5
Cha Ananias ay Safira.
1 Gwacha han hempfalay an cha Ananias ja hi Safira, ja eneplaˈ cha han pajaw cha ta gway pi-iˈchat cha hachi apostol. 2 Muti nunhappitanan cha an hempfalay an aˈ-aanan cha chin pihu an polaˈ ni pajaw ja un cha ichat. In-uy Ananias chin uchumna an pihu hachi apostol, 3 ja inalin Peter hi, “Anagkha he-a Ananias ta inunud mu chin empanomnom Satanas ja lenahlaham hini Espiritu Santo ta enhaˈpfam hini aggwan ni pihu an polaˈ nuy pajaw ju? 4 Lota ju hinuy hotti gwa ay chaˈju nu ingina ju wenno achi ju. Ja napfalin an eneplaˈ ju, ja ikhad aju nu gway penhod ju an aton ay ni polaˈ na. Anagkha ta nenomnom mu an mangat heto? Hi Apo Jos mangkay chi lenahlaham an pfu-un hay takhu.” 5,6 Unagkhu chengngor Ananias hitay ja natuˈ-in ja natoy. Ja gwa hichi hachi uchumna an ungunga an linala-e ja pfiniˈlukhan cha chin achor na ja i cha inlupfuˈ. Ja nang-entata-ot cha an amin an nangngor ay tay an na-at.
7 Immuy chi toloh oras ja immali hi ahagwan Ananias an hi Safira muti agkhuy na anila chin na-at ay ahagwa na. 8 Empfokhan Peter ay Safira hi, “Allom adchiya, un chah angkhay hitay hi polaˈ ni pajaw ju?” Ja inali na hi “Aa, angkhay hinuy.” 9 Ja inalinot Peter hi, “Anagkha ta nunhappitanan ju an hempfalay an padpachaon hini Espiritun Apo Jos? Niya an umali hana i nanglupfuˈ ay ahagwam ja i chi-a khu piˈlupfuˈ!” 10 Himpfumagkha ja natuˈ-in hi Safira ay chuy negpongan Peter ja natoy. Himmikhop hachi ungunga an linala-e ja tinnig cha an natoy hija hotti enala cha khu ja i cha encheloh ay ahagwa na. 11 Nang-entata-ot an amin hana namati ja amat hina khu an amin hana ne-egngor ay tay an na-at.
Chin cho-or an milagro an enat hachi apostol
12 Khun ma-amung an amin hachi namati ay ni pfarkon Solomon hichi Templo ja cho-or chi numpfino-ob-on an milagro an ena-enat hachi apostol an panginnilaan an gawwa ay chicha hini apfalinan Apo Jos. 13 Anong un hachi agkhuy namati ja khun cha dayawon hachi immunud ay Hesus, muti mun-okhon cha an midchum ay chicha. 14 Ja khun cha ma-ug-ugman hachi namati ay Apo Hesus ti cho-odcho-or hachi linala-e ja pfinapfai an khun midchum an mamati. 15 Cho-or chi enat hachi apostol an milagro, hijaot un cha nun-i-ali hachi mumpunchokhoh, ja nun-epapekheng cha hachi mumpunchokhoh hi kama wenno ap-ap hichi pingngit chi kurha, ta naloh ayya hi Peter ja anong un cha ma-agwaan ay ni agwa na ja temmenong cha. 16 Numpanga-ali khu hachi tatakhu an narpu hachi nun-ehnot an pfuglay ad Jerusalem ja nun-i-ali cha hachi mumpunchokhoh ja hay hachi nahuˈlungan hi napukhit an ispiritu, ja temmenong cha an amin.
Chin nipfaluchan hachi apostol
17 Chin natakhay an pachi ja chin i-ibpfa na an Saducee ja nunlinapoh chin ámoh cha hachi apostol. 18 Hotti impatiliw cha chicha ta mipfalud cha. 19 Muti ay chuy an lapfi ja immuy han angher Apo Jos ja i na impfughor hachi pantaw chin pfaluchan ja impfutay na chicha ja inali na hi, 20 “Umuy aju hichi Templo an i mangpa-innila hachi tatakhu ay ni pfakhu an piˈtakhuwan an narpu ay Apo Jos.” 21 Inunud hachi apostol chin inali na, hotti gwa an naˈ-arkhaw ja immuy cha hichi Templo an i muntudtuchu.
Amat hichi ja inamung chin natakhay an pachi hachi nun-ibpfa na, ja enajakhan cha an amin hachi a-ap-apon chi Hudju ta munhahapit cha. Ja hennag cha hachi i mangagwit hachi apostol, ti khemhon cha un cha gawwa hichi pfaluchan. 22 Muti unagkhu emmatam hachi hennag cha hichi pfaluchan ja ma-id hachi apostol, hotti numpfangngad cha hichi punhumarjaan ja inali cha hachi a-ap-apo hi, 23 “Immuy ami hichi pfaluchan ja nun-atorpfoˈ ja gawwacha pay hana khun munggwarja hichi pantaw. Muti un mi agkhu impipfughor ja ma-id hay hachi pfalud.” 24 Unagkhu chengngor chin ap-apon chi gwarja hichi Templo ja chin a-ap-apon chi pachi ja ma-id machotoˈ hi nomnomon cha ti agkhuy cha anila nu ngay pumpfanakhan hachi naˈna-at. 25 Ja gwa han immuy ay chicha an nangali hi, “Chin linala-e an impipfalud ju ja gawwacha cha mangkay hichi Templo an khun muntudtuchu hana tatakhu.” 26 Hotti immuy hachi gwarja ja chin a-ap-apo cha an i mangagwit ay chicha ta epfangngad cha hichi punhumarjaan. Ja agkhuy cha pinilit chicha ti toma-ot cha hi pangajangan hachi tatakhu ay chicha.
27 Eneghop cha hachi apostol hichi punhumarjaan ta humarjaon hachi a-ap-apon chi Hudju, ja inalin chin natakhay an pachi hi, 28 “Inhingar mi chaˈju ta epokhong ju an i mangitudtuchu ay nuy an takhu an inunud ju. Muti tan agkhuy ju enegngor ja natuchugwan cha gwot an amin hato tatakhu heto ad Jerusalem. Ja chaˈmi ochot chi papfaholon ju an nangpapatoy ay hija.” 29 Tempfar cha Peter ja chin i-ibpfa na an apostol ja inali cha chi, “Aa, ti mahapor an unuchon mi hi Apo Jos an pfu-un hay takhu. 30 Hi Apo Jos an khun dayawon chin a-ammod ta-o ja minahuwana hi Hesus an empapatoy ju chin kros. 31 Ja impapfagto na gwot hi Hesus ta inumpfun ay ni nun-appit hi agwana an miˈ-ap-apo. Ja hija khu chi Ap-apo ja Manakhu ay chita-o an holag Israel ta gway aton ta-o an man-ug hi pfahor ta-o ja ta gway aton ta-o an mapakawan. 32 Tihtikhuwan mi an umannung an amin hay hato, ja tihtikhuwan khu ni Espiritu Santo an inchat Apo Jos an amin hana miˈ-unud ay hija.”
33 Unagkhu chengngor hachi a-ap-apo hitay ja pfimmungot cha ja penhod chaot an patajon hachi apostol. 34 Muti gwacha han oha ay chicha an hi Gamaliel an Farisee. Hitay an lala-e ja mehtolon chi urchin Moses an lihpituwon chi tatakhu. Timmaˈchug hija ja impapfutay na hachi apostol ta umi-igway cha an munhahapit an a-ap-apo. 35 Ja inali na hi, “A-akhi an holag Israel, pa-anomnomon ta-o gwot niˈ hini i ta-o aton ay cha tay. 36 Nomnomon ta-o chin lala-e an hi Teudas. Khuna allon hi hijay napfagpfagto ja nidchum chi apat hi khahot an tatakhu ay hija. Penatoy cha hi Teudas ja nunhihijan hay hachi nun-ibpfa na ja hijah chuy chi pogpogna. 37 Nepallog khu han oha an hi Judas an eGalilee chin timpo an pumpalehtaan cha hi ngachan. Cho-or khu hachi immunud ay hija ja penatoy cha khu, ja nunhihijan hay hachi nun-ibpfa na. 38 Hotti ad ugwani ja hay itukhun u ay chaˈju, ja ma-id koma at-aton ta-o ay chicha ta un cha ikhad. Ti nu narpu hi nomnom chi takhu hay hato khun cha aton hot ma-id toloy na. 39 Muti nu umannung an hi Apo Jos chi khun mangat hay hato ja ma-id chamchama olog ta-o an mangpataˈchug ay chicha. Oha khu ja unchani ja ma-id uchumna hi khun ta-o pfuhulon nu pfu-un hi Apo Jos.” 40 Ja enegngor cha chin intukhun Gamaliel. Impahikhop cha khu hachi apostol ja impahuplit cha chicha ja inhingar cha ta achi cha ipigpiggwa an i mangali ay ni omaˈ-atan Hesus. Ja impfu-aan cha chicha.
41 Amat hichi ja nakak hachi apostol ay chuy punhumarjaan ja khun cha mun-an-anla, ti impfilang Apo Jos chicha an miˈlikhat ja an mapfa-inan khapo hi niˈ-unuchan cha ay Hesus. 42 A-arkha-arkhaw hon immuy cha hichi Templo ja anong un hana pfarpfalay an i mangkaskasaba an hi Hesus hini Kristo an mamahhod.