8
Chin namarpalikhatan Saul hana namati
1 Niˈ-apfulut hi Saul hi namatajan cha ay Stephen. Ja nete-a ay chuy an arkhaw ja cho-or hachi mamarpalikhat chin namati ad Jerusalem. Hotti negwa-at hachi namati an immuy hachi apfuglapfuglay hichi provincian chi Judea ja ad Samaria, ja hachi apostol chi nataynan. 2 Ay chuy natajan Stephen ja immuy hachi namati an linala-e ta i cha inlapfun, ja munnaud chin immayyungan cha khapo ay hija. 3 Hi Saul ja penhod na an paˈ-iyon hachi namati, hotti khun umuy hachi numpunhitugwan cha hon pfinalak na hachi linala-e ja pfinapfai, ja impipfalud na.
Chin nangaskasabaan Philip ad Samaria
4 Chin namati an negwa-at hachi apfuglapfuglay ja khun cha ekaskasaba hini hapit Apo Jos. 5 Oha hi Philip an immuy ay ni oha an pfuglay ad Samaria, ja intuchu na an hi Hesus ja hija hini Kristo an hahadchon cha an marpu ay Apo Jos. 6 Chengngor hachi atakhutakhu hana intuchun Philip ja tinnig cha khu hay hachi milagro an khuna aton, ja pinati cha. 7 Ti cho-or hachi napukhit an ispiritu an hi-u-ugwap cha an nun-a-akak ay cha chuy tatakhu an nihuhuˈlungan cha. Ja chin nun-apechoy ja nun-apilay ja temmenong cha. 8 Hijaot un nunheglay an-anla cha ay chuy an pfuglay.
Hi Simon an mun-anap
9 Gwacha han lala-e ay chuy an pfuglay an hi Simon. Napfajag hitay an khun mun-anap hotti cho-or chi eSamaria an inapfu na. Mumpa-akhaja hija an allonay hijay napfagto an takhu. 10 Ja enegngor an amin chin tatakhu hi Simon, anong un hachi pfapfaˈnang ja hana ma-id mapfalina, an khun cha allon hi, “Hitay an takhu ja na-ab-apfunijanan, ti tan gwa ay hija hini ma-id ipadchungana an apfalinan Apo Jos.” 11 Ja pinati cha hi Simon ti napfajag an napfalipfalijan hachi tatakhu ay ni atona an mun-anap. 12 Muti chin namatiyan cha chin engkasaban Philip an Ebanghelyo an mangpa-innila ay ni omaˈ-atan ni Pun-ap-apugwan Apo Jos ja hi Hesu Kristo, ja numpabautisar cha an linala-e ja pfinapfai. 13 Ja anong un hi Simon ja niˈpati ja neˈpabautisar. Hotti ninitnud ay Philip ja nanannor hija hachi khun maˈma-at an milagro ja hachi uchumna an achi kayan chi takhu an aton.
14 Chengngor hachi apostol ad Jerusalem an inapfulut chin eSamaria hini hapit Apo Jos, hotti hennag cha hi Peter ja hi John an umuy hichi. 15 Unchaot ne-atam ja engkalalakhan cha hachi namati ta magwachaan cha ay ni Espiritu Santo. 16 Ti agkhuy cha pay nagwachaan hi Espiritu Santo ti un cha nabautisaran hi chanum ja angkhay khapo hi namatiyan cha ay Apo Hesus. 17 Hotti eneh-an cha Peter ay John hachi ngamoy cha hay hachi namati ja nagwachaan cha ay ni Espiritu Santo.
18 Unagkhu tinnig Simon hichuy enat cha Peter ta nagwachaan hachi namati ay ni Espiritu Santo chin nan-aan cha, ja inchugwagwa na han pihu, 19 ja inali na hi, “Ichatanaˈ mah ay tay an apfalinan ta an amin hana hoˈ-oˈ an takhu, ja magwachaan cha hi Espiritu Santo.” 20 Ja inalinot Peter hi, “Hini mangkay pihum chi mang-uy ay he-a ad impferno. Ti unchah khemhom un manginaan hini apfalinan an ichat Apo Jos? 21 Achi a midchum ay tay an tamu, ti anilan Apo Jos an napukhit hini nomnom mu. 22 Chuˈkhom hinuy nenomnom mu an napukhit ja nungkalalag a ay Apo Jos ta pakawanon chi-a nu mapfarpfalin. 23 Ti matikhaw u an nunhegla hini ámoh mu ja nakha-utan a hi pfahor.” 24 Ja inalin Simon hi, “Ekalalakhanaˈ mah ta achi ma-at ay ha-in hay hato an inalim.”
25 Gwa an napfalin chin nuntihtikhuwan cha Peter ay John ja chin nangtudtuchugwan cha ay ni Hapit Apo Jos, ja numpfangngad cha ad Jerusalem. Ja khun cha ekasaba hini Ebanghelyo hana enenggwa cha an apfarjupfarju ad Samaria.
Chin nunchittuman cha Philip ja chin ap-apo an e-Etiopia
26 Gwacha han angher Apo Jos an nangali ay Philip hi, “Munchayyu a ja enenggwam hichi let-ang ingkhana hi chakngam hini kurha an narpu ad Jerusalem an mi-uy ad Gaza.” 27 Hotti immuy gwot ja chinittum na han lala-e an e-Etiopia an narpu ad Jerusalem an i neˈdayaw ay Apo Jos, an umanamut hichi pfuglay cha. Hitay an lala-e ja ma-ar-ali, ti hini haad na ja hijay khun manalimun an amin hi pihun ni Kandace an hinuy chin pungngachan cha ay ni reyna cha ad Etiopia. 28 Ay chin nunlulugkhanana an kalesa ja khun mumpfaha ay ni intulaˈ chin profeta an hi Isaiah. 29 Ja inalin ni Espiritu Santo ay Philip hi, “Hontam hichuy nunlulugkhanana.” 30 Temmagtag hi Philip an i nehnot ja chengngor na an khuna pfahaon chin intulaˈ profeta Isaiah, ja inali na hi, “Ma-awatam chah hini khun mu pfahaon?” 31 Ja inali na hi, “Achiˈ numpay, ti ma-id mangtuchu ay ha-in.” Ja inali na ay Philip ta miˈlukhan hija chin kalesa an nunlulugkhanana. 32 Ja hitay hapit Apo Jos an khuna pfahaon ja allona hi, “Hay enat na, ja omaˈ-at hi karnero an achi omar-aleggwah hu-un cha khorton, ja omaˈ-at khu hi pfoˈtot an karnero an achi mun-ukha hu-un cha poˈlehan. Ti khemmegkhenong hija. 33 Ja pfina-inan cha hija ja achi mungkhochong chin enat cha an nanugwi. Ma-id manaphapapit ay ni holag na ti penogpog cha hini piˈtakhuwana heto lota.”a 34 Ja inalin chin ap-apo ay Philip hi, “Ngachah chi podhon nuy profeta an hapiton ay tay, hini achor na wenno hay uchumna?” 35 Ja hitay an intulaˈ Isaiah chi nanghunungan Philip an nangtuchu ay ni omaˈ-atan Hesus.
36 Khun cha um-umuy ja emmatam cha han gwachaan chi chanum ja inalin chin ap-apo hi, “Tayya mah han chanum hotti mapfalin chah an bautisaranaˈ?” 37 Ja inalin Philip hi, “Ti umannung ayya an namati a ja aton ta.” Ja tempfar na ja inali na hi, “Aa, umannung an namatiyaˈ an hi Hesu Kristo chi Empfalay Apo Jos.” 38 Hotti impitaˈchug chin ap-apo hichin kalesa ja immuy cha ay chuy chanum, ja numpabautisar hija ay Philip. 39 Muti un chaagkhu chimma-ar ja himpfumagkha ja enekak ni Espiritu Santo hi Philip. Ja ma-id mahpay matikhaw chuy ap-apo ay Philip muti entoloy na an immanamut an khun mun-an-anla. 40 Unagkhu hin-aˈ-alina ja gwa hi Philip ad Azotus, ja lenawlaw na hachi apfuglapfuglay an i khun mangkaskasaba ay ni Ebanghelyo ingkhana hi ne-atamana ad Cesarea.