21
Chin numpatikhagwan Hesus han peto an adalana
1 Gwacha khu han ohan arkhaw an numpatikhagwan hi Hesus hay hachi adalana ay chuy pingngit chi Baybay an Tiberias. Ja amat heto chin enat na an numpatikhaw ay chicha. 2 Ay chuy an arkhaw ja nunchichittum cha Simon Peter, ja hi Tomas an nangadnan hi Nun-eper, ja hi Nataniel an eKana ad Galilee, ja hachi chugwa an empfalay Zebedee, ja han chugwa pay an adalan Hesus. 3 Inalin Simon Peter hachi numpun-ibpfa na hi, “Tan ujaˈ manapfukur.” Ja inali cha hi, “Hot umuy a ayya ja miˈjali ami.” Amat hichi ja empacheh cha an i nunlukhan han pfalangay. Timmu-ar cha an manapfukur ingkhana hi nagwa-ah, muti ma-id oh-ohha hi enala cha.
4 Unagkhu gwa an nagwa-ah ja timmataˈchug hi Hesus ay chuy pingngit chi baybay, muti agkhuy cha immatunan. 5 Himmapit hi Hesus ja inali na hi, “Omod, gwacha chah chi khinachiw ju?” Tempfar cha ja inali cha hi, “Ma-id numpay oh-ohha.” 6 Ja inalin khu Hesus hi, “Ituud ju hinuy tapfukur ju ay ni nun-appit hi agwan ni pfalangay hot gwa han ma-ala ju.” Enat cha ja un chaagkhu lenom an mangujud chin tapfukur ja ad-adchi cha, ti naˈ-apnu hi khachiw. 7 Chin oha an adalan an penpenhod Hesus ja inali na ay Peter hi, “Hot anagkha ay chita an un hi Apo Hesus hichuy.” Unot inannilan Simon Peter an hi Hesus hini himmapit, ja inlopfong na chin enaˈ-aana an lopfong ja emmaˈpfaw an himmalug, ja chimma-ar hichi pingngit na an agawwachaan Hesus. 8 Chin pfalangay ja achi achawwi ay chuy pingngit na, ti un hingkhahot hi mitlu chi inachawwi na. Hotti chin ayya numpun-ibpfan Peter ja khun cha eh-ehnot chin pfalangay ay chuy pingngit na, ja khun cha khu khujuchon chin tapfukur an napnu hi khachiw. 9 Gwa an emmatam cha ay chuy palantagna ja tinnikhaw cha han apoy. Ja gwa han nenegkhong an khachiw ja han tenapay an negwagwallang. 10 Ja inalin Hesus ay chicha hi, “Ijali ju hay tortollo ay nuy khinachiw ju.” 11 Amat hichi ja immuy hi Simon Peter ay chuy pfalangay ja encha-ar na chin tapfukur an naˈ-apnu hi o-otong an khachiw. Hay pfilang na ja hingkhahot ta han lemay polo ta han tolo (153). Ja anong un at hichi chin pfilang hachi khachiw ja agkhuy napaˈ-i chin tapfukur. 12 Inalin Hesus ay chicha hi, “Umali aju ta mangan ta-o.” Ja khun mun-ong-ongang hachi adalan an mangali hi, “Ngay ngachan mu?” muti immatunan cha an hija hi Hesus. 13 Ja enalan Hesus chin tenapay ja empapong na, ja enat na khu chin khachiw. 14 Hitay chi me-atlo an numpatikhan Hesus hachi adalana nete-a chin nummahuwana.
Chin nangohtan Hesus ay Peter hay omaˈ-atan chi pamhod na ay hija
15 Napfalin an nangan cha ja inalin Hesus ay Simon Peter hi, “Simon, an empfalay John, ot-ottong chah hini pamhod mu ay ha-in mu hini pamhod cha tay i-ibpfam?” Ja inalin Peter hi, “Aa, Apo, anilam an podpodhoˈ he-a.” Ja inalin khu Hesus hi, “Hotti ipahtulam hana tatakhu an namati ay ha-in, an amat hi pahtor an mun-enchog hi pfoˈtot an karnero.” 16 Ja impiggwan Hesus an nangali ay Peter hi, “Simon, an empfalay John, podpodhonaˈ chah ay he-a?” Ja inalin Peter hi, “Aa, Apo, anilam an podpodhoˈ he-a.” Ja hin-inalin khu Hesus hi, “Hotti halimunam hana tatakhuˈ an namati ay ha-in.” 17 Ja impitlon Hesus an nangali hi, “Simon, an empfalay John, podpodhonaˈ chah ay he-a?” Loˈtat ja pimmukhit chin punleˈnaan Peter hi nangpiggwapiggwaan Hesus an nangali hi, “Podpodhonaˈ chah ay he-a?” Ja inalin Peter hi, “Apo, anilam an podpodhoˈ he-a, ti anilam an amin.” Ja inalin Hesus hi, “Hotti halimunam hana tatakhuˈ. 18 Umannung hitay alloˈ ay he-a an chin a-ungam ja un a ikhad hon en-apjam chi pfalekeh mu. Ja nu gway penhod mu hi omajan ja immuy a. Muti unchani ta mala-ay a, hot uˈjachom hana ngamoy mu ja kha-utan chi-a ta ijuy chi-a ay ni achim podhon an omajan.” 19 Inalin Hesus hitay ta impa-innila na hini aton Peter an matoy ta michat hini dayaw ay Apo Jos. Ja entoptop na an nangali ay Peter hi, “Unuchonaˈ.”
Chin nanghanhanan Peter nu ngay ma-at ay John
20 Nunligkhoh hi Peter ja tinnig na an khun mangunud chin ohan adalan an penpenhod Hesus. Hija hichin nenehnot ay Hesus chin nanganan cha an nangali ay Hesus hi, “Apo, ngay ngachan ni mangpfaag ay he-a hana pfuhur mu?” 21 Unot tinnig Peter ja inali na ay Hesus hi, “Apo, hichuy mah ibpfaˈ, ngay ma-at ay hija?” 22 Ja inalin Hesus hi, “Achi khahin un mu annilaon. Ti ikhachaˈ nu alloˈ hi matattakhu ingkhana hi pumpfangngachaˈ. Muti ay he-aot niˈ an hay alloˈ ja unuchonaˈ.” 23 Khapo ay tay an inalin Hesus ja gwa hana namati an khun mangali hi achi anu matmatoy hitay an adalan Hesus. Muti ma-id inalin Hesus hi amat heto, an un hay inali na ja, “Ikhachaˈ nu alloˈ hi matattakhu ingkhana hi pumpfangngachaˈ.”
Hini ne-ang-angonoh an nitulaˈ
24 Ha-in an nangtulaˈ ay tay, ja ha-in chin adalan an penenpenhod Hesus, ja ha-in hitay khun muntihtikhu an amin hato nitulaˈ ay tay an libju. Ja anila mi an umannung hay hato intulaˈ u. 25 Achi angkhay hay hato chi enat Hesus, ti cho-or pay. Nu amoton an itulaˈ hot ad-adchi hitay lota hi pegwallangan chi alibjulibju an mephod.