8
Chin namanganan Hesus hachi apat hi lipfu an tatakhu
1 Gwa khu han namenghan an na-amung hachi cho-or an tatakhu ay chuy agawwachaan Hesus. Nihihidchi cha ja napoh chin hongot cha. Ja enajakhan Hesus hachi disipolo na ja inali na hi, 2 “Tayya an nignikhaoˈ hay hato an tatakhu ti neˈhehetto cha ay chita-o hi toloh arkhaw ja chiya an napoh chin hongot cha. 3 Achiˈ podhon an mangpa-anamut ay chicha an agkhuy cha nangan, ti mahichingan cha an umuy, ti hana uchumna ja achawwi hana nun-arpugwan cha.” 4 Himmapit chin disipolo na ja inali cha chi, “Hotti ngay mah aton ta-o? Ti ma-id i ta-o pangalan hi omanay hi epa-an ay cha tay cho-or an tatakhu, ti tan nenebtaw hitay agwachaan ta-o hichi pfuglay.” 5 Ja inalinot Hesus hi, “Atanay tenapay hi gawwa ay chaˈju?” Tempfar cha ja inali cha hi, “Ti tan un peto.”
6 Inalin Hesus hachi tatakhu ta umpfun cha. Enala na chin peto an tenapay ja nunyaman ay Apo Jos. Napfalin ja initta-ittang na ja inchat na chin disipolo na ta egwanah cha hachi tatakhu, ja enat cha. 7 Ja gwacha khu han tortollo an i-itang an khachiw ja nunyaman khu hi Hesus ja inali na ta egwanah hachi adalana. 8 Nangan hachi tatakhu hotti na-apchan cha an amin. Inamung chin disipolo hachi nahagwar ja nun-apnu cha han peto an otong an pfahkit. 9 Hay pfilang hachi nangan ja umuy hi apat hi lipfu. Impa-anamut Hesus hachi tatakhu 10 ja nunlukhan hija ja chin disipolo na chin pfalangay ta umuy cha ad Dalmanuta.
Chin agkhuy namatiyan hachi Farisee ay Hesus
11 Emmatam cha Hesus ja gwacha hachi Farisee an i miˈtukki ay hija. Tenoptopngan cha ta ipatikhaw na hay milagro ta panginnilaan cha an narpu ay Apo Jos hini apfalinana. 12 Machamot hi punnomnoman Hesus ja inali na hi, “Anagkha chaˈju an tatakhu ad ugwani an timpo ta itugtukha ju an mangpfokha hi hay ipatikhaw u hi panginnilaan ju an narpu ay Apo Jos hitay apfalinaˈ. Alloˈ ay chaˈju hi ma-id oh-ohhah ipatikhaw u hi hay amat hina.”
13 Ja tenaynan Hesus chicha ja nunlukhan khu chin pfalangay, ja empacheh cha an pfumad-ang chin chammangna.
Hini pfinoˈpfoˈ hachi Farisee an hija hana khun cha itudtuchu an nehahalla
14 Chin disipolon Hesus ja nalichuwan cha an nunhongot ja un oh-ohha han inu-ugnan cha an tenapay hichi pfalangay. 15 Himmapit hi Hesus ja inali na hi, “Elanna mangkay, achi la-ahna ja i ju inapfulut hini pfinoˈpfoˈ hachi Farisee ja hini pfinoˈpfoˈ Herod.” 16 Ja khun munhahapit hachi disipolo an khun cha allon chi, “Inalin Hesus hinuy khapo ta ma-id hengngot ta-o hi tenapay.” 17 Aniˈ-ilan Hesus hini khun cha hapiton ja inali na hi, “Anagkha ta unagkhu hini a-id chi tenapay chi ikhimoh ju an haphapiton? Akamoh ja achi ju annilaon hini apfalinaˈ. Unchani ja un pfimmato hini nomnom ju. 18 Anong un khun mummulimuli hay hana mata ju ja achi ju matikhaw. Ja anong un nun-alu-angan hay hana inga ju ja achi megngor. Khenong chi un ju nalichuwan hana ena-enat u. 19 Chin nangi-ittangaˈ chin lema an tenapay an empa-an u hachi lemay lipfu an tatakhu ja atanay pfahkit hi pinnu ju chin nahagwar?” Tempfar cha ja inali cha hi, “Himpolo ta chugwa.” 20 Ja inalin khu Hesus hi, “Ja chin nangi-ittangaˈ chin peto an tenapay an empa-an u hachi apat hi lipfu hi tatakhu, ja atana hachi o-otong an pfahkit hi pinnu ju chin nahagwar?” Ja inali cha hi, “Peto.” 21 Ja inalin Hesus hi, “Aa, hotti un ju chah achi pay ma-awatan hini podhoˈ an allon?”
Chin nangakhahan Hesus han napfulaw
22 Emmatam cha Hesus ad Betsaida ja in-uy cha han napfulaw ay hija. Numpakpaka-ahi cha ta hoˈ-ona ta ma-akhahan. 23 Hotti penchon Hesus chin napfulaw ja initnud na ja in-uy na hichi pingngit chuy an pfuglay. Inchiˈlah Hesus chin tuppa na ay chuy matan chuy napfulaw ja hen-a na ja inali na hi, “Gway chah matikhaw mu?” 24 Ja nummohmohgwat chin napfulaw ja inali na hi, “Gwacha. Chiya hachi tatakhu muti omaˈ-at cha hi ajiw an khun munchallachallan.” 25 Impiggwan Hesus an nan-a chin mata na. Ja nunchiyat na ja mattag mahpay chi pannig na. 26 Inalin Hesus ay chuy napfulaw hi, “Umanamut a muti achim eˈgwa ay chuy pfuglay an narpugwan ta.”
Chin nangmatunan Peter hi nitagtakhuwan Hesus
27 Napfalin hitay ja empacheh Hesus ja hachi disipolo na an umuy hachi apfuglapfuglay an nun-ehnot ad Cesarea Filipos. Hi khun cha omajan ja inali na hi, “Ngachah tugwali chi allon hana tatakhu hi omaˈ-ataˈ?” 28 Tempfar cha ja inali cha hi, “Gwacha hana mangali hi un he-a hi John Bautista. Ja gwacha khu hana mangali hi un he-a hi Elijah, ja allon khu hana uchumna hi un a oha an profeta chin nahop.” 29 Ja inalin Hesus hi, “Chaˈju mah? Ngay allon ju tugwali hi omaˈ-ataˈ?” Tempfar Peter ja inali na hi, “He-a hini Hennag Apo Jos an Mamahhod.” 30 Ja naˈnaˈ-allon Hesus hi, “Achi ju pay epfaˈpfaag hitay hana tatakhu.”
Chin nangpa-innilaan Hesus hi atajana ja amahuwana
31 Nete-a ay chuy ja khun ipaˈpa-innilan Hesus hachi disipolo na hini cho-or an umali an punlikhatana. Khuna allon hi, “Ha-in an Na-ilangitan an Takhu ja cho-or chi likhat hi hortapoˈ. Ja pfuhulonaˈ hay hana a-ap-apon chi Hudju ja hana a-ap-apon chi papachi ja memehtolon chi urchin Moses. Patajonaˈ muti ay ni me-atloh arkhaw hot mummahuwaˈ.” 32 Ja enhamahamaid Hesus an nangali hay hato ja enegnad Peter hija ja inali na hi, “Achim khun allon hinuy.” 33 Muti nunligkhoh hi Hesus ja intikhaw na hachi disipolo na ja inhingar na hi Peter ja inali na hi, “Makak a, Satanas, ay ha-in! Ti hini podhom ja pfu-un hini penhod Apo Jos, an un meˈ-ampoy ay ni penhod chi tatakhu.” 34 Amat hichi ja enajakhan Hesus chin tatakhu ja chin disipolo na, ja inali na ay chicha hi, “Hini mamhod an midchum ay ha-in ja mahapor an chuˈkhona hini piˈtakhuwana heto lota ja pi-ukhona hini kros naa, ja inunuchaˈ. 35 Ti hini ayya takhu an mangpa-ennongan ay ni piˈtakhuwana heto lota ja angkhay, ja achi miˈtakhu ay Apo Jos. Muti hini takhu an man-ug ay ni piˈtakhuwana heto lota khapo hi pangunuchana ay ha-in ja hitay Ebanghelyo, ja miˈtakhu ay Apo Jos hi ma-id chi pogpogna. 36 Anong un alan ni takhu an amin chi enachangjan ay tay lota ja ma-id pfalor na nu un ma-utaw chamchama hini piˈtakhuwana ja nadusa hija hi ma-id chi pogpogna. 37 Ma-id ichat na hi hugwar ni piˈtakhuwana. 38 Cho-or cha ad ugwani chi nan-ug ay Apo Jos ja napukhit hana ugali cha. Hotti hay hana tatakhu an mangpfa-in ay ha-in ja hana khun u ituchu, ja ha-in an Na-ilangitan an Takhu, ja ipfa-in u khu chicha ay ni arkhaw an pumpfangngachaˈ, an magwachaan ay ni pfinang ja apfalinan Ama ja mimitnud hana nasantuwan an angher.”