Acts 3

Chin napilay an na-akhahan

¹ Gwacha han himpumupujaw ja niˈjuy cha Peter ay John hichi Templo ay ni oras an khun pungkalalakhan. ² Ja gwacha han ohan napilay an lala-e an achi chumalan nete-a chin nituˈkhungana. A-arkha-arkhaw ja khun cha ijuy hichi Templo hon impapfun cha ay ni pantaw an nginadnan cha hi Maphod, ta mun-achaw hi pihun hana humikhop. ³ Gwa an tinnig na cha Peter ay John an humikhop cha ja nun-achaw hi hay ichat cha. ⁴ Ja emmohchong cha hija ja inalinot Peter hi, “Mohgwaton chaˈmi.” ⁵ Ja emmohgwat na ay chicha ja hehennod na hay ichat cha. ⁶ Muti inalin Peter hi, “Ma-id oh-ohha hi pihuˈ muti hini gwacha ay ha-in ja hijay itolong u ay he-a. Tomenong a khapo ay ni apfalinan Hesu Kristo an eNazaret, hotti tumaˈchug a ja chimmalan a.” ⁷ Ja penchon Peter chin agwan an ngamoy na ta tulungana an tumaˈchug. Unagkhu hin-aˈ-alina ja na-anchong chin hu-i na ⁸ ja nelaneggwat ja chimmalan ti temmenong. Ja niˈhikhop hija hichi Templo an khun chumalan ja khun lomattoˈ an mundaydayaw ay Apo Jos. ⁹ Ja tinnig an amin chin tatakhu hija an khun chumalan ja mundaydayaw ay Apo Jos. ¹⁰ Ja immatunan cha an hija chin u-umpfun an khun mun-achaw ay chuy pantaw an nangadnan hi Maphod, ja nanor cha ay chuy an na-at.

Chin nuntudtuchugwan Peter hichi Templo

¹¹ Pfimmutay cha Peter ay John ay ni pfarkon an nginadnan cha hi Pfarkon Solomon, ja chin lala-e an nepatenong ja pfinijaw na chicha. Hitatagtagtag chin tatakhu an umuy hi gwachaan cha ti nanor cha ay chuy natnat-on an na-at. ¹² Unagkhu tinnig Peter ja inali na hi, “A-akhiˈ an holag Israel, anagkha ta nanannor aju? Ja anagkha ta pa-emmohchongon chaˈmi? Unchah khemhon ju un chaˈmi chi nangpachallan ay tay an lala-e khapo hi apfalinan mi wenno khapo ta naˈna-unnud ami ay Apo Jos? ¹³ Mahapor an annilaon ju an hitay an hi Apo Jos an khun dayawon hachi a-ammod ta-o, an cha Abraham, ja hi Isaak, ja hi Jakob, chi nangat ta ipapfagpfagto na hini Apo mi an hi Hesus an pfaar na. En-agwat ju hija hachi a-ap-apo ja chin-ug ju hija chin nunhumarjaan Pilato, an anong una podhon an ipfu-aan ja in-achi ju. ¹⁴ Chin-ug ju hi Hesus an magpong ja ma-id oh-ohha hi pfahor na, ja inali ju agkhu ay Pilato an hay ipfu-aana ja chin ohan pemmatoy! ¹⁵ Penatoy ju hini khun mangchat hi piˈtakhuwan muti minahuwan Apo Jos chamchama. Ja tihtikhuwan mi an umannung hitay, ti niˈtikhaw ami. ¹⁶ Ja anagkha ta chimmallan hitay an lala-e? Aa, ti hini apfalinan Hesus ja hini pammati mi ay hija chi nangpachallan ay tay an lala-e an anila ju ja tinnig ju. Hi Hesus chi nangpapfi-ah ay ni nomnom na an mamati ay hija, hijaot un temmenong ad ugwani hi agawwachaan ju.”

¹⁷ Entoloy Peter an nunhapit ja inali na hi, “A-akhiˈ, anilaˈ an chin nangpapatajan ju ay Hesus, ja agkhuy ju anila an hija chi hennag Apo Jos an mamahhod. Ja anong un chin ap-apo ta-o ja agkhuy cha khu anila. ¹⁸ Muti chin natajan Hesus ja nipa-annung chin impadtun hachi profetan Apo Jos chin hopapna. Ti impa-innilan Apo Jos ay chicha an mahapor an matoy hini honakhona an mamahhod. Ja tan ad ugwani chi na-atana. ¹⁹ Hotti chuˈkhon ju hana pfahor ju ja numpfangngad aju ay Apo Jos ta pakawanona an amin chi pfahor ju. ²⁰ Nu amat hetoy aton ju, ja i-alin Apo Jos chi pun-ar-alenagwaan ju ja unaot honakhon khu hi Hesus an umali, hija an pinili na an hahadchon ta-o. ²¹ Muti mahapor an mihihidchi hija ad langit ingkhana an machakngan chin arkhaw an pangpa-annungann Apo Jos an amin chin impa-innila na an inalin hachi nasantuwan an profeta chin hopapna. ²² Hay oha an impa-innila na ja hitay inalin Moses hi nangarjana hi, ‘Honakhon Apo Jos han profeta an umali ay chaˈju an amat ay ha-in an profeta na, ja oha hija khu an ibpfa ta-o an holag Israel, ja mahapor an unuchon ju an amin chi hay allona. ²³ Ti an amin chi achi mangngor ja milahin cha hana tatakhun Apo Jos ta madusa cha.’”

²⁴ Entoloy Peter an nunhapit ja inali na hi, “Hachi khu uchumna an profetan Apo Jos nete-a ay Samuel ja an amin chin netonetob ay hija, ja impa-innila cha khu hato naˈna-at ad ugwani. ²⁵ Chita-o ad ugwani chi mangagwat hana ingkarin Apo Jos an inalin hachi profeta na, ja nidchum ta-o chin neˈtobpfalana chin a-ammod. Ti inali na ay Abraham hi, ‘Hini holag mu chi pomhochan an amin chi tatakhu heto lota.’ ²⁶ Hotti chita-o chi nahhun an nangpa-aliyana ay Hesus an pfaar na ta pomhod hini piˈtakhuwan ta-o, ti tulungan chita-o ay Apo Jos an man-ug hay hana nihikhud an pfahor ta-o.”