwaan ju, an amat khu ay ni pamhod ju ay ni achor ju. 29 Ti un chah gway oha hi achi mamhod hi achor na? Ma-id an gwahchinonon hon hinalimunana hini achor na. Ja amat hina chi enat Hesus ay chita-o an namati, 30 ti impfilang chita-o hi alimatong ni achor na. 31 Gwacha han nitulaˈ an Hapit Apo Jos hi nangarjana hi, “Hijaot un mahapor an taynan ni lala-e hi ama na ja hi ina na ta i midchum ay ni ahagwa na an pfupfai ta mumpfalin cha hi oh-ohha an achor.”a 32 Gwa han na-unig an ma-achar ay tay, ja hay alloˈ ja etalato na hini neˈ-oh-ohhaan ta-o an tatakhun Apo Jos ay Kristo. 33 Muti gwacha khu han ituchu na ay chaˈju an hempfapfalay an amat heto. Hini lala-e ja podpodhona hini ahagwa na an amat ay ni atona an mamhod ay ni achor na. Ja hini ayya pfupfai, ja mahapor an lihpituwona hini ahagwa na an lala-e.