10
Hay intuchun Hesus hana mumpunhihijan an hempfalay
1 Nakak cha Hesus ad Galilee ta immuy cha ad Judea ja un chaot pfad-angon hini gwanggwang an Jordan. Cho-or khu chin tatakhu an immuy ay hija hotti intudtuchugwana chicha, ti hitay chi emmengha hi atona.
2 Ja gwacha hachi uchumna an Farisee an immuy ay hija ta toptopngan cha. Ja inali cha hi, “Ngay allom, mapfalin chah ay ni urchin ta-o an ihijan ni lala-e hini ahagwa na an pfupfai?” 3 Ja inalinot Hesus hi, “Ngay tugwali allon chin urchin Moses?” 4 Tempfar cha ja inali cha chi, “Hay in-urchin Moses ja mapfalin an ihijan ni lala-e hini ahagwa na, nu ichatana hi tulaˈ an napermaan an nunhijan cha ja unaot pakakon.” 5 Ja inalin Hesus hi, “Umannung an in-urchin Moses hitay, muti hay khapo na ja munnaud aju an nalikhat hi matuchugwan. 6 Ti chin ayya hunhunana an narmugwan tay lota ja himpfun Apo Jos chi takhu an lala-e ja pfupfai. 7 Ja inalin Apo Jos hi, ‘Hijaot un taynan ni lala-e hana a-ammod na ta i midchum ay ni ahagwa na an pfupfai, 8 hot mumpfalin cha hi ohah achor.’a Hotti achi cha chugwa an un cha oh-ohha. 9 Hotti hini numpfalinon Apo Jos hi oh-ohha ja achi mapfalin an punhijanon chi takhu.”
10 Unot numpfangngad cha Hesus chin nunhihittugwan cha ja entoloy chin disipolo na an nunhanhan ay tay an intuchu na. 11 Ja inalin Hesus ay chicha hi, “Hini lala-e an manghijan hi ahagwa na ta i pumiggwa ja hihiya an inlugtap na hini ahagwa na. 12 Ja lugtap khu ay ni pfupfai nu ihijana hini ahagwa na ja nangahagwa hi aha.”
Chin numbindisyonan Hesus chin ung-ungungnga
13 Gwa han namenghan an in-uy cha hachi ung-ungungnga ay Hesus, ti podhon cha an eh-a na hini ngamoy na ta bindisyonana chicha, muti nun-ihingar hachi disipolo chicha. 14 Unot tinnig Hesus hitay an enat hachi disipolo na ja himmingar an inali na hi, “Anong khu ja in-ali cha ay ha-in hato ung-ungungnga. Achi ju epagwa, ti hay hana tatakhu an miˈpadchung hi ung-ungungnga ja chicha chi midchum ay ni Pun-ap-apugwan Apo Jos. 15 Umannung hitay alloˈ ay chaˈju an hini aton ju an mangapfulut ay ni Pun-ap-apugwan Apo Jos ja mahapor an amat ay ni aton ni unga an mangakhamid hi michat ay hija. Ti nu achi amat heto hot achi aju midchum.” 16 Amat hichi ja len-om na hachi ung-ungungnga ja enohha-ohha na an hen-a ta binindisyonana chicha.
Han achangjan an takhu an immuy ay Hesus
17 Unagkhu empacheh cha Hesus an umuy ay chuy i cha omajan ja gwa han lala-e an khun tomagtag an i nunheppe ay hija. Ja inali na hi, “Maphod a, Apo. Hotti ngay allom hi atoˈ ta magwachaanaˈ hi piˈtakhuwan an ma-id chi pogpogna?” 18 Ja inalin Hesus ay hija hi, “Anagkha ta allom hi unaˈ maphod? An un hay maphod ja hi Apo Jos ja angkhay. 19 Anilam jaˈ hana urchin an allon cha hi, ‘Achi aju pomatoy, ja achi aju umilugtap, ja achi aju omakaw, ja achi aju i muntihtikhu hi achi umannung, ja achi aju pfumarpfali, ja unuchon ju hana a-ammod ju.’” 20 Tempfar chin lala-e ja inali na hi, “Khun u unuchon hay hato an urchin, nete-a chin a-ung-ungngaˈ.” 21 Intikhaw Hesus ay hija ja narmu chin otong an pamhod na ay chuy an lala-e ja inali na hi, “Gwacha pay han oha an agkhuy mu enat. Eplaˈ mu an amin hana enachangjan mu ja inchat mu hini polaˈ na hana napubli, hot michatan a hi enachangjan ad langit. Enat mu ayya hitay ja immali a ta mitnud a ay ha-in.” 22 Unaagkhu chengngor hitay an inalin Hesus ja nun-itong na ja immayyong an nangpacheh, ti munnaud chin enachangjana ja ay-ayyugwana.
23 Inggwingin Hesus hachi disipolo na ja inali na ay chicha hi, “Munnaud an nalikhat hana achangjan an midchum ay ni Pun-ap-apugwan Apo Jos!” 24 Ja nanor hachi disipolo na hi nangarjana ay tay ja impiggwana an nangali hi, “Chaˈju an empfapfalay u, nalikhat mangkay chi midchum ay ni piˈtakhuwan ay Apo Jos. 25 Nalaklaka agkhu niˈ hini kemer an lompfot ay ni opfot ni tanud mu hini achangjan an midchum ay ni Pun-ap-apugwan Apo Jos.” 26 Nanor hachi disipolo na hi nangngolan cha ay tay, ja inali cha hi, “Hotti nu achi miˈtakhu hana achangjan ja ngay ngachah mah chi hay miˈtakhu ay Apo Jos?” 27 Emmohchong Hesus chicha ja inali na hi, “Hana achi mapfalina chi takhu ja kayan Apo Jos ti mapfalin an amin ay hija.” 28 Himmapit hi Peter ja inali na hi, “Hot chaˈmi mah an nanaynan an amin ta nitnud ami ay he-a?” 29 Ja inalin Hesus hi, “Umannung hitay alloˈ ay chaˈju, an hana nanaynan hi pfalay cha, a-akhi cha, a-ammod cha, empfapfalay cha ja lota cha khapo hi pamhod cha ay ha-in ja hitay Ebanghelyo, 30 ja choˈchoˈ-olan chi michat ay chicha ay tay piˈtakhuwan cha heto lota. Gway ehakhanan Apo Jos hi pfalay cha, a-akhi cha, a-ammod cha, empfapfalay cha ja lota cha. Maparpalikhat cha khu muti omaˈ-angonoh ja michatan cha hi piˈtakhuwan an ma-id chi pogpogna. 31 Cho-or cha hana nun-apfagto heto lota an chicha chi mi-ud-uchichi hichi ad langit. Ja gwacha hana tatakhu an ma-id nitagtakhuwana heto lota muti chicha agkhu chi mipapfagpfagto ad langit.”
Chin me-atlo an nangpa-innilaan Hesus ay ni atajana
32 Khun ipangpangullun Hesus hi khun cha punti-ichan an umuy ad Jerusalem. Ja unagkhu la-ahna ja nun-elob chin disipolo na ja nanor cha. Henhenod Hesus hachi himpolo ta chugwa an adalana ja impa-innila na khu hay hana ma-at ay hija. 33 Inali na hi, “Chonglon ju! Tayya an umuy ta-o ad Jerusalem ja ha-in an Na-ilangitan an Takhu ja michataˈ hay hachi a-ap-apon chi papachi ja hachi memehtolon chi urchin Moses. Hugijonaˈ ay chicha ja epapatojaˈ. Ja mipulangaˈ hay hana Hentil 34 an mangekejan ja manuppaan ja manuplit ay ha-in. Patajonaˈ muti ay ni me-atlon arkhaw ja mummahuwaˈ.”
Penhod cha James ay John an miˈ-ap-apo ay Hesus
35 Cha James ay John an empfalay Zebedee ja immuy cha ay Hesus an i nangali hi, “Apo, gwa han epfokha mi ay he-a.” 36 Ja inalin Hesus hi, “Nga chah nuy epfokha ju?” 37 Tempfar cha ja inali cha hi, “Machakngan ayya chin pipapfagpfagtuwam ta umpfun a an mun-ap-apo, ja hay epfokha mi ja piˈpapfun chaˈmi an miˈ-ap-apo, oha ay ni nun-appit hi agwan mu ja oha ay ni nun-appit hi ikhid mu.” 38 Ja inalin Hesus ay chicha hi, “Ma-id anila ju ay nuy empfokha ju. Agkhuy ju atag anila chi hay omaˈ-atana. Un chah angkhiloh un aju paˈ-ahchor ay ni likhat an haˈpfatoˈ ja paˈ-ahchor ay ni patoy an amat ay tay ujaˈ pancholan an atajaˈ?” 39 Ja inali cha hi, “Olog mi.” Ja inalin Hesus ay chicha hi, “Umannung an haˈpfaton ju hana likhat an amat ay ni likhat u, ja matoy aju an amat ay ni atoˈ an matoy. 40 Muti tan pfu-un ha-in chi mangpadchong ay ni mi-ipfun ay tay nun-appit hi agwan u ja ay tay nun-appit hi ikhid u, ti hi Apo Jos chi mangpadchong ay ni enchachaag na.”
41 Unagkhu inannilan hachi himpolo an padchung cha an adalan hichuy an empfokhan cha James ay John ja mapfungot cha. 42 Hotti inam-amamung Hesus chicha an amin, ja una allon hi, “Nomnomon ju akay niˈ hana khun mun-ap-apo hi tatakhu heto lota an khun cha ipapilit hini podhon cha. Ja hana a-ap-apo an gway apfalinana, ja khun cha palikhaton hana tatakhu an khun cha pfaapfaalon. 43 Achi koma amat hetoy aton ju. Ti hini mamhod an ma-ar-ali ja mahapor an tulunganay padchung na an takhu. 44 Ja hini mamhod an mumpfalin hi pangulu ja mahapor an munhimpfut an amin chi tatakhu. 45 Amat ay ha-in an Na-ilangitan an Takhu, an agkhujaˈ immali ta chaˈju an tatakhu chi munserbi ay ha-in. Muti immaliyaˈ an munserbi hana cho-or an tatakhu ja ta matojaˈ an pfajad chi pfahor cha.”
Chin nangpatengngan Hesus han napfulaw an hi Bartimeus
46 Eneˈgwan Hesus ja chin disipolo na ad Jeriko ja gwa an malahin cha ay chuy an pfuglay ja nitnud khu chin cho-or an tatakhu. Ja gwah chi han napfulaw an hi Bartimeus chi ngachana an empfalay Timeus. Inu-umpfun hija ay chuy pingngit chi kurha an khun mun-ad-adchaw. 47 Unaot chengngor an maloh hi Hesus an eNazaret ja ente-a na an nun-ugwap an nangali hi, “Hesus an holag Ari David, ka-ahiyanaˈ ad niˈ!” 48 Cho-or hachi nanghingar ay hija ta khomenong muti en-om-omod chin napfulaw an nangiˈgwap hi, “Hesus an holag Ari David, ka-ahiyanaˈ ad niˈ!” 49 Intaˈchug Hesus ja inali na hachi tatakhu hi, “Ajakhan ju hichuy lala-e.” Hotti enajakhan cha ja inali cha ay hija hi, “Munchenor a, ti chuyya an ajakhan chi-a ay Apo Hesus.” 50 Enaana chin enhahapfelloy na an lopfong ja natantannaˈchug an umuy ay Hesus. 51 Ja inalin Hesus ay hija hi, “Ngay podhom hi atoˈ ay he-a?” Tempfar chuy napfulaw ja inali na hi, “Apo, podhoˈ an mitikhaw hitay mataˈ!” 52 Ja empfokhan Hesus hi, “Aa, hotti umuy a ay ni omajam, ti mitikhaw hini matam khapo ay ni pammatim.” Ja mitikhaw gwot chin matan chuy napfulaw ja nitnud ay cha Hesus.