13
Chin nangulahan Hesus chin hu-in hachi adalana
1 Gwa an machakngan chin pfehtan chi Hudju an Pangnomnoman cha chin Nalohan chin Angher Apo Jos, ja anilan Hesus an nehnot hini arkhaw an panaynana ay tay lota ta mumpfangngad ay Ama na. Nete-a chin hopapna ja penpenhod na hana tatakhu na ay tay lota, muti ad ugwani ja ipatikhaw na hini nunhegla an pamhod na.
2 Ay chuy an nadhom ja na-orpfong cha Hesus ja hachi adalana ja empanomnom mahpay Satanas ay Judas an empfalay Simon Iskariot hay atona an mangngina ay Hesus. 3 Hi Hesus ja anila na an impulang Ama na an amin ay hija ta hijay khun mangpagpong. Ja anilan Hesus an hi Apo Jos chi narpugwana ja hija khu chi pumpfangngachana. 4 Amat hichi ja timmaˈchug hi Hesus ja lenoh-op na chin negtap an lopfong na, ja enala na han tugwarja ja empfar-oh na. 5 Inhiit na han chanum han pfatja ja ente-a na an ulahan chin hu-in hachi adalana hon pinuˈnahana ay chuy tugwarja an empfar-oh na. 6 Ja unot negpong ay Simon Peter ja inalin Peter ay hija hi, “Apo, un chah he-a agkhu chi mun-ulah ay tay hu-iˈ?” 7 Tempfar Hesus ja inali na hi, “Agkhuy mu pay anila hitay khapo na an pangataˈ heto, muti unchani hot annilaom.” 8 Ja inalin Peter hi, “Achi mapfalin unagkhu niˈ la-ahna ja he-a chi mangulahan hato hu-iˈ!” Ja inalin khu Hesus hi, “Nu achim pa-ulah hini hu-im ay ha-in hot achi a mangkay mipfilang hi takhuˈ.” 9 Ja inalin Simon Peter hi, “Ti un ayya amat hina, Apo, hotti ulaham hato hu-iˈ, ja inidchum mu mah an piˈ-ulah hato ngamoy u ja hitay uluˈ!” 10 Ja inalin Hesus hi, “Nun-amoh ayya hini takhu ja maleneh an amin hini achor na, hotti angkhay hana hu-i chi khun ipiggwa an ulahan. Maleneh aju an amin, muti gwa han oha ay chaˈju an achi maleneh.” 11 Ti aniˈ-ilan Hesus hini mangngina ay hija, hijaot una inali hi, “Gwa han oha ay chaˈju an achi maleneh.”
12 Napfalin an inulahan Hesus hachi hu-i cha ja inlopfong na khu chin lenoh-op na an lopfong, ja numpfangngad an i ni-ipfun chin nanganan cha. Ja inali na hi, “Na-awatan ju chah hitay enat u ay chaˈju? 13 Khun ju allon hi un ha-in chi Manudtuchu ay chaˈju ja ha-in chi Apo ju, ja umannung. 14 Muti tayya an anong un ha-in an Apo ju an Manudtuchu ay chaˈju, ja inulahaˈ hana hu-i ju. Hotti anong koma un chaˈju ja munhin-i-innulah aju hi hu-i. 15 Hay nangataˈ ay tay ja ta gway tuntunchon ju ta peˈ-at ju. 16 Umannung hitay alloˈ ay chaˈju. Hini takhala ja achi napfagpfagto mu hini apo na, ja achi khu napfagpfagto hini pfaar mu hini khun mamaar ay hija. Hotti nu ha-in an Apo ju ja enat u hitay ja un chah napfagpfagto aju mu ha-in ta achi ju peˈ-at? 17 Tayya an inannila ju mahpay hitay umannung an tukhun u, hotti madmachennor aju nu unuchon ju.
18 Pfu-un chaˈju an amin hini nangarjaˈ, ti anilaˈ hini omaˈ-atan an amin hana piniliˈ. Mahapor an ma-at hini nitulaˈ an Hapit Apo Jos an nangarjana hi, ‘Hini nan-ug ay ha-in ja oha an khun meˈ-an ay ha-in.’a 19 Ipa-innilaˈ hitay ay chaˈju ja un ma-at, ta tikhan ju ayya an nipa-annung ja namati aju an ha-in hini Kristo an Mamahhod. 20 Umannung hitay alloˈ ay chaˈju, an hini mangakhamid hay hana takhu an honakhoˈ ja inakhamichaˈ khu. Ja hini mangakhamid ay ha-in ja inakhamid na khu hi Ama an nannag ay ha-in.”
Chin nangpa-innilaan Hesus hi pangpfaakhan Judas ay hija hana pfuhur na
21 Empa-opoh Hesus hay hato inali na ja machamot hi punnomnomana, ja enhemad na an nangali chin adalana hi, “Umannung hitay alloˈ ay chaˈju. Gwacha han oha ay chaˈju an i mangpfaag ay ha-in hana pfuhur u.” 22 Nanghenmomohgwat hachi adalana ti agkhuy cha anila nu ngay pitulungan chuy an inali na. 23 Ja gwa han oha an adalan an penenpenhod Hesus an nechechelloh ay hija. 24 Ja inhinjar Simon Peter chin nechechelloh ay Hesus ta hanhanana ay Hesus chi ngachan ni allona an i mangpfaag ay hija hana pfuhur na. 25 Hotti inggwingi na ay Hesus ja inali na hi, “Apo, epfaag mu man hini adalan an i mangpfaag ay he-a.” 26 Tempfar Hesus ja inali na hi, “Hini pangchataˈ ay ni tenapay an ehawhaw u ja hija hini i mangpfaag ay ha-in.” Amat hichi ja enala na han tenapay ja enhawhaw na, ja inchat na ay Judas an empfalay Simon Iskariot. 27 Chinugwagwan Judas chin tenapay ja nehoˈlong gwot hi Satanas ay hija. Ja inalin Hesus ay hija hi, “Umuy aot ta im aton hini nenonomnom mu an aton.” 28 Hachi uchumna an adalan ja agkhuy cha na-orman hitay an i inalin Hesus ay Judas. 29 Hay khemhon hachi uchumna ja un pfinaar Hesus ta i ngumina hay mahapor cha ay chuy an pfehta, ti hi Judas chi mamangchon chin pihu cha. Ja khemhon khu hachi uchumna hi unakkay pfinaar Hesus an i mangchat hay tolong hay hana napubli. 30 Unot enalan Judas chin tenapay ja nakak. Nanadhom ay chuy an nakakana.
Chin oha an inidchum Hesus an in-urchin
31 Nakak hi Judas ja inalin Hesus hi, “Ad ugwani ja timpo na an mipapfagpfagtuwaˈ an Na-ilangitan an Takhu, ja khapo ay ha-in ja mipapfagpfagto hi Ama. 32 Ja nu mipapfagto hi Apo Jos khapo ay ha-in ja achi na etantan an mangpapfagpfagto khu ay ha-in.
33 Chaˈju an impfilang u hi empfapfalay, achi mapfajag hot taynaˈ chaˈju. Hingitonaˈ ay chaˈju muti tan ipiggwaˈ an mangali chin inaliˈ hachi a-ap-apon chi Hudju, an achi mapfalin an miˈjali aju gwot ay ni omajaˈ. 34 Ja tayya han oha an idchum u an i-urchin hot unuchon ju. Mahapor an mumpepennohhochan aju an amat ay ni enat u an namenhod ay chaˈju. 35 Ti nu mumpepennohhochan aju ja hijay pang-imatunan an amin chi tatakhu an chaˈjuy disipoloˈ an immunud ay ha-in.”
Chin nangpa-innilaan Hesus hi panghaotan Peter ay hija
36 Empfokhan Simon Peter ay Hesus hi, “Hotti ngay mah im omajan, Apo?” Ja inalin gwot Hesus hi, “Achi mapfalin an miˈjali a chamchama ay ni omajaˈ, ta unchani ja un a mangunud.” 37 Ja inalin khu Peter hi, “Anagkha mah, Apo, ta achi mapfalin an mitnuchaˈ ad ugwani? Nehahagkhanaaˈ an matoy khapo ay he-a.” 38 Ja inalin Hesus hi, “Un chah angkhiloh un mu ichat hini piˈtakhuwam khapo ay ha-in? Tayya an alloˈ hini umannung, an ehaotaˈ ay he-a hi mumpetlo ad ugwani an lapfi ja unot tumalanu.”