Acts 11

Chin hongpfat Peter hachi namahiw ay hija ad Jerusalem

¹ Chengngor hachi apostol ja hachi papadchung cha an namati ad Judea chin na-at, an anong un hana Hentil ja namati cha ay ni hapit Apo Jos. ² Chin numpfangngachan Peter ad Jerusalem ja pinahiw hachi uchumna an Hudju an namati, ti khun cha pay unuchon an amin hana urchin chi Hudju. Ja inali cha hi, ³ “Achi maphod hini enat mu ti immuy a ay ni pfalay hana Hentil, ja neˈ-an a pay ay chicha!” ⁴ Hotti enep-ephod Peter an nangpa-innila an amin chin na-at ja inali na hi, ⁵ “Hichin achaaˈ ad Jopa ja gwa han ohan arkhaw an khunaˈ mungkalalag, ja gwacha han nipatikhaw ay ha-in. Tinnig u han omaˈ-at hi ampfilog an uloh an nun-akhaˈchan chin nunchinugkhuwana, an khun ma-ujuy chin achaaˈ. ⁶ Ja naˈna-atigkhaˈ hay hachi numpfino-ob-on an animar an nipfaˈjug ay chuy uloh. Gwacha hana atap an animar ja hana he-adcha-adchap ay tay lota ja hana hetayyatayyap ad uchu, an panijagwon ta-o an Hudju hi ihcha. ⁷ Ja chengngor u han hapit an nangali hi, ‘Tayya, Peter, mumparti a hi ihcham.’ ⁸ Tempfar u ja inaliˈ hi, ‘Achiˈ aton, Apo, ti ma-id inih-ihchaˈ hi amat heto, ti paniyaw ay ni urchin.’ ⁹ Ja inalin chin hapit an narpu ad uchu hi, ‘Achim allon hi paniyaw hana allon Apo Jos ad ugwani hi pfu-un paniyaw.’ ¹⁰ Ja numpitlo an inali na hitay ja un tomolo chin uloh ad uchu. ¹¹ Ja ay chuy gwot ja emmatam han tolo an linala-e an hennag han kapitan chi hinchalo ad Cesarea an immali an mamokhaan ay ha-in. ¹² Ja inalin ni Espiritu Santo an mitnuchaˈ ay chicha, an achiyaˈ mun-okhon. Ja nitnud khu hay hato unum an ibpfa ta-o an namati ja immuy ami hichi pfalay kapitan Kornelius. ¹³ Ja impa-innilan Kornelius han tinnig na an angher an timmataˈchug hichi pfalay cha an nangali hi, ‘Honakhom hay umuy ad Jopa an i mangajakhan han lala-e an hay ngachana ja hi Simon Peter. ¹⁴ Ti hijay mangtuchu ay chaˈju an hen-a-amma ay ni aton ju an miˈtakhu ay Apo Jos hi ma-id chi pogpogna.’ ¹⁵ Ja unagkhu gwa an khunaˈ munhapit ja immali hini Espiritu Santo ay chicha an amat hichin na-at ay chita-o chin Pentekostes. ¹⁶ Ja nenomnom u chin inalin Apo Hesus an, ‘Binautisaran John hana tatakhu hi chanum muti mabautisaran aju hi Espiritu Santo.’ ¹⁷ Hot tan hay hana Hentil, ja miˈpadchung cha ay chita-o ad ugwani, ti inchat Apo Jos ay chicha hini Espiritu Santo chin namatiyan cha ay Apo Hesu Kristo. Hotti un chah ha-in an pfaar Apo Jos chi mangpagwa ay ni penhod na an aton?” ¹⁸ Un chaagkhu chengngor hitay an inalin Peter ja empokhong cha an mamahiw ay hija, ja nundaydayaw cha ay Apo Jos an allon cha hi, “Hotti amat hina ayya, ja ekhohkhohan Apo Jos hay hana Hentil, ta gway aton cha an man-ug hi pfahor cha ta miˈtakhu cha hi ma-id chi pogpogna.”

Hana namati ad Antokya

¹⁹ Nete-a chin namatajan cha ay Stephen ja khun cha palikhaton hachi namati ad Jerusalem hotti negwa-at cha. Ja immuy hana uchumna ad Fenisia ja ad Cyprus ja ad Antokya, ja khun cha muntudtuchu ay ni hapit Apo Jos, muti hachi Hudju ja angkhay chi tinuchugwan cha. ²⁰ Muti gwacha hana uchumna an eCyprus ja eCyrene an immuy ad Antokya, ja inidchum cha khu hay hana Hentil an engkasabaan ay ni omaˈ-atan Apo Hesus. ²¹ Ja khapo ta gwa hini apfalinan Apo Jos ay chicha an muntudtuchu, ja cho-or chi namati, ja niˈ-unud cha ay Apo Hesus.

²² Chengngor hachi namati ad Jerusalem chin na-at ad Antokya hotti hennag cha hi Barnabas ta umuy hichi. ²³ Ne-atam hija ja nun-an-anla chin nanginnilaana ay ni nangekhohkhohan Apo Jos hachi tatakhu. Hotti tinukhuna chicha ta ehamad cha an mamati ay Apo Hesus ta hija ja angkhay chi unuchon cha. ²⁴ Maphod an takhu hi Barnabas an nagwachaan ay ni apfalinan ni Espiritu Santo ja pammati, ja cho-or chi tinulungana ad Antokya ta namati cha khu ay Apo Hesus.

²⁵ Immuy hi Barnabas ad Tarsus ta i na hingiton hi Saul. ²⁶ Chinakngana ja initnud na an numpfangngad ad Antokya. Umuy chi ohay tagwon hi ninidchuman cha ay chuy khun a-am-amungan hachi namati ja tinuchugwan cha hachi cho-or an tatakhu. Ja hachi namati ad Antokya chi nahhun an na-ali an Krischano.

²⁷ Hichin nihihidchijan cha Barnabas ay Saul ad Antokya ja gwacha hana profetan Apo Jos an immali an narpu ad Jerusalem. ²⁸ Ja gwacha han oha ay chicha an hi Agabus, ja timmaˈchug hichi na-amungan hachi namati, ja impa-innilan ni Espiritu Santo ay hija ta allona hi ma-ulat an amin chi apfuglapfuglay. Ja immannung an na-at chin inali na hichin nun-ap-apugwan Klaudius an Emperador. ²⁹ Chengngor hachi namati ad Antokya chin inalin Agabus, ja nunhahapit cha ta ichatan cha hachi i-ibpfa cha an namati ad Judea hay mapfalin an ichat chi oha-ohanna hi tolong. ³⁰ Ja empachon cha chin amung cha ay cha Barnabas ay Saul ta chichay mangchat hay hachi mangpangpangulu hi namati ad Jerusalem.