12
Chin nanghiitan Mary chin mumpfango an lanob chin hu-in Hesus
1 Unum chi arkhaw ja un machakngan hichin Pfehtan chin Nalohan chin Angher Apo Jos, ja immuy hi Hesus ad Betani an pfuglay cha Mary ja hi Marta ja hi Lazarus, chin natoy an minahuwan Hesus. 2 Ja impartiyan cha hija. Hi Marta chi khun munhakhana ja i neˈ-orpfong hi Lazarus ay cha Hesus. 3 Amat hichi ja enalan Mary han lanob an munnaud an nangina an maphod chi hunghung na, an allon cha an nardo. Chugway pfahu chin lanob an empelanob Mary ay ni hu-in Hesus ja impuˈnah na chin pfuuˈ na. Ja napnu chin pfalay an agawwachaan cha hi pfangon chin lanob. 4 Gawwah chi hi Judas Iskariot an oha an adalan an i mangngina ay Hesus. Ja unagkhu gwa an tinnig na chin enat Mary ja inali na hi, 5 “Anagkha ta agkhuy ju ingngina hinuy an lanob ta ichat ju hini ngina na hana publi? Un angkhaynana hon napfalor, an pfoˈlaon hi ohay tagwon.” 6 Inali na hitay muti najuna gwot ja ma-id nignikha na hana publi. Ti hini pfalor ni lanob chi nun-o-onan hichin nomnom na, khapo ta emmengha an hijay mamangchon chin pihun cha Hesus ja khuna aˈ-aanan. 7 Ja inalin Hesus hi, “Achi ju papfaholon hitay an pfupfai. Ikhad hija ti enhahaˈpfa na hitay an lanob ta enchaag na an melanob ay tay achor u ja unaˈ i milupfuˈ. 8 Hana ayya publi ja gawwacha cha ay chaˈju hi a-arkha-arkhaw, muti ha-in ja nehnot chin arkhaw an panaynaˈ ay chaˈju.”
Chin nunhahappitanan cha hi aton cha an mamatoy ay Lazarus
9 Unot chengngor chin cho-or an Hudju an gwacha hi Hesus ad Betani, ja immuy cha an i nanikhaw ay hija. Ja pfu-un hija ja angkhay chi i cha tikhan muti penhod cha an piˈtikhaw hi Lazarus an minahuwan Hesus. 10 Ja nunhahappitanan hachi a-ap-apon chi papachi an pi-idchum cha hi Lazarus an epapatoy. 11 Ti nete-a chin nummahuwana ja cho-or chi Hudju an nan-ug hachi a-ap-apo cha ta mamati cha ay Hesus.
Chin nundaydayawan cha ay Hesus hi omajana ad Jerusalem
12 Chin nun-inggwiˈgwiit ja cho-or chay tatakhu an na-amung ad Jerusalem an meˈpfehta ay ni Pfehtan chin Nalohan chin Angher Apo Jos. Un chaot chengngor an gwa an omatam hi Hesus 13 ja emmala cha hachi tupfu an amat hi tupfun chi khattiloy. Ja i cha chinittum hi Hesus ja khun cha iˈgwap an mangali hi, “Madaydayaw hi Apo Jos! Mabindisyonan hitay an hennag Apo Jos. Madaydayaw hitay Ari ta-o an holag Israel!” 14 Empa-alan Hesus han pfoˈtot an donkey ja nunhakay, ti hijah nuy chin nitulaˈ an hapit Apo Jos hi nangarjana hi,
15 “Achi aju toma-ot, chaˈju an eSion,
Chiya an khun umali hichuy Ari ju
An nunhahakkay han pfoˈtot an donkey.”a
16 Agkhuy pay na-awatan chin disipolon Hesus hichuy an enat na, ingkhana hi nummahu ja un cha annilaon an nipa-annung chin nipadtu ay ni hapit Apo Jos ja na-at ay hija.
17 Chin cho-or an tatakhu an nannig chin enat Hesus hi namokhaana ay Lazarus hichi lupfuˈ ta nummahu, ja khun cha haphapiton. 18 Nunchongor hitay an milagro an enat Hesus, hijaot un cho-or chay tatakhu an i nanittum. 19 Amat hichi ja nunhahapit hachi Farisee an allon cha hi, “Angkhaynana, ma-id mapfalin ta-o. Ti tayya, an amin hato tatakhu ja immunud cha ay hija.”
Chin i naningitan hachi Griego ay Hesus
20 Gwacha chin uchumna an Griego an niˈjuy ad Jerusalem ta meˈpfehta cha. 21 Immuy cha ay Philip an eBetsaida ad Galilee, ja inali cha hi, “Apo, podhon mi an miˈhapit ay Hesus.” 22 Immuy hi Philip ay Andrew an i nangpfaag ay nuy inali cha, ja immuy cha an chugwa ay Hesus an i mangali. 23 Ja inalin Hesus hi, “Nehnot chin timpo an ipapfagtuwaˈ an Na-ilangitan an Takhu. 24 Umannung hitay alloˈ ay chaˈju. Hini pfugwa, nu achi mitanum ay tay lota hot achi homangaw ja achi chom-or an un hihiya an oh-ohha. Muti nitanum ayya ja amat hi un natoy muti homangaw ja cho-or chi pfunga na.b 25 Ti hini takhu an un hini piˈtakhuwana heto lota chi podpodhona ja angkhay, ja achi miˈtakhu ay Apo Jos. Muti hini takhu an man-ug ay ni piˈtakhuwana heto lota ja miˈtakhu ay Apo Jos hi ma-id chi pogpog na. 26 Hini mamhod an mangat ay ni penhod u ja mahapor an unuchonaˈ ta an amin chi hay agawwachaaˈ, ja gawwacha khu hija. Ja ipapfagton Ama hana mangat ay ni penhod u.”
Chin nangpa-innilaan Hesus ay ni atajana
27 Entoloy Hesus an nangali hi, “Machamot hitay ujaˈ punleˈnaan ad ugwani, muti un u chah allon ay Ama hi, ‘Haniyanaˈ adniˈ ay tay an umali an punlikhataˈ?’ Achi mapfalin ti hini immaliyaˈ heto lota ja ta lahinoˈ hini neˈcha an atajaˈ.” 28 Ja inalin khu Hesus hi, “Ama, ipatikhaw mu hini kinajos mu!” Ja gwacha gwot han tenompfar ad langit an nangali hi, “Impatikhaw u hini kinajos u ja ipiggwaˈ khu an aton.” 29 Chengngor hachi na-amung an tatakhu an niˈtataˈchug hichuy hapit ja inali cha hi, “Niya an immichor!” Ja inalin hachi uchumna hi, “Niya han angher Apo Jos an niˈhapit ay hija.” 30 Ja inalin Hesus ay chicha hi, “Chaˈju koma chi mangngor ay nuy an hapit, ti agkhuy ni-ali hinuy an hapit khapo ay ha-in. 31 Khumaju an machakngan han panugijan Apo Jos hana tatakhu ay tay lota, hot ma-apfak hini ap-apo heto lota an hi Satanas. 32 Muti ha-in nu mipfitinaˈ hot ma-akhuy-uy an amin chi tatakhu an umali ay ha-in.” 33 Inali na hitay ta ipa-innila na ay chicha hini atona an matoy. 34 Tempfar chin tatakhu an inali cha hi, “Hay anila mi hi allona ay ni hapit Apo Jos ja ma-id chi hay umali hi atajan ni Mamahhod an hi Kristo. Hotti anagkha ta allom hi mahapor an mipfitin hini Na-ilangitan an Takhu? Ngay ngachah nuy an Na-ilangitan an Takhu?” 35 Tempfar Hesus ja inali na hi, “Ha-in an mipadchung hi hilaw ja un naˈnaˈ-omtang chi pipidchumaˈ ay chaˈju. Hotti pa-ennongan ju gwot an mangat hay hana itudtuchuˈ ad ugwani an gawwachaaˈ ta achi aju ma-ah-upan ay ni munhehellong. Ti hini chumalan ay ni hehellong ja ma-id maptoˈ hi agwuna. 36 Hotti mamati aju akay niˈ ay ha-in an manilagwan ay chaˈju ad ugwani an agawwachaaˈ ay chaˈju ta mahilagwan hana nomnom ju.”
Chin agkhuy namatiyan hachi Hudju
Emmopoh chin inalin Hesus ja tenaynana chicha ja ma-id anila cha hi immajana. 37 Anong un cho-or chin milagro an enat na ta pannikhan cha koma an narpu hini apfalinana ay Apo Jos ja achi cha chamchama mamati ay hija. 38 Hotti nipa-annung chin intulaˈ profeta Isaiah hi nangarjana hi,
“Apo, anagkha mah ta ma-id chi hay namati chin intudtuchu mi,
ja ma-id khu chi hay nanginnila ay ni apfalinam?”c
39 Umannung hitay an intulaˈ Isaiah an un honger hachi tatakhu an mamati. Hijaot un intulaˈ khu Isaiah hi,
40 “Un loˈtat ja pfinulaw Apo Jos hana mata cha ta achi cha tumikhaw,
ja henerngana hini nomnom cha ta un chaot mah achi maka-awat.
Ti allon Apo Jos hi, ‘Anagkha tugwali ta achi cha podhon an tumikhaw ja achi cha podhon an ma-awatan. Ja anagkha ta achi cha chuˈkhon hana pfahor cha
ja achi cha mungkalalag ay ha-in ta takhuwoˈ chicha?’”d
41 Intulaˈ Isaiah hitay ti nipatikhaw ay hija hini nakaskasda-aw an apfalinan Hesus, hijaot una intulaˈ chi omaˈ-atana. 42 Cho-or chamchama hachi a-ap-apon chi Hudju an namati ay Hesus. Muti agkhuy cha inar-ali, ti toma-ot cha hay hachi Farisee an nangali hi un cha aanun chicha ay ni sinagoga nu tihtikhuwan cha an namati cha ay Hesus. 43 Ti napfalor ay chicha hini pedayawan cha hi tatakhu mu hini dayaw an marpu ay Apo Jos.
Hana inalin Hesus chi manugwi ay ni takhu
44 Ja iniˈgwap Hesus an nangali hi, “Hini namati ay ha-in ja pfu-un ha-in ja angkhay chi pinati na, an pinati na khu hini nannag ay ha-in. 45 Hini nannig ay ha-in ja hihiya an tinnig na hini nannag ay ha-in. 46 Immaliyaˈ heto lota an munhilaw ta achi mahpay maherngan chi nomnom hana mamati ay ha-in. 47 Hini nangngor ay tay tukhun u ja achi na unuchon, ja pfu-un ha-in chi manugwi ay hija. Ti unaˈ immali heto lota an manakhu hi tatakhu, an agkhujaˈ immali an manugwi ay chicha. 48 Muti nu machakngan hini Punhugijan Apo Jos, ja hana tatakhu an nan-ug ay ha-in ja ay ni tukhun u ja mahugwi cha khapo hay hana hapit u an agkhuy cha pinati. 49 Ti achiyaˈ omo-ohha hon empadchong u hini alloˈ, ti hi Ama an nannag ay ha-in ja inali na an amin chi hapitoˈ. 50 Ja anilaˈ an miˈtakhu hi ma-id chi pogpogna hini mangat ay ni allon Apo Jos. Hijaot un an amin hini hapitoˈ ja hana intuchun Ama hi alloˈ.”